جاڭا ءبىلىم ورداسىنىڭ قۇرىلىسى وسىدان ەكى جىل بۇرىن باستالعان. بيۋدجەتتەن بولىنگەن 1 ملرد 285 مىڭ تەڭگە قارجىعا سالىنعان جاڭا مەكتەپتە بالالارعا ساپالى ءبىلىم بەرۋدىڭ بارلىق مۇمكىندىگى قاراستىرىلعان: ينتەراكتيۆتى قۇرىلعىلارمەن قامتىلعان كابينەتتەر, ىڭعايلى شەبەرحانالار, وقۋ زالى مەن كىتاپحانا, زاماناۋي سپورت زالى بار. مەكتەپ عيماراتى ينكليۋزيۆتى وقىتۋعا دا يكەمدەلىپ سالىنىپتى, ەسىكتەرى كەڭ, كىرەبەرىسىندە ىڭعايلى پاندۋسى, ارنايى جابدىقتالعان سانيتارلىق توراپتارى بار. زاماناۋي مەكتەپتىڭ الدىندا وتكەن سالتاناتتى جيىنعا قاتىسقان ايماق باسشىسى ارحيمەد مۇحامبەتوۆ ۇستازداردى, وقۋشىلار مەن اتا-انالاردى جاڭا وقۋ جىلىنىڭ باستالۋىمەن قۇتتىقتادى.
– بۇگىن قوستاناي وبلىسىندا 110 مىڭ وقۋشى ءبىلىم كۇنىن اتاپ وتۋدە, سونىڭ ىشىندە 12 مىڭ بالدىرعان العاش رەت مەكتەپ تابالدىرىعىن اتتاپ وتىر. سىزدەر ءۇشىن بۇگىنگى كۇن زاماناۋي جابدىقتالعان, سوڭعى ۇلگىدەگى جاڭا مەكتەپتىڭ اشىلۋىمەن ماڭىزدى بولماق. بۇگىنگى مەكتەپتەردىڭ بارلىعى قازىرگى زامانعا ساي جابدىقتالىپ, وقۋشىلاردىڭ ساپالى ءبىلىم, سانالى تاربيە الۋىنا بارلىق جاعداي جاسالاتىن بولادى. ەل پرەزيدەنتى قاسىم-جومارت توقاەۆ ەلىمىزدىڭ باسەكەگە قابىلەتتىلىگىنىڭ نەگىزگى فاكتورى – ءبىلىم ەكەنىن ايتىپ كەلەدى. ال ءبىزدىڭ باستى مىندەتىمىز – وسكەلەڭ ۇرپاقتىڭ حالىقارالىق ستاندارتتارعا ساي كەلەتىن ساپالى بىلىمگە تەڭ قول جەتكىزۋى ءۇشىن جاعداي مەن مۇمكىندىك جاساۋ. قىمباتتى بالالار! جاڭا ءبىلىم ورداسى سىزدەردى انا ءتىلىن, تۋعان ولكە تاريحىن, حالقىمىزدىڭ سالت-داستۇرلەرىن بىلەتىن, قاستەرلەپ, دارىپتەيتىن ءبىلىمدى ءارى پاتريوت ازامات ەتىپ تاربيەلەپ شىعارادى دەگەن سەنىمدەمىن. ويتكەنى وتكەندى بىلەتىن جانە ونى ماقتان تۇتاتىن ادامدار عانا كەمەل بولاشاقتى قۇرا الادى, – دەدى ا.مۇحامبەتوۆ.
قازاق مەكتەبىنىڭ اشىلۋى – قاراسۋ تۇرعىندارى ءۇشىن ۇلكەن قۋانىش. مۇنىڭ لەبى ءسوز العان اتا-انالاردىڭ جىلى لەبىزىنەن بايقالىپ تۇردى. سونداي-اق اۋىل تۇرعىندارىنىڭ ءبىرازى جاڭا مەكتەپكە ۇلى اعارتۋشى ىبىراي ءالتىنساريننىڭ ەسىمى بەرىلسە دەگەن تىلەگىن جەتكىزدى.
– بيىل مەنىڭ ۇلىم تورەحان نۇريسلام ءبىرىنشى سىنىپ تابالدىرعىن اتتاپ وتىر. جاڭا مەكتەپتىڭ اشىلۋى بارلىعىمىز ءۇشىن دە ۇلكەن وقيعا. ءبىرازدان بەرى بالالاردىڭ بولاشاعىنا الاڭداۋلى ەدىك. بۇگىن – كوپتەن بەرى شەشىلمەي كەلە جاتقان كۇرمەۋلى ماسەلەنىڭ ءتۇيىنى تارقاتىلعان كۇن. جاڭا مەكتەپ سالىپ بەرگەن ەل باسشىلارىنا العىس ايتامىز. «ماعان جاقسى مۇعالىم بارىنەن دە قىمبات, ويتكەنى مۇعالىم – مەكتەپتىڭ جۇرەگى», دەپ ىبىراي اتامىز ايتقان ەدى. بيىل جالپى العاش مەكتەپ اشقان ۇلى ۇستاز ى.ءالتىنساريننىڭ تۋعانىنا 180 جىل تولىپ جاتىر. جەرلەسىمىزدى ۇلىقتاۋ ماقساتىندا اشىلىپ جاتقان مەكتەبىمىزگە ى.ءالتىنساريننىڭ ەسىمى بەرىلسە ەكەن دەگەن ۇسىنىسىمىز بار ەدى, – دەدى قاراسۋ اۋىلىنىڭ تۇرعىنى ەسىمحان تورەحان ۇلى.
سالتاناتتى شارادان سوڭ ا.مۇحامبەتوۆ قاراسۋدا «رۋحاني جاڭعىرۋ» باعدارلاماسى اياسىندا مۇعالىمدەرگە ارنالىپ تۇرعىزىلىپ جاتقان تۇرعىن ۇيلەردىڭ قۇرىلىسىمەن تانىستى. بۇل ۇيلەردىڭ جالپى قۇنى 48 ملن تەڭگە تۇرادى. اۋدان اكىمىنىڭ ورىنباسارى ەرلان بالجاقاەۆتىڭ ايتۋىنشا, قۇرىلىس جۇمىستارى اياقتالعان سوڭ ەكى پاتەرلى ۇيلەرگە وتباسى بار جاس مۇعالىمدەر قونىستاناتىن بولادى.
وبلىس اكىمىنىڭ ايتۋىنشا, مەكتەپتەردى جاڭعىرتۋدىڭ 2021-2025 جىلدارعا ارنالعان جوسپارىنا سايكەس, بيىل قوستاناي وبلىسىندا 82 اۋىلدىق مەكتەپ جاڭعىرتىلادى. وعان بارلىعى 2,9 ملرد تەڭگە قارجى قاراستىرىلىپ وتىر. وبلىستاعى ءبىلىم وشاقتارىن جاڭعىرتۋ بارىسىندا بۇگىنگە دەيىن 235,2 ملن تەڭگەگە وقۋشىلاردى مەكتەپكە تاسىمالدايتىن اۆتوبۋستار ساتىپ الىنىپ, 10 ملن تەڭگەگە مەكتەپ اسحانالارىنىڭ جابدىقتارى, 50,8 ملن تەڭگەگە كىتاپحانالار مەن 165,9 ملن تەڭگەگە مەكتەپ جيھازدارى جاڭارتىلعان. سونداي-اق 87,7 ملن تەڭگەنىڭ سپورتتىق كەرەك-جاراقتار ساتىپ الىنىپ, 140,3 ملن تەڭگەگە پاندىك كابينەتتەر جابدىقتالعان. 2025 جىلعا قاراي جاڭعىرتىلعان مەكتەپتەردىڭ سانى 325-كە جەتپەك.
بۇگىندە وبلىستا ءۇش اۋىسىمدى نەمەسە اپاتتى جاعدايدا تۇرعان مەكتەپتەر جوق. كەرىسىنشە, بىرقاتار جاڭا مەكتەپ عيماراتتارىن سالۋ جوسپاردا تۇر. ماسەلەن, بيىل قوستاناي قالاسىندا 2 مەكتەپتىڭ قۇرىلىسى باستالدى. مۇنىڭ سىرتىندا, وبلىس اكىمى 2025 جىلعا دەيىن 7 640 ورىندىق 13 جاڭا مەكتەپ سالىناتىنىن, ال كەلەسى جىلى 7 مەكتەپتىڭ قۇرىلىسى اياقتالۋى ءتيىس ەكەنىن ايتىپ وتىر. بۇل مەكتەپتەردىڭ نەشەۋى مەملەكەتتىك تىلدە ءبىلىم بەرەتىنى قازىرشە بەلگىسىز. ءبىر انىعى, 2022 جىلى قوستاناي قالاسىندا تاعى ءبىر قازاق مەكتەبى پايدا بولادى. ويتكەنى وبلىس ورتالىعىنداعى ارالاس سىنىپتى №15 مەكتەپ ون شاقتى جىلدان بەرى ورىس سىنىپتارىنا بالا قابىلداۋىن توقتاتقان. بيىل ورىس تىلىندە ءبىلىم الاتىن سوڭعى 11-سىنىپتى تۇلەتسە, بۇل ءبىلىم ورداسى دا الداعى جىلدان باستاپ باسى ءبۇتىن قازاق مەكتەبىنە اينالادى.
قوستاناي وبلىسى
