سەنات توراعاسى مەملەكەت باسشىسىنىڭ تاپسىرمالارى ازاماتتاردى الاڭداتقان وزەكتى ماسەلەلەردى شەشۋگە ارنالعانانىن اتاپ ءوتتى. بۇل تاپسىرمالار اۋىز سۋ, تۇرعىن ءۇي, جايىلىمدىق جەر, دەنساۋلىق ساقتاۋ, ءبىلىم بەرۋ جانە بيزنەس جۇيەلەرىن قولداۋ سياقتى باسىمدىقتاردى قامتيدى. مۇنىڭ ءبارى ماڭىزدى زاڭنامالىق وزگەرىستەردى قاجەت ەتەتىنى بەلگىلى.
«جىل سوڭىنا دەيىن ۇلتتىق قوردى جانە بيۋدجەتتى ءتيىمدى پايدالانۋدى كوزدەيتىن قوسىمشا زاڭنامالىق تۇزەتۋلەردى قابىلداۋىمىز كەرەك. سونىمەن قاتار, عىلىم سالاسىن ودان ءارى دامىتۋ مەن قولداۋعا, اكتيۆتەردى ءتيىمدى پايدالانۋعا, اگلومەراتسيانى دامىتۋعا ارنالعان زاڭنامالىق شەشىمدەر قابىلدانادى», دەدى ماۋلەن اشىمباەۆ.
جاڭا سەسسيانىڭ العاشقى وتىرىسىندا سەنات دەپۋتاتتارى قازاقستان رەسپۋبليكاسىنىڭ «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى وعان وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قاراپ, قابىلدادى.
«قابىلدانعان وزگەرىستەر ەۋرازيالىق ەكونوميكالىق وداققا مۇشە مەملەكەتتەر اراسىندا ەلەكتر ەنەرگياسىن جەتكىزۋدىڭ جەكەلەگەن ماسەلەلەرىن شەشۋگە ارنالعان. الداعى ۋاقىتتا بۇل تۇزەتۋلەر ۇيىم اياسىندا ەلەكتر ەنەرگەتيكاسى جۇيەسىن ءتيىمدى پايدالانۋعا وڭ سەپتىگىن تيگىزەدى دەپ سەنەمىز», دەدى ماۋلەن اشىمباەۆ.
سونداي-اق وتىرىس بارىسىندا سەناتورلار بىرقاتار دەپۋتاتتىق ساۋال جولدادى. ءالي بەكتاەۆ اۋىل شارۋاشىلىعى ماقساتىنداعى جەرلەردىڭ تاپشىلىعىنا نازار اۋدارسا, باقتىباي شەلپەكوۆ بەينەۋ-شالقار اۆتوجولىنىڭ قۇرىلىسىنا قاتىستى ماسەلەنى كوتەردى. سەناتورلار اسقار شاكىروۆ پەن ءلاززات سۇلەيمەن تۇرعىن ءۇي ماسەلەسىنە قاتىستى ساۋال جولدادى. ال دانا نۇرجىگىتوۆا مەكتەپ پسيحولوگتارىن دايارلاۋ جۇمىسىنداعى ولقىلىقتارعا الاڭداۋشىلىق ءبىلدىردى. ءالىمجان قۇرتاەۆ ەجەلگى وتىرار قالاسىن جانداندىرۋ جۇمىستارىنا كوڭىل ءبولۋ كەرەكتىگىن ايتتى.
