كەڭەسكە جوعارعى سوت, باس پروكۋراتۋرا, ۇلتتىق قاۋىپسىزدىك كوميتەتى, قارجى مونيتورينگى اگەنتتىگى, 8 مينيسترلىك, پرەزيدەنت جانىنداعى ادام قۇقىقتارى جونىندەگى كوميسسيا, ادام قۇقىقتارى جونىندەگى ۇلتتىق ورتالىق, جەرگىلىكتى اتقارۋشى ورگاندار مەن ۇەۇ وكىلدەرى قاتىستى.
ەل ۇكىمەتىنىڭ ادام ساۋداسىنا بايلانىستى قىلمىستاردىڭ الدىن الۋ, بولدىرماۋ جانە وعان قارسى كۇرەس جونىندەگى 2021-2023 جىلدارعا ارنالعان ءىس-شارالار جوسپارىنىڭ ورىندالۋ بارىسى تۋرالى وتىرىسقا قاتىسۋشىلاردى ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى البينا بورانبايقىزى حاباردار ەتتى.
«بيىل 26 مامىردا وتكەن ۆاك-تىڭ 40-وتىرىسىنىڭ قورىتىندىسى بويىنشا, ادام ساۋداسىنا قارسى ءىس-قيمىل سالاسىنداعى نورماتيۆتىك قۇقىقتىق اكتىلەردى جەتىلدىرۋ شەڭبەرىندە الەۋمەتتىك كودەكس تۇجىرىمداماسىنا قازاقستان اۋماعىندا ۋاقىتشا بولاتىن شەتەلدىك ادام ساۋداسىنىڭ قۇرباندارىنا ارناۋلى الەۋمەتتىك قىزمەتتەر كورسەتۋدى قاراستىراتىن نورما ەنگىزىلدى. قازىرگى ۋاقىتتا بۇل نورما مەملەكەتتىك ورگاندارمەن كەلىسۋدەن وتۋدە», دەدى ول.
سونداي-اق ۆاك-تىڭ 40-وتىرىسىندا بارلىق ءوڭىردىڭ اكىمدىكتەرىنە بيىلعى 14 ماۋسىمعا دەيىنگى مەرزىمدە وڭىرلىك كوميسسيالاردىڭ وتىرىستارىن وتكىزۋ تاپسىرىلعانىن اتاپ ءوتتى. الايدا ءبىرىنشى جارتىجىلدىقتىڭ قورىتىندىسى بويىنشا وڭىرلىك كوميسسيالار شىعىس قازاقستان, جامبىل, ماڭعىستاۋ جانە پاۆلودار وبلىستارىندا وتكىزىلمەدى.
«كەشەندى, بىرلەسكەن نەمەسە كەلىسىلگەن ۆەدومستۆوارالىق, پروفيلاكتيكالىق جانە جەدەل-ىزدەستىرۋ ءىس-شارالارىن جۇرگىزۋ شەڭبەرىندە ناۋرىز جانە ماۋسىم ايلارىندا ىشكى ىستەر ورگاندارى رەسپۋبليكا اۋماعىندا «STOP ترافيك» جەدەل الدىن الۋ ءىس-شارالارىن جۇرگىزدى. ونىڭ قورىتىندىسى بويىنشا ءىىم اۋماقتىق بولىمشەلەرى قىلمىستىق كودەكستىڭ ءتۇرلى باپتارى بويىنشا 87 سوتقا دەيىنگى تەرگەۋدى باستادى (قاناۋ ماقساتىندا ادام ۇرلاۋ, قاناۋ ماقساتىندا باس بوستاندىعىنان زاڭسىز ايىرۋ, كامەلەتكە تولماعاندى جەزوكشەلىكپەن اينالىسۋعا تارتۋ, كامەلەتكە تولماعانداردى ساۋداعا سالۋ, جەزوكشەلىكپەن اينالىسۋعا تارتۋ, جەزوكشەلىكپەن اينالىسۋعا ارنالعان پريتوندار ۇيىمداستىرۋ نەمەسە ۇستاۋ جانە جەڭگەتايلىق)», دەپ تولىقتىردى الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى.
بۇدان باسقا, وتىرىستا قازاقستان اۋماعىندا ۋاقىتشا تۇراتىن شەتەلدىكتەرگە جانە ادام ساۋداسىنىڭ قۇربانى بولعان ازاماتتىعى جوق ادامدارعا ارناۋلى الەۋمەتتىك قىزمەتتەر كورسەتۋ بولىگىندە قولدانىستاعى زاڭناماعا وزگەرىستەر مەن تولىقتىرۋلار ەنگىزۋ ماسەلەلەرى قارالدى. وسىعان بايلانىستى ەڭبەكمينى 9 زاڭنامالىق اكتىگە: قازاقستان ازاماتتارىمەن تەڭ دارەجەدە تەگىن مەديتسينالىق كومەكتىڭ كەپىلدىك بەرىلگەن كولەمىن, قۇقىقتىق كونسۋلتاتسيا بەرۋ, سونداي-اق سوتتاردا, قىلمىستىق قۋدالاۋ ورگاندارىندا, وزگە دە مەملەكەتتىك ورگاندار مەن مەملەكەتتىك ەمەس ۇيىمداردا مۇددەلەردى قورعاۋ جانە ءبىلدىرۋ تۇرىندەگى مەملەكەت كەپىلدىك بەرگەن زاڭ كومەگىن, باستاۋىش, نەگىزگى ورتا جانە جالپى ورتا ءبىلىم, ارناۋلى الەۋمەتتىك قىزمەتتەردىڭ كەپىلدىك بەرىلگەن كولەمىن, جۇمىسپەن قامتۋعا جاردەمدەسۋدىڭ بەلسەندى شارالارى – جاڭا كاسىبي ءبىلىم, جۇمىسقا ورنالاسۋ شاراسىن جانە ت.ب. الۋعا قۇقىق بەرۋ بولىگىندە تۇزەتۋلەر ەنگىزۋدى تالاپ ەتەتىن ۇسىنىستار دايىندادى.
«زاڭناماعا ۇسىنىلعان تۇزەتۋلەر بارلىق مۇددەلى مەملەكەتتىك ورگانمەن بىرگە تالقىلانىپ, قولداۋ تاپتى. بۇل نورمالار شەتەلدىك ادام ساۋداسىنىڭ قۇرباندارىنا كورسەتىلەتىن كومەك كولەمىنە تەڭ دارەجەدە قول جەتكىزۋگە مۇمكىندىك بەرەدى. ولاردىڭ تەرگەۋ مەن قىلمىستىق قۋدالاۋعا تارتىلۋىنا قاراماستان, الەۋمەتتىك كومەك كورسەتۋدى قامتاماسىز ەتۋگە مۇمكىندىك بەرەدى», دەدى ا.بورانبايقىزى.
وتىرىس قورىتىندىسى بويىنشا ۆەدومستۆوارالىق كوميسسيا: مەملەكەتتىك ورگاندار مەن وبلىستاردىڭ, الماتى, نۇر-سۇلتان, شىمكەنت قالالارىنىڭ اكىمدىكتەرىنە قازاقستان رەسپۋبليكاسى ۇكىمەتىنىڭ ادام ساۋداسىنا بايلانىستى قىلمىستىڭ الدىن الۋ, جولىن كەسۋ جانە وعان قارسى كۇرەس جونىندەگى 2021-2023 جىلدارعا ارنالعان ءىس-شارالار جوسپارىنىڭ ۋاقتىلى جانە ساپالى ورىندالۋىن قامتاماسىز ەتۋدى, مەملەكەتتىك ورگاندارعا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مۇگەدەك ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قازاقستان اۋماعىندا ۋاقىتشا تۇراتىن شەتەلدىكتەرگە جانە ادام ساۋداسىنىڭ قۇرباندارى بولعان ازاماتتىعى جوق ادامدارعا سسب بەرۋ بولىگىندە كەلىسۋ پروتسەسىن جەدەلدەتۋدى; وبلىستاردىڭ, الماتى, نۇر-سۇلتان, شىمكەنت قالالارىنىڭ اكىمدىكتەرىنە وسى جىلدىڭ ەكىنشى جارتىجىلدىعىندا ادامداردى زاڭسىز اكەتۋگە, اكەلۋگە جانە ساتۋعا قارسى كۇرەس ماسەلەلەرى بويىنشا وڭىرلىك كوميسسيا وتىرىستارىن وتكىزۋدى ۇسىندى.
ەسكە سالا كەتەيىك, ءوزارا ءىس-قيمىلدى ۇيلەستىرۋ ءۇشىن ۆاك-قا توراعالىق ەتۋ روتاتسيالىق نەگىزدە جۇزەگە اسىرىلادى.
