فرانتسيا تاراپىنىڭ باستاماسىمەن قاسىم-جومارت توقاەۆ ەممانۋەل ماكرونمەن تەلەفون ارقىلى سويلەسىپ, ەكىجاقتى قارىم-قاتىناستىڭ وزەكتى ماسەلەلەرىن جانە اۋعانستانداعى جاعدايدى جان-جاقتى تالقىلادى.
مەملەكەت باسشىسى ستراتەگيالىق سەرىكتەستىك دەڭگەيىنە جەتكەن قازاقستان مەن فرانتسيا اراسىنداعى ءوزارا ءتيىمدى بايلانىستاردىڭ دامۋىنا توقتالدى.
– فرانتسۋز رەسپۋبليكاسى – ەكونوميكالىق الەۋەتى جاعىنان الەمدەگى بەسىنشى ەل, ءبىزدىڭ نەگىزگى سەرىكتەسىمىز. ءبىز ناقتى ناتيجە بەرەتىن بىرلەسكەن بەلسەندى جۇمىستارعا, ءبىرىنشى كەزەكتە ەكونوميكا سالاسىنا ەرەكشە ءمان بەرەمىز, – دەدى قازاقستان پرەزيدەنتى.
قاسىم-جومارت توقاەۆ فرانتسيانى ءبىزدىڭ ەكونوميكامىزعا 2005 جىلدان بەرى 17 ميلليارد قارجى سالۋى ارقىلى ينۆەستورلاردىڭ العاشقى بەستىگىنە كىرىپ وتىرعانىن اتاپ ءوتتى. 2020 جىلدىڭ قورىتىندىسى بويىنشا ءوزارا ساۋدا كورسەتكىشى – 2,8 ميلليارد دوللاردى قۇراعان.
ەممانۋەل ماكرون قازاقستانمەن اراداعى ساۋدا-ەكونوميكالىق جانە ساياسي بايلانىستاردى تەرەڭدەتە تۇسۋگە مۇددەلى ەكەنىن جەتكىزدى.
مەملەكەتتەر باسشىلارى ۇكىمەت دەڭگەيىندەگى بايلانىستاردى جانداندىرۋعا دايىن ەكەندەرىن ناقتىلادى. پرەزيدەنتتەر قازاقستان مەن فرانتسيا ىنتىماقتاستىعىنا سەرپىن بەرەتىن جوبالاردىڭ جۇزەگە اسۋىنا نازار اۋدارۋعا ۋاعدالاستى.
قاسىم-جومارت توقاەۆ پەن ەممانۋەل ماكرون اۋعانستانداعى احۋال جونىندە پىكىر الماستى.
پرەزيدەنتتەر ايماقتىڭ تۇراقتىلىعى, قاۋىپسىزدىگى مەن ورنىقتى دامۋىنا قاتىستى ماسەلەلەردە ءجيى اقىلداسىپ تۇرۋعا كەلىستى. مۇنداي جۇمىستار ەكىجاقتى دەڭگەيدە دە, بۇۇ الاڭىندا جانە حالىقارالىق فورماتتا دا جۇزەگە اسىرىلماق.
فرانتسيا پرەزيدەنتىنىڭ ءوتىنىشى بويىنشا قاسىم-جومارت توقاەۆ وعان قازاقستاننىڭ اۋعانستانداعى جاعدايدى تۇراقتاندىرۋعا قاتىستى كوزقاراستارى مەن ءبىزدىڭ ۇكىمەتتىڭ باتىس ەلدەرى ازاماتتارى مەن اۋعاندىقتاردى ەۆاكۋاتسيالاۋ جونىندە قابىلداعان شارالارى تۋرالى ايتىپ بەردى. ەممانۋەل ماكرون قازاقستاننىڭ ءوز اۋماعىندا بۇۇ-نىڭ اۋعانستانداعى ميسسياسىنىڭ قىزمەتكەرلەرىن جانە الەمدىك ۇيىمنىڭ باسقا دا اگەنتتىكتەرىن ورنالاستىرۋ تۋرالى شەشىمىن جوعارى باعالادى.
