اتالعان اۋىلدا 250 تۇرعىن بار. بۇگىندە ازاماتتار تيىسىنشە ەۆاكۋاتسيالاندى. ورىن العان وقيعاعا بايلانىستى جامبىل وبلىسىنىڭ اكىمدىگى رەسمي حابارلاما جاسادى. ءوڭىردىڭ توتەنشە جاعدايلار, قۇقىق قورعاۋ جانە مەديتسينا سالاسىنىڭ وكىلدەرى بارىنشا جۇمىلدىرىلعان. اتالعان ماسەلەگە بايلانىستى قانداي دا ءبىر تۋىنداعان سۇراقتار ءۇشىن ارنايى جەلىلەر ىسكە قوسىلعان. اپات ورىن العان اۋماقتان ەۆاكۋاتسيالانعان تۇرعىندارعا ارنالىپ, وبلىس ورتالىعىنان 400-دەن استام ورىن دايىندالعان. قوسىمشا 1000-عا جۋىق ورىن دايىنداۋ مۇمكىندىگى قاراستىرىلعان.
جەدەل مەديتسينالىق كومەك كورسەتۋ ءۇشىن 37 جەدەل جاردەم بريگاداسى, ونىڭ ىشىندە 3 مەديتسينالىق اۆياتسيالىق بريگادا تارتىلعان. تاعى 1 بريگادا تاراز قالاسىنداعى #5 مەكتەپتە كەزەكشىلىك ەتەدى, ال تاراز پوليتەحنيكالىق كوللەدجىندە 1 بريگادا جۇمىس ىستەيدى. بايزاق اۋدانى, بازارباي اۋىلىنان بۇعان دەيىن 226 ادام ەۆاكۋاتسيالانعان بولاتىن.
27-تامىز كۇنگى ساعات 08:00-دەگى جاعداي بويىنشا ەۆاكۋاتسيا ورتالىقتارىندا جالپى 171 ادام قالىپ وتىر, ولارعا قاجەتتى جاعداي جاسالىپ, تاڭعى اس بەرىلدى.
تراۆماتولوگ, نەيروحيرۋرگ, حيرۋرگ, رەانيماتولوگ جانە باسقالاردى قوسقاندا 32 دارىگەر, 56 فەلدشەر قىزمەت اتقارۋدا. ولار ءدارى-دارمەكپەن قامتاماسىز ەتىلگەن.
بۇگىنگى جاعداي بويىنشا 28 ادام اۋرۋحانادا ەم قابىلداسا, ونىڭ ىشىندە 6 ادام اۋىر حالدە جاتىر.
جامبىل وبلىسىنىڭ بىرىڭعاي ديسپەتچەرلىك 109 قىزمەتىنە بارلىعى 473 ءوتىنىش كەلىپ تۇسكەن. «109» قىسقا نومەرىنە – 265 ءوتىنىش, «What`s app» مەسسەندجەرىنە – 190 ءوتىنىش كەلىپ تۇسكەن.
وتىنىشتەردىڭ كوبى تۇرعىنداردىڭ ەۆاكۋاتسيالانۋى, اسكەري بولىمدەگى قويمانىڭ جاعدايى بويىنشا جانە تاعى دا باسقا جاعدايلار بويىنشا بولعان.
