Ranking.kz زەرتتەۋىنە سۇيەنسەك, 2021 جىلدىڭ ەكىنشى توقسانىندا ءبىلىم بەرۋ سالاسىندا 528,4 مىڭ ادام جۇمىسپەن قامتىلعان, بۇل ءبىر جىل بۇرىنعى كورسەتكىشتەن 2,5%-عا ارتىق.
ساراپشىلار ايماقتىق جاعدايدا ءبىلىم بەرۋ قىزمەتكەرلەرى الماتى وبلىسىندا كوپ (68,3 مىڭ ادام) ەكەنىن جازادى. الماتى مەن شىعىس قازاقستان وبلىسى دا ۇزدىك ۇشتىككە ەنگەن. ال اتىراۋ وبلىسىنىڭ ءبىلىم بەرۋ سالاسىندا تەك 14,2 مىڭ ادام عانا جۇمىسپەن قامتىلىپ, ەڭ از كورسەتكىش كورسەتتى.
ءبىلىم بەرۋ قىزمەتكەرلەرىنىڭ ورتاشا ايلىق جالاقىسى 2021 جىلدىڭ ەكىنشى توقسانىندا 233,9 مىڭ تەڭگەگە جەتتى, بۇل وتكەن جىلمەن سالىستىرعاندا 26,8%-عا كوپ.
ءوڭىر بويىنا قاراستىرساق, ەلورداداعى ءبىلىم بەرۋ سالاسىنىڭ قىزمەتكەرلەرىنىڭ تابىسى جوعارى - 350,8 مىڭ تەڭگە. بۇل ءبىر جىل بۇرىنعىدان 17,6% كوپ. ەكىنشى جانە ءۇشىنشى ورىنداردى ماڭعىستاۋ وبلىسى (268 مىڭ تەڭگە) مەن الماتى (265,5 مىڭ تەڭگە) يەلەندى. ەڭ ناشار كورسەتكىش باتىس قازاقستان وبلىسىندا تىركەلدى. ول جاقتا پەداگوگتەردىڭ ورتاشا جالاقىسى - 200,7 مىڭ تەڭگە.
ساراپشىلار كورسەتكەندەي, 17 ايماقتىڭ بەسەۋىندە عانا پەداگوگتەردىڭ ەڭبەكاقىسى رەسپۋبليكالىق ورتاشا جالاقى دەڭگەيىنەن اسىپ ءتۇستى. توپ-3-تەن باسقا, بۇل بەستىككە قىزىلوردا مەن الماتى وبلىستارى دا كىرەدى.
2022 جىلدىڭ قاڭتارىندا بالاباقشا تاربيەشىلەرى, مەكتەپ پەن كوللەدج ۇستازدارىنىڭ جالاقىسى تاعى 25%-عا وسەدى. سونىمەن قاتار, 2021 جىلدىڭ قىركۇيەگىنەن باستاپ مۇعالىمدەردى جۇمىسقا قابىلداۋ مەن ءبىلىم بەرۋ ۇيىمدارىنىڭ ديرەكتورىن تاعايىنداۋ ەرەجەسى وزگەرەدى.
