ەلشىنىڭ ايتۋىنشا, قازاقستان مەن وزبەكستاننىڭ اۋماعىندا فارماتسەۆتيكالىق ونەركاسىپ اشۋ ماسەلەسى قارالىپ جاتىر. سونداي-اق س.نيازحودجاەۆ كوروناۆيرۋسپەن كۇرەستە وزبەكستان مەن قازاقستاننىڭ ءوزارا بايلانىسىنا ەرەكشە توقتالدى.
«ەكى ەلدىڭ دەنساۋلىق ساقتاۋ مينيسترلىكتەرى ىندەتتى جەڭۋ جولىندا ءوزارا تاجىريبە الماستى. قازاقستاننىڭ دەنساۋلىق ساقتاۋ ءمينيسترى وزبەكستانعا بارىپ, ەلدەگى ەپيدەميالىق جاعدايدى جاقسارتۋعا قاتىستى ەكىجاقتى كەڭەس ءوتتى. ودان بولەك, پاندەميا ءورشىپ تۇرعان ساتتە باۋىرلاس قازاق ەلى وزبەك باۋىرلارىنا گۋمانيتارلىق كومەك كورسەتتى. سايكەسىنشە ءبىزدىڭ ەل دە Covid-19-بەن كۇرەستە قازاقستانعا قول ۇشىن سوزدى. بۇگىندە ەكى ەل اراسىندا اتالعان باعىتتا ءوزارا تاجىريبە الماسۋ جالعاسىپ كەلەدى. سونىڭ ءبىرى – قازىرگى تاڭدا وزبەكستان مەن قازاقستان اۋماعىندا فارماتسەۆتيكالىق كاسىپورىن اشۋ ماسەلەسى قارالىپ جاتىر», دەدى سايديكرام نيازحودجاەۆ.
ەلشىنىڭ ايتۋىنشا, بيىلعى
6 اي ىشىندە قازاقستان مەن وزبەكستان اراسىنداعى تاۋار اينالىمى 1,9 ملرد دوللارعا جەتتى. اتالعان ەلدە اكتسيونەرلىك قوعام ۇلەسى بويىنشا قازاقستاندىق ونەركاسىپتەر العاشقى ورىندا تۇر.
«ەكى ەل ۇكىمەتى قابىلداعان ءوزارا كەلىسىمنىڭ ناتيجەسىندە ەكىجاقتى تاۋار اينالىمىنىڭ قارقىنى ارتىپ كەلەدى. بۇعان دەيىن وزبەكستان مەن قازاقستان اراسىنداعى تاۋار اينالىمى تۇراقتى دەڭگەيدە بولدى. اتاپ ايتار بولساق, وتكەن جىلى ەكى ەل اراسىنداعى تاۋار اينالىمى 3 ملرد-تان استام دوللاردى قۇرادى. بيىل 6 ايدىڭ ىشىندە ەكى ەل اراسىنداعى تاۋار اينالىمى 1,9 ملرد اقش دوللارىن قۇراپ وتىر. بۇل وتكەن جىلمەن سالىستىرعاندا 41,3 پايىزعا جوعارى. قازىرگى ۋاقىتتا وزبەكستان رەسپۋبليكاسى اۋماعىندا قازاقستان كاپيتالىنىڭ قاتىسۋىمەن 858 ونەركاسىپ جۇمىس ىستەپ تۇر. ونىڭ ىشىندە 431 ونەركاسىپ ەكىجاقتى كاپيتال (50/50) كومەگىمەن جۇمىس ىستەپ تۇر جانە 427 ونەركاسىپ تازا قازاقستاندىق كاپيتالدىڭ ەسەبىنەن ءوندىرىسىن جالعاستىرىپ جاتىر», دەدى وزبەكستان ەلشىسى.
ءباسپاسوز ءماسليحاتىندا سايديكرام نيازحودجاەۆ وزبەكستاندى مەكەندەگەن قازاقتاردىڭ جاي-كۇيىنە توقتالدى. ونىڭ ايتۋىنشا, قازىرگى تاڭدا ەلدە 800 مىڭنان استام قازاق تۇرىپ جاتىر.
«2018 جىلى قازاقستاندا وزبەكستان رەسپۋبليكاسى جىلى اتالىپ ءوتتى. ايتۋلى جىل اياسىندا قازاقستاندا ءتۇرلى باعىتتاعى 90-نان استام ءىس-شارا ۇيىمداستىرىلدى. سايكەسىنشە, 2019 جىلى ءبىزدىڭ ەلدە قازاقستان جىلى اتالىپ ءوتىلدى جانە ونىڭ اياسىندا 80-نەن استام ءىس-شارا ءوتتى. ەكىجاقتى وتكەن ءىس-شارالار ساياسي, اعارتۋ, مادەني جانە گۋمانيتارلىق باعىتقا ارنالدى. وكىنىشكە قاراي, 2020 جىلى پاندەمياعا بايلانىستى ەكىجاقتى ءىس-شارالاردى توقتاتا تۇرۋعا تۋرا كەلدى. دەگەنمەن, ەكى ەل اراسىنداعى ءوزارا بايلانىس توقتاعان ەمەس.
قازىرگى تاڭدا وزبەكستاندا 822 مىڭ قازاق ءومىر ءسۇرىپ جاتىر. ولار وزبەكستان ەلىنىڭ دامۋىنا ءوز ۇلەسىن قوسۋدا. ءبىزدىڭ ەلدە 400-دەي مەكتەپ قازاق تىلىندە ءبىلىم بەرىپ جاتىر. سونىمەن قاتار وزبەكستاننىڭ 7 جوعارى وقۋ ورنىندا گۋمانيتارلىق جانە تەحنيكالىق ماماندىقتار قازاق تىلىندە وقىتىلادى. 1992 جىلدان بەرى وزبەكستاننىڭ 30 وبلىس ورتالىعىندا قازاق مادەني ورتالىعى جۇمىس ىستەپ تۇر», دەدى
ەلشى.
سايديكرام نيازحودجاەۆتىڭ كەلتىرگەن مالىمەتتەرىنە سۇيەنسەك, 630 قانداسىمىز كورشى وزبەك ەلىنىڭ مەملەكەتتىك ناگرادالارىن يەلەنگەن. ەلشى باۋىرلاس قازاقستانمەن اتالعان باعىتتاعى دوستىق قارىم-قاتىناس جالعاسا بەرەتىنىن اتاپ ءوتتى.
