ۇلت مادەنيەتىنىڭ تاعى ءبىر التىن ساندىعى اشىلعانداي كۇي كەشتىك. ۆيتەبسكىدەگى اياۋلى ءسات ءالى دە كوز الدىمىزدا. بۇدان سوڭ بوركىڭىزدى اسپانعا اتپاي كورىڭىزشى. مىنە, بۇگىن جەڭىسپەن ەلگە ورالعان «سلاۆيان بازارى – 2021» حالىقارالىق ءان بايقاۋىنىڭ گران-پري يەگەرى رۋحيا بايدۇكەنوۆامەناڭگىمەلەسۋدىڭ ءساتى ءتۇستى. مىڭ بۇلاقتىڭ تامشىسىنداي سىلدىرلاعان سۇلۋ سازدى كوكىرەگىڭە قوندىرعان جاس ءانشىنىڭ جان تولعانىسىنا قۇلاق ءتۇرىڭىز.
– رۋحيا, ءسىز جەڭىسكە جەتكەن كەزدە ەلدەن ەڭ ءبىرىنشى ەگەمەندىكتەر ءسۇيىنشى سۇراعان بولاتىن. ارتىنان وقىرماندارىمىز حابارلاسىپ, ءبىزدىڭ اۋىلدىڭ قىزى دەپ ماقتان تۇتتى. ادام توپىراعىنا تارتپاي قويمايدى. اڭگىمەنىڭ القيسساسىن تۋعان جەردەن باستايىقشى.
– تۋعان توپىراعىم – جەر ءجانناتى جەتىسۋ. سول شۇرايلى دا شۇعىلالى مەكەندە دۇنيە ەسىگىن اشتىم. اكە-شەشەم – قاپال اۋدانى, قوڭىر اۋىلىنىڭ تۋماسى. ال مەنىڭ بالالىعىم شاعىن دا شىرايلى شاھار – تالدىقورعاندا ءوتتى. 9-سىنىپقا دەيىن سول قالادا تۇردىم. تالاي دۇلدۇلدەرگە قانات بەرگەن «بالالار ونەر مەكتەبىندە» قوبىزشى تۇرسىنحان دۇكەنقىزىنان ءبىلىم الدىم. ول كىسى سوندا ديرەكتور بولىپ قىزمەت ىستەدى. جەكە ۇستازىم, ءوز ءىسىنىڭ ادال مامانى سەرىكجامال اجىبەكوۆا بولدى. مەنىڭ ومىرىمدە ەكىنشى انامداي بولىپ كەتكەن جان. ءتىپتى ءالى كۇنگە ۇزبەي ارالاسىپ تۇرامىز. جالپى, جەتىسۋ جەرىنىڭ تاريحى تەرەڭ, سۇلەيلەر مەن جىراۋلاردىڭ التىن قامباسى ەمەس پە؟ ەل ىشىندە «جەتىسۋ ونەر مەكتەبى» دەگەنىمىز – ونەر كەنىشىنە بالاناتىن قاراشاڭىراقتىڭ ءبىرى. نەبىر دۇلدۇلدەردىڭ تابانىنىڭ ءىزى قالعان قۇتتى مەكەن. كەيدە ويلايمىن, مەنىڭ جەڭىسىمنىڭ ءتۇپ باستاۋىندا سول ونەر الىپتارىنىڭ ءۇنى جاتقان شىعار دەپ. سەبەبى ەشنارسە تەگىننەن تەگىن بولمايدى. ءبىز كەز كەلگەن نارسەنى جاقسىلىققا ىرىمدايتىن حالىقپىز عوي. سوندىقتان مەن قاشاندا كىندىك قانىم تامعان قاسيەتتى جەردى بارىنەن بيىك قويامىن. ول ول ما, سونداعى اتقا مىنگەن ازاماتتار دا ءبىر توبە. وبلىس اكىمى اماندىق باتالوۆ وتە قازاقى, ءىستىڭ ءمانىسىن بىلەتىن ادام. قازىر قالانىڭ كوركەيۋىنە كۇش سالىپ جاتىر. مەنىڭ ىرىكتەۋدەن وتكەنىمدى ەستىپ, قولىنان كەلگەن كومەگىن كورسەتتى. ۇلكەن سەنىم ارتتى. ۇياتقا قالدىرمادىم دەپ ويلايمىن.
– ءسىزدىڭ داۋسىڭىزدا دالانىڭ دارقاندىعى بار. كەڭ تىنىستى, ساحناداعى ەركىندىكتى بىردەن بيلەپ الاسىز. شاماسى, وتباسىڭىز دا ونەردەن كەندە ەمەس بولىپ تۇر-اۋ...
– ونىڭىز راس! مەنىڭ اتام بايدۇكەن كۇيشى, دومبىراشى بولعان كىسى. ءتىپتى ءوز ۋاعىندا ءان دە شىعارعان ەكەن. بىراق الاساپىران زاماندا ونەرىن ەلگە تانىتۋدىڭ ەش ىڭعايى كەلمەگەن كورىنەدى. مەنىڭ ءان ايتاتىن قاسيەتىمدى اعايىن-تۋىس سول ارداقتى اتاما تارتقان دەپ بولجايدى. راسىمەن, اتامنان دارىعان بولۋى كەرەك. اكەم بولسا قاراپايىم جۇمىسشى, وتە بايسالدى كىسى. ايتپاقشى مەن – اكەمنىڭ قىزىمىن (ك ۇلىپ ايتتى). مىنەزى سالماقتى بولعاندىقتان با ءبىزدى قاتتى تاربيەلەدى. ەركەلەتپەيتىن, قىمبات زاتتار ساتىپ الىپ بەرمەيتىن. ۇيدە ەكى قىزبىز. انامىز شاش جايعىزبايتىن, مەكتەپتەگى بي كەشتەرىنە دە سيرەك باراتىنبىز. ساعات 4-تەن كەيىن دۇكەنگە جىبەرمەيتىن. بالا كۇنىمىزدە كومىر دە تاسىدىق, وتىن دا جاردىق, ءتىپتى اكەمىز مال سويۋدى دا ۇيرەتتى. ءومىردىڭ كەز كەلگەن قيىندىقتارىن جەڭە بىلۋگە تاربيەلەدى. مەنىڭ ۇلكەن بايقاۋدا توپ جارۋىمنىڭ باستى سەبەبى سول اكەمنەن العان ونەگە شىعار. ۇلكەن بوگەتتەردى ەڭسەرۋىمە رۋح بەردى. بۇرىن بۇل ادەتىنە رەنجيتىنمىن, بايقاۋعا دايىندىق بارىسىندا وكپەمنىڭ بەكەر ەكەنىن ۇقتىم. مەنى قيىندىقتاردان وتباسىنداعى ءتالىم الىپ شىقتى. ال انامنىڭ ەسىمى – ناتاشا, ناعاشى اتام – قازاق, ناعاشى اجەم – ورىس ۇلتىنىڭ قىزى بولعان. انام تازا قازاقشا سويلەيدى, داستۇرگە باي ادام. اتا-انام ونەر جولىنا ءتۇسۋىمدى قالامادى. ءتىپتى قاسىنان الىسقا ۇزاتقىسى كەلمەدى دە. استاناعا وقۋعا كەتكەنىمدە اكەمنىڭ قيماي قاراعانى ءالى ەسىمدە.
– ءيا, قازاقى تاربيەدەن شىققانىڭىزدى بولمىسىڭىزدان بايقاپ وتىرمىن. ءتىپتى ەسىمىڭىز دە ەرەكشە. اۋلەتىڭىز ات قوياردا كوپ ويلانعان سەكىلدى. وزگەشە, بۇرىن ەستىمەگەن ءسوز. نەگە «رۋحيا» دەپ اتادى؟
– مۇمكىن, رۋحتى قىز بولسىن دەگەن شىعار. ەسىمىمدى بايدۇكەن اتام قويىپتى. رۋحيا – مەنىڭ ۇلكەن اجەمنىڭ ەسىمى, ياعني اتامنىڭ اناسىنىڭ اتى. مىنانداي قىزىق جاعداي بولعان ەكەن. اكەمنىڭ باۋىرىنىڭ ايەلى اناممەن قاتار جۇكتى بولىپتى. قاي كەلىنى ءبىرىنشى بوسانادى, سونىڭ ەسىمىن قويۋ اتاما جۇكتەلگەن. ال ول كىسى قىز تۋسا, رۋحيا دەپ اتايتىنىن ايتقان. ومىرگە ءبىرىنشى مەن كەلگەن سوڭ, ماڭدايىما وسى ەسىم بۇيىردى. اللاعا شۇكىر, ارتىنان جەڭگەم ەر بالا ومىرگە اكەلدى. ايتپاقشى, رۋحيا اجەمىز دە ءانشى بولىپتى.
– شىنىمەن, بۇل ەسىمدە قۇت بولىپ تۇر عوي. قاتارىڭىزدان دارا شابۋىڭىزدا تەگىننەن تەگىن ەمەس. وتباسىڭىزدىڭ قارسىلىعىنا قاراماستان, 15 جاسىڭىزدا ەلورداعا بەت تۇزەدىڭىز. مۇنىڭ ءوزى ەرلىك! ارمانعا دەگەن العاشقى قادامىڭىز قالاي باستالدى؟
– ۇلاعاتتى ۇستازىم جانار, سەرىكجامال اپايلارىمنان 7 جىل ءبىلىم الدىم. مەكتەپتە وقىپ ءجۇرىپ, «تالدىقورعان اۋەندەرىندە» ءان ايتتىم. ەندىگى بەلەس مەن ءۇشىن استانا بولدى. وسىلايشا, قازاق ۇلتتىق ونەر ۋنيۆەرسيتەتىنىڭ كوللەدجىنە گرانتقا ءتۇستىم. ونداعى ۇستازىم يرينا بالابەكقىزى بولدى. ءالى دە سول كىسىدەن ءتالىم الىپ كەلەمىن. بۇگىندە سول ونەر شاڭىراعىندا وقىپ جاتىرمىن. باعىما وراي, جاقسى ادامدارعا جولىقتىم. بايقاۋعا دايىندىق كەزىندە قۋانىش رىسقۇلوۆ, ديماش قۇدايبەرگەننەن جەكە ساباق الدىم. ولار مەننەن بار كومەگىن ايامادى. ءوزىمدى شىڭداۋعا, رۋحاني جەتىلۋىمە جىگەر بەردى.
– ديماش دەمەكشى, ءبىر سۇحباتىڭىزدا بايقاۋدىڭ ىرىكتەۋىنە قاتىسۋدى ديماشتىڭ قولقالاعانىن ايتىپسىز. سوندا «سلاۆيان بازارىنا» بارۋ و باستا ويىڭىزدا بولماعانى ما؟
– بىلەسىز بە, مەن 3 جىل قاتارىنان ىرىكتەۋگە قاتىستىم, ەكى رەت ءسۇرىندىم. ۇلكەن بايقاۋلاردا رۋحى بيىك ادام عانا جەڭەدى. العاشىندا ول رۋحتى ءادىل-قازىلار مەنىڭ كوزىمنەن تابا الماسا كەرەك. ەكىنشى جىلى 1 ۇپاي جەتپەي قالدى. 95 كەلىدەن 72 كەلىگە دەيىن سالماق تاستادىم. بار كۇش-جىگەرىمدى سالعانىممەن تاعى دا بۇيىرمادى. ەكى مۇمكىندىكتەن كەيىن كوڭىلىم سۋ سەپكەندەي باسىلىپ قالدى. بيىل باق سىناۋعا جۇرەگىم داۋالاماي ءجۇردى. سوندا ديماش تاعى ءبىر مارتە باق سىناپ كورۋىم جايلى يدەياسىن ءبىلدىردى. بۇل ماعان ۇلكەن قولداۋ بولدى. ونىڭ ۇستىنە باياعىداي كۇيىپ-پىسكەن جوقپىن, ءبارىن جەڭىل قابىلداۋعا تىرىستىم. ءسويتىپ, شەتەلگە شىعۋعا مۇمكىندىك الدىم. ىرىكتەۋدەن وتۋىمە ومىردەن جيناعان تاجىريبەم دە جاردەمدەستى دەسەم ارتىق ايتپاعان بولار ەدىم. سەبەبى, بالا كۇنىمنەن ساحنادان تۇسپەدىم. ءان ايتۋ مەن ءۇشىن باقىت بولاتىن. «ەگىز-لەبىز» باعدارلاماسىندا جۇمىس ىستەدىم. ول جاقتا انشىلەردىڭ اۋراسىن سەزىندىم. وسىنىڭ ءبارى جەڭىسىمە جولاشار كەزەڭدەر ەسەبىندە قۇندى بولىپ قالدى. بالا كۇنىمنەن روزا رىمباەۆاعا ەلىكتەپ ءوسىپ, كەيىن ديماش قۇدايبەرگەندى تىڭدايتىن بولدىم.
– جەڭىستىڭ ءدامى ءتاتتى بولعانىمەن, وعان جەتۋ جولىندا اياماي تەر توگۋىڭە تۋرا كەلەدى. بايقاۋعا دايىندىق بارىسىندا قانداي قيىندىقتار كەزدەستى؟
– شىنىمدى ايتسام, قولىمدى ءبىر سىلتەگەن ساتتەر بولدى. پسيحولوگيالىق تۇرعىدان ءوزىڭدى ۇلكەن دوداعا باپتاۋ وتە قيىن. ەل نامىسى سەنىڭ موينىڭدا تۇرعاندىقتان سۇرىنۋگە قورقاسىڭ. ءار ءتۇرلى الىپ-قاشپا پىكىرلەر كوڭىلىڭە كولەڭكە ۇيالاتادى. باسىندا مەنى كوپشىلىك تانىمادى. تەلەارنالار, باسىلىمدار جاريالاۋدان باس تارتتى. سۇحبات الىڭىزدار دەپ جالىنعان كەزدەرىمىز دە بولدى. ءۇش اي بويى ءۇزىلىسسىز جاتتىعۋ جاسادىم. تاڭعى 5-تە تۇرىپ دايىندىققا كىرىسەمىن. ارنايى بيگە باردىم, تاماقتى تالعاپ ءىشتىم. ساحنادا بيىك وكشەلى تۋفليمەن ءجۇرىپ ۇيرەندىم. بايقاۋدىڭ العاشقى كەزەڭىندە Emotions ءانىن ورىندادىم. ونى ەرلان بەكچۋرين وڭدەدى. مۇندا – جاڭا فورما, مەلوديا از. ال ەكىنشى كۇنى پرەزيدەنت وركەسترىمەن «زوزۋليا» ءانىن ورىندادىم. ارينە, ىشتەي قوبالجۋ بولدى. بىراق سونىڭ ءبارىن ەڭسەردىم دەپ ويلايمىن. بەلگىلى جۋرناليست قىمبات دوسجانعا, قازاقستاننىڭ حالىق ءارتىسى ايمان مۇساحوجاەۆاعا, ديماشتىڭ كومەكشىسى نۇربولعا دا ىزگى ءىلتيپاتىمدى بىلدىرەمىن.
– جەڭىسىڭىزگە سەنىمدى بولدىڭىز با؟
– بارعاندا ابدىراپ قالمايتىنداي قاتىسۋشىلاردى ابدەن زەرتتەدىم. وسىنشاما ەڭبەك, توككەن تەردەن كەيىن جەڭىسكە جەتۋگە ءتيىسپىن دەگەن ماقسات تۇردى الدىمدا. بۇل قيىندىقتاردىڭ بارلىعى جايدان جاي بولىپ جاتپاعانىن ۇعىندىم. اللا تاعالا ادامعا كوتەرە المايتىن سىناق بەرمەيدى. سوندىقتان بۇل كەدەرگىلەر الداعى قۋانىشتى ساتتەردىڭ باستاۋى سەكىلدى بولدى. سپورتشىلار وليمپياداعا دايىندالعانى سياقتى, مەن دە ۇزبەي ىزدەنىس ۇستىندە ءجۇردىم. ادام قيىندىقتاردى جەڭۋ ارقىلى وسەدى. مەنىڭ وسۋىمە وسىنىڭ ءبارى كومەكتەستى دەپ ويلايمىن.
– بايقاۋدا ديماشتىڭ جانكۇيەرلەرى سىزگە دە قولداۋ كورسەتكەن كورىنەدى. ءتىپتى كوجە دە دايىنداپ بەرىپتى...
– ءيا, بۇل ءبىر ومىرىمدەگى ەرەكشە ءسات بولدى. مەن كوبىنە سۇيىق تاماق ىشەمىن, وعان اسقازانىم دا ۇيرەنىپ العان. ۇيىمداستىرۋشىلار قاشانعى ساعان كوجە دايىنداپ بەرسىن. ال ءوزىڭ ساتىپ الىپ ىشەيىن دەسەڭ, وزگە ەلدە ءار ءتۇرلى جاعداي بولۋى ىقتيمال. مۇسىلمان بولعان سوڭ شوشقا ەتى قوسىلعان تاماق ءىشىپ قويامىن با دەپ تە ساقتاناسىڭ. مەن ءوزى تاماققا وتە قاتتى ءمان بەرەمىن. قۋانىشىما وراي, سونداعى ديماشتىڭ جانكۇيەرلەرى كوجە ءپىسىرىپ اكەپ بەردى. ولاردىڭ دەنى – جۋرناليستەر. بايقاۋعا بارماس بۇرىن, ونلاين سۇحبات قۇرعانبىز. ولار مەنىڭ سۇيىق تاماقتى جاقسى كورەتىنىمدى بىلەدى. شىنايى جانكۇيەرلەر دەپ سولاردى ايتسا كەرەك. ءتىپتى ماسكەۋدە مەنى قىدىرتىپ, قالانىڭ كورىكتى جەرلەرىنە اپاردى. بايقاۋ بارىسىندا ءبىزدىڭ كوك تۋىمىزدى ۇستاپ, قولداۋ دا كورسەتتى. بۇل ديماشقا دەگەن ماحابباتىنان تۋعان قۇرمەت دەپ بىلەمىن. ديماشتىڭ ءوزى سياقتى زيالى ادامدار ەكەن. اقجارقىن پەيىلىنە قاراپ ريزا بولاسىڭ. وسى جەردە تاعى قوسا كەتەيىنشى. نەگىزىندە, ديماشتىڭ جانكۇيەرلەرى ادامنىڭ جان-كۇيىن بىردەن تۇسىنەدى. قابىلداۋلارى بولەك, تانىمى دا جوعارى. ءالى كۇنگە حات الماسىپ تۇرامىز. ول ول ما, ديماشتىڭ ارقاسىندا شەتەلدىك تانىمال بلوگەرلەر مەنىڭ ونەرىمدى تالقىعا سالىپ, جاقسى پىكىرلەرىن ءبىلدىرىپ جاتىر. مەن ءۇشىن بۇل – وتە ۇلكەن جەتىستىك.
– ايتپاقشى, بايقاۋدا ديماش ەكەۋىڭىزدىڭ بىرگە تۇسكەن سۋرەتتەرىڭىز الەۋمەتتىك جەلىدە ءبىراز ادامنىڭ قىزىعۋشىلىعىن تۋدىردى. اسىرەسە, قىزداردىڭ. شەتەلدەگى ديماشتىڭ جانكۇيەرلەرى قىزعانىپ قالعان جوق پا؟
– بۇل جاي عانا فوتو. سول قۋانىشتى ساتتەن ەستى ەستەلىك دەسەك تە بولادى. ديماش – ماعان اعالىق قومقورلىق تانىتقان ادام. قارىنداسى رەتىندە قارايدى. ونىڭ كوڭىلى دالاداي, جاستارعا كومەكتەسكەندى جاقسى كورەدى. قالاي دەسەڭىز دە, ول تاريحتا قالاتىن تۇلعا عوي. كۇن سياقتى بارىنە شۋاق شاشىپ تۇرادى. وعان قوسا, قانات اعا مەن سۆەتا اپاي دا ونەر دەسە ىشكەن اسىن جەرگە قوياتىن جاندار ەكەن. دارىندارعا ارقاشان جاردەمدەسۋگە بەيىل. ۆيتەبسكىگە ارنايى كەلىپ, ماعان قولداۋ كورسەتتى.
ء–سىزدىڭ شىعارماشىلىق بەلەسىڭىزگە باعدار جىبەرسەك, «سلاۆيان بازارىنان» دەيىنگى جانە كەيىنگى رۋحيا دەپ ەكىگە ءبولىپ الىپ قاراۋعا بولاتىن سەكىلدى. قازىر پروديۋسەرلەرمەن جۇمىس ىستەپ جاتىرسىز با؟ قانداي جاڭالىقتارىڭىز بار؟
– پروديۋسەر بولۋعا ۇسىنىس جاساعان ادامدار بولدى, بىراق مەن باس تارتتىم. ءدال قازىر ماعان قاجەت ەمەس. ونەر ادامى قۇستاي ەركىن بولۋى كەرەك. جالپى, پروديۋسەردىڭ جۇمىسى انشىگە جارناما جاساۋ, بايقاۋعا دەمەۋشى تابۋ دەگەن سەكىلدى قاعيدالاردان تۇرادى. ال ول نارسە مەندە بار. ەندى تانىمال بولا باستاعاندا دايىن اسقا تىك قاسىق بولۋدىڭ كەرەگى جوق. ءوز شىعارماشىلىعىممەن ءوزىم اينالىسقىم كەلەدى. يمانبەك, Jah Khalib, The Limba سەكىلدى. قازىر مەنىڭ جوبا مەنەدجەرىم – ماقپال جۇماباي. ول كىسى مەنى بايقاۋعا قاتىسپاي تۇرىپ تا ۇدايى قولداپ جۇرەتىن.
بۇگىندە ۇتقان جۇلدەمدى جەكە شىعارماشىلىعىما جۇمساپ جاتىرمىن. بىرنەشە ءان ساتىپ الدىم. حالىق ىشىندە مەنىڭ داۋىسىمدى «ديماشتىڭ قىز ءتۇرى» دەگەن اڭگىمە بار. ونىڭ ۇنىنە قاتتى ۇقساتادى. مەن ءوزىمنىڭ جەكە باعىتىمدى تاڭداپ, ءوز اۋديتوريامدى جيناۋىم كەرەك. ياعني وزىندىك قولتاڭبامدى قالىپتاستىرعىم كەلەدى. ارينە, بۇعان ۋاقىت قاجەت. سول ءۇشىن ايانباي ەڭبەك ەتەمىن.
– ءسىز مىسالعا العان انشىلەر – الەمگە تانىمال ونەرپازدار. ولار بىزدەگى ونەر كەڭىستىگىنە سىيماي كەتتى. سىزگە دە وسى شارتتىلىقتار بوگەت بولادى دەپ ويلامايسىز با؟
– شىن نيەتتەنسەڭ, الداعى وتكەلدەردىڭ بارىنەن اتتاۋعا بولادى. مەنىڭ وعان كوزىم انىق جەتتى. ءبىزدىڭ ەلدە تالانت كوپ, تەك تانىلماي جاتىر. قاراڭىزشى, مەنى باسىندا جۇمىسقا المادى. «تولىقسىڭ» دەپ ساحنادان شەتتەتكەندەر دە بولدى. قازىر بارىنە كۇلەمىن. مەن ءىرى بولعانىما كىنالى ەمەسپىن. تالانتتى تانۋ تۇرعىسىنان كەلگەندە, تامىر-تانىس, اعايىن-تۋىس ورتاعا تۇسەدى. ءسويتىپ, شىن مىقتىلار كوزگە ىلىنبەي قالادى. وسى جاعىمسىز دۇنيەلەردەن قۇتىلساق, ءبىزدىڭ ونەرىمىز ودان ءارى تانىلار ەدى.
– اڭگىمە بارىسىندا اكەڭىز ءانشى بولعانىڭىزدى قالاماعانىن ايتتىڭىز. اتا-اناڭىزدىڭ ءسىز جايلى ءوز جوسپارى بولعان بولىپ تۇر عوي...
– ءان مەنىڭ ءومىرىمدى تۇبەگەيلى وزگەرتتى. ەگەر ءانشى بولماعانىمدا اسپازشى بولار ەدىم. اكەم گرانتقا وقۋعا تۇسپەگەنىمدە, تالدىقورعاندا قالىپ, اسپازدىڭ وقۋىن وقيسىڭ دەگەن بولاتىن. قۇداي بۇيىرتىپ, استاناعا كەتىپ قالدىم. ءالى ەسىمدە, 2-سىنىپتان باستاپ تاماق ىستەي باستادىم. ءبىر كۇنى ۇيگە قوناقتار كەلىپ, انامنىڭ قولى بوساماي جاتتى. ال اكەمنىڭ جۇمىستان قايتاتىن ۋاقىتى تاياپ قالدى. ءبىزدىڭ ۇيدە كەشكى تاماق 5-كە دەيىن دايىن بولۋى كەرەك. اكەم سول ۋاقىتتا جۇمىستان كەلەدى. ەرتەرەك تاماعىمىزدى ءىشىپ, ەرتەرەك ۇيىقتاۋ – كۇندەلىكتى ادەتىمىز. انامنىڭ اڭگىمەدەن قولى بوسار ەمەس. اكەمنىڭ قىزىمىن دەپ ايتتىم عوي باعانا, اس بولمەگە كىرىپ, كارتوپ قۋىرۋعا كىرىستىم. اكەم تاماققا وتە تالعامپاز ادام, تاڭداپ قانا جەيدى. ەڭ عاجابى, العاشقى دايىنداعان اسىم ءدامدى بولىپ شىقتى. اكەم ريزا بولدى. ءسويتىپ, 9-سىنىپقا دەيىن ۇيگە قوناق كەلسە, مەن اس ازىرلەيتىن بولدىم. ءتىپتى جاتاقحاناداعى قىزدار «رۋحيانىڭ قاسىنا تاماق ءۇشىن تۇرۋعا بولادى» دەپ ازىلدەيدى. شىنى كەرەك, قازىر ءوزىم دايىنداعان تاماقتى ساعىنىپ ءجۇرمىن. ۋاقىت وتە تىعىز, ۇشىپ-قونىپ جۇرەمىز.
– الداعى جوسپارىڭىزدى بولىسسەڭىز؟
– بۇيىرسا, اندەر جازىپ, بەينەكليپتەر ءتۇسىرۋ جوسپارىمدا بار. جاڭا جوبالار, جاڭا بايقاۋلار ىزدەپ ءجۇرمىن. ءوزىمدى جاڭا قىرىمنان تانىتقىم كەلەدى. جاقىندا قىرعىزستاندا ونەر كورسەتەمىن. اللاعا شۇكىر, مينيسترلىك قولداۋ كورسەتىپ, كونتسەرتتەرگە قوسىپ جاتىر. مەنىڭ ارمانىم بىرتىندەپ ورىندالىپ كەلەدى.
– اڭگىمەڭىزگە راحمەت.
اڭگىمەلەسكەن
مۇحتار كۇمىسبەك,
«Egemen Qazaqstan»
