جەرگىلىكتى ءوزىن-ءوزى باسقارۋدى جاڭا تۇجىرىمداماسى بەكىتىلدى

قۇجاتقا سايكەس, قازاقستاندا جەرگىلىكتى ءوزىن-ءوزى باسقارۋدى دامىتۋ جانە ونىڭ ورگاندارىنىڭ قىزمەتى مىناداي قاعيداتتارعا نەگىزدەلەدى:

1) ازاماتتاردىڭ جەرگىلىكتى ماڭىزى بار ماسەلەلەر بويىنشا شەشىمدەر قابىلداۋ پروتسەسىنە قاتىسۋى جانە ولاردىڭ ورىندالۋىن باقىلاۋدى جۇزەگە اسىرۋ ءۇشىن جاعدايلاردى قامتاماسىز ەتۋ;

2) حالىقتىڭ پىكىرىن ەسكەرۋ;

3) جەرگىلىكتى ءوزىن-ءوزى باسقارۋ ورگاندارىنىڭ سايلانبالىعى;

4) زاڭدىلىق;

5) جەرگىلىكتى ءوزىن-ءوزى باسقارۋ ورگاندارىنىڭ جەرگىلىكتى حالىق الدىنداعى بۇكپەسىزدىگى, اشىقتىعى جانە ەسەپتىلىگى;

6) جەرگىلىكتى ءوزىن-ءوزى باسقارۋ ورگاندارىنىڭ ۇيىمداستىرۋشىلىق, ەكونوميكالىق جانە قارجىلىق دەربەستىگى;

7) جەرگىلىكتى ءوزىن-ءوزى باسقارۋ جانە مەملەكەتتىك باسقارۋ ورگاندارىنىڭ فۋنكتسيالار مەن وكىلەتتىكتەردىڭ اراجىگىن اجىراتۋ, ەلدىڭ قالالىق جانە اۋىلدىق ەلدى مەكەندەرىن دامىتۋ ءۇشىن ىنتىماقتاستىعى مەن ءوزارا جاۋاپكەرشىلىگى نەگىزىندە ءوزارا ءىس-قيمىل جاساۋى;

8) جەرگىلىكتى ماڭىزى بار ماسەلەلەردى شەشۋ كەزىندە جالپى مەملەكەتتىك مۇددەلەردى ساقتاۋ;

9) مەملەكەت تاراپىنان جەرگىلىكتى ءوزىن-ءوزى باسقارۋدى قولداۋ.

نەگىزگى كۇتىلەتىن ناتيجەلەر:

1) 2023 جىلى - جەرگىلىكتى ءوزىن-ءوزى باسقارۋ ساپاسىنداعى قوعامدىق قاتىناستاردى, جەرگىلىكتى ءوزىن-ءوزى باسقارۋ ورگاندارىن قۇرۋ جانە ولاردىڭ قىزمەتى ماسەلەلەرىن رەتتەيتىن "قازاقستان رەسپۋبليكاسىنداعى جەرگىلىكتى ءوزىن-ءوزى باسقارۋ تۋرالى" قازاقستان رەسپۋبليكاسىنىڭ زاڭىن قابىلداۋ;

2) 2021 جىلدىڭ ەكىنشى جارتىجىلدىعىنان 2025 جىلدىڭ ءبىرىنشى جارتىجىلدىعىنا دەيىن - اۋىلدىق وكرۋگتەردىڭ 2,5 مىڭ اكىمىن 2021

2025 جىلدار ىشىندە جەرگىلىكتى تۇرعىنداردىڭ تىكەلەي داۋىس بەرۋى ارقىلى قايتا سايلاۋ;

3) 2024 جىلدان باستاپ - بارلىق اۋىلدىق وكرۋگتەردە وكىلدى ورگاننىڭ كەڭەستىڭ جۇمىس ىستەۋى;

4) 2022 جىلى - بارلىق دەڭگەيدەگى ءماسليحاتتاردى وتىرىستاردىڭ ونلاين-ترانسلياتسياسىمەن قامتۋ;

5) 2024 جىلدان باستاپ - وبلىستاردا اۋدان اكىمدەرىن تىكەلەي سايلاۋدى ەنگىزۋ;

6) 2025 جىلعا قاراي جەرگىلىكتى ءوزىن-ءوزى باسقارۋ ورگاندارىنىڭ ينتەرنەت-رەسۋرستارىن قۇرۋ;

7) 3,5 مىڭ اۋىلدىق ەلدى مەكەندە (تىرەك جانە سپۋتنيكتىك) ينفراقۇرىلىمدى وڭىرلىك ستاندارتتاردىڭ پارامەترلەرىنە دەيىن جەتكىزۋ.

جوعارىدا كورسەتىلگەن شارالاردى ىسكە اسىرۋ 2025 جىلعا قاراي وڭىرلەردىڭ اۋماقتىق, ەكونوميكالىق, الەۋمەتتىك جاعدايلارىنا سايكەس كەلەتىن, سونداي-اق تۇرعىندار مەن تۇتاس مەملەكەتتىڭ مۇددەلەرىنە جاۋاپ بەرەتىن جەرگىلىكتى ءوزىن-ءوزى باسقارۋدىڭ جاڭا مودەلىن قالىپتاستىرۋعا مۇمكىندىك بەرەدى.