سپورت • 23 تامىز، 2021

باستى ماقسات – ەل ءۇمىتىن اقتاۋ

53 رەت كورسەتىلدى

ەرتەڭ جاپونيانىڭ باس شاھارى – توكيودا XVI جازعى پاراليمپيا ويىندارىنىڭ جالاۋى جەلبىرەيدى. تورتجىل­دىقتىڭ باستى دوداسىندا ەلىمىزدىڭ اتىنان 25 سپورتشى 7 سپورت تۇرىنەن سىنعا تۇسەدى. بۇل – قازاقستاننىڭ پاراليمپيادا تاريحىندا ەڭ كوپ سپورتشى قاتىساتىن ويىنى بولماق. ەنشى­مىزدەگى 25 جولدامانىڭ التاۋىن پارا دزيۋدوشىلارىمىز جەڭىپ العان. سپورتتىڭ بۇل تۇرىمەن كورۋ قابىلەتى ناشار نەمەسە كوزى كورمەيتىن سپورتشىلار اينالىسادى.

توكيو تورىندەگى تاتاميدە قا­­­زاقستان قۇراماسىنان حالىق­ارا­لىق دودالاردىڭ جەڭىم­پاز­دا­رىنان قۇرالعان ەلىمىزدىڭ ەڭ مىق­تى دەگەن بالۋاندارى التىن جۇل­دە ءۇشىن بەلدەسەدى. اتاپ ايتار بولساق، ەرلەر باسەكەسىن­دە 73 كيلو سالماقتا بىلتىر گرۋ­زيا استاناسى – تبيليسيدە وت­كەن الەم كۋبوگىنىڭ جەڭىم­پا­زى – داۋلەت تەمىرجان، ريو پا­را­ليمپياداسىنىڭ قاتىسۋ­شىسى – ءانۋار ساريەۆ (60 كگ) جانە ع­الىمجان سماعۇل ۇلى (81 كگ) بەل­دەسسە، قىزدار اراسىنداعى بەل­دەسۋدە ءتۇرلى حالىقارالىق جارىس­تاردىڭ جۇلدەگەرلەرى – جانبوتا امانجول (90 كگ)، دايانا فەدوسوۆا (57 كگ) جانە زارينا بايباتينا (+70 كگ) ەل نامىسىن قورعايدى.

پارا دزيۋدودان ۇلتتىق قۇرا­ما كومانداسىنىڭ باس جاتتىق­تىرۋشىسى جاندوس قيانوۆ پا­را­­ليمپيا ويىندارىندا ءار شا­كىر­تى­نەن زور ءۇمىت كۇتەتىنىن جەتكىزدى.

– ءبىزدىڭ باستى ماقساتى­مىز – پاراليمپيا ويىندارىندا قا­زاق­ستان تۋىن كوككە كوتەرىپ، ەلىمىز­دىڭ ءانۇرانىن شىرقاتۋ. جالپى، پاراليمپياداعا جولداما الۋدىڭ جانە وعان قاتىسۋدىڭ ءوزى ۇلكەن مارتەبە. وسى ويىندارعا جولداما الۋ ءۇشىن سپورتشىلارىمىز تالاي سىنداردان ءوتىپ، بىرقاتار بايراقتى دودادا وزدەرىنىڭ مىقتىلىقتا­رىن دالەلدەدى. شاكىرتتەرىمنىڭ تەك وسى جىلعى جەتىستىكتەرىن ايتار بولسام، جانبوتا امان­جول، عالىمجان سماعۇل ۇلى جانە دايانا فەدوسوۆا ۇلىبريتانيادا وت­كەن گران-پري جارىستارىنا قاتى­­سىپ، جۇلدەلى ورىندارعا يە بول­دى. باكۋ (ازەربايجان) قالاسىن­دا وتكەن گران-پري كەزەڭىندە ءانۋار ساريەۆ پەن جانبوتا امان­جول ۇزدىك ونەر كورسەتىپ، جارىستىڭ قولا جۇلدەلەرىن جەڭىپ الدى. ال زارينا بايباتينا مەن عالىمجان سماعۇل ۇلى انتاليا (تۇركيا) قالاسىندا وتكەن حالىقارالىق تۋرنيردەن التىن جانە كۇمىس ­مەدال ولجالاپ، ەلگە ابىرويمەن ورالدى. بۇل تەك وسى جىل­دىڭ ىشىندەگى ءىرى جەتىستىكتەردىڭ ءبىر پاراسى عانا. بۇعان دەيىنگى جەتىس­تىكتەرىمىز دە جەتىپ جاتىر. سون­دىقتان الداعى پاراليم­پيا ويىندارىندا باق سىنايتىن شاكىرتىمنىڭ ارقايسىسىنا ارتاتىن ءۇمىتىم زور، – دەيدى باس جاتتىقتىرۋشى.

پارا دزيۋدو قازاقستان قۇرا­ما كومانداسى توكيو-2020 پارا­ليمپيا ويىندارىنا تىڭعىلىق­تى دايىندالدى. سپورتشىلارى­مىز سوڭعى دايىن­دىعىن الدى. قازىرگى تاڭدا سپورت­شىلاردىڭ دەنساۋلىعىنا ەرەكشە كوڭىل ءبولىنىپ، سانيتاريا تالاپتارىن قاتاڭ ساقتالۋدا.

– قازىرگى تاڭدا پارا دزيۋدو بارلىق ەلدە قارقىندى دامىپ كەلەدى. سوندىقتان ەشقانداي ەلدى ءبولىپ-جارىپ اتاي المايمىن. جالپى پاراليمپيا ويىندارىنا الەمدىك رەيتينگ بويىنشا ەڭ مىقتى دەگەن سپورتشىلار عانا قاتىساتىنى بەلگىلى، ولاردىڭ وسالى جوق. دودا تارتىستى بولارى ءسوزسىز. ەڭ باستىسى ءبىزدىڭ سپورتشىلار ەشكىمنەن دە كەم ەمەس جانە جوسپار بويىنشا جاقسى دايىندالىپ جاتقاندىعىن عانا ايتا الامىن، – دەيدى جاندوس قيانوۆ.

كەيىنگى جىلدارى ەلىمىزدە پا­را دزيۋدو سالاسى قارقىندى دامىپ كەلەدى. قازىر ۋاقىتتا پارا دزيۋدومەن ەلىمىزدىڭ 11 وبلىسى مەن 3 قالاسىنداعى 100-دەن استام سپورتشى دايىندالىپ ءجۇر. سپورتشىلاردىڭ جەتىستىكتەرى اۋىز تولتىرىپ ايتارلىقتاي. مى­سالى، قازاقستان پارا دزيۋدو قۇراما كومانداسى 2017 جىلى تاشكەنت (وزبەكستان) قالاسىن­دا وتكەن ازيا چەمپيوناتىنىڭ جانە 2018 جىلى دجاكارتادا وتكەن ازيا پارا ويىندارىنىڭ قولا جۇلدەگەرى اتاندى. ال 2019 جىلعى ازيا چەمپيوناتىنىڭ كوماندالىق ەسسەپپەن العاندا جەڭىمپاز اتانىپ، باس جۇلدەگە قول جەتكىزدى.

سونداي-اق ەلدەگى پارا دزيۋ­دو سپورتىنىڭ دامۋىن پارا­ليم­پيادا ويىندارىندا جەڭىپ العان جولداما سانى ارقىلى دا بايقاۋعا بولادى. ماسەلەن، 2016 جىلى ريودا وتكەن پاراليمپيا ويىندارىندا 2 بالۋانىمىز ونەر كورسەتكەن بولسا، بيىلعى توكيو ويىندارىنا 6 بالۋان جولداما الدى.

ايتا كەتەيىك، بيىل قازاقستان تاۋەلسىز ەل رەتىندە التىنشى رەت پارا­ليمپياداعا قاتىسادى. 24 تامىز بەن 5 قىركۇيەك ارا­لىعىندا وتەتىن XVI جازعى پارا­ليمپيا ويىندارىندا قازاقستان قۇراماسىنان 25 پاراسپورتشى سپورتتىڭ 7 ءتۇرى بويىنشا ەل نامىسىن قورعايدى. قازاقستاندىق سپورتشىلار توكيو-2020 پارا­ليمپيا ويىندارىنا جۇزۋدەن – 7، دزيۋدودان – 6، پاۋەرليفتينگتەن – 5، تاەكۆوندودان – 3، جەڭىل اتلەتيكادان – 2 جانە كانوە مەن نىسانا كوزدەۋدەن ءبىر-ءبىر جولداما جەڭىپ العان بولاتىن.

بۇعان دەيىن جازعى ويىندارعا قازاقستان قۇراماسىنان 1996 جىلعى اتلانتا پاراليم­پيا­دا­سىنا – 12، 2000 جىلعى سيد­نەيدەگى دوداعا – 2، افينىداعى (2004) باسەكەگە – 8، بەيجىڭگە (2008) – 3، لوندونعا (2021) – 7 جانە 2016 جىلعى ريو-دە-جانەيروداعى ويىندارعا – 10 سپورتشىمىز بارعان ەدى. وسى پارا­ليمپيا ويىندارىنداعى ال­عاشقى جۇلدەمىز ءدال وسى ريو تو­رىندەگى باسەكەدە تۇسكەن بولا­تىن. سول جىلى جۇزۋدەن زۋل­فيا گابيدۋلينا چەمپيون اتانسا، پاۋەرليفتينگتەن راۋشان قوي­شىباەۆا كۇمىس جۇلدەگە يە بولدى.

توكيوداعى ويىننىڭ اشىلۋ سالتاناتىندا قازاقستاننىڭ كوك تۋىن تاەكۆوندودان ەكى دۇر­كىن الەم چەمپيونى، ءۇش دۇركىن ازيا چەمپيونى جانە ەكى دۇركىن ەۋروپا چەمپيونى نۇرلان دوم­باەۆ پەن پاۋەرليفتينگتەن ريو پارا­ليم­پياداسىنىڭ كۇمىس جۇل­دەگەرى راۋشان قويشىباەۆا كوتەرىپ شى­­عادى.

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

ۇقساس جاڭالىقتار