بۇل تۋرالى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى عاني بەيسەمباەۆ ورتالىق كوممۋنيكاتسيالار قىزمەتىندە وتكەن پەداگوگتەردىڭ رەسپۋبليكالىق تامىز كونفەرەنتسياسىنىڭ پلەنارلىق سەسسياسىندا مالىمدەدى.
«ى.التىنسارين اتىنداعى ۇلتتىق ءبىلىم اكادەمياسى پەداگوگتەرگە كومەك رەتىندە جازعى مەكتەپتى ۇيىمداستىرۋ بويىنشا ادىستەمەلىك ازىرلەنىمدەر دايىندادى جانە قوسىمشا ونلاين جازعى مەكتەپ جۇمىسىن ۇيىمداستىردى. وسى ورايدا نەگىزگى 7 وقۋ ءپانىنىڭ (قازاق ءتىلى, اعىلشىن ءتىلى, ماتەماتيكا, قازاقستان تاريحى, حيميا, فيزيكا) كۇردەلى تاقىرىپتارى بويىنشا 24 ونلاين-ساباق ازىرلەپ, YouTube ارناسىنا جۇكتەدى. بۇگىنگى كۇنى جالپى كورىلىم سانى 25 مىڭنان استى. سونداي-اق, تامىز كونفەرەنتسياسى اياسىندا 9700 باستاۋىش مۇعالىمدەرىنە كۇردەلى تاقىرىپتاردى ءتۇسىندىرۋ بويىنشا 6 سەمينار وتكىزىلدى», دەدى تامىز كونفەرەنتسياسىنىڭ پلەنارلىق سەسسياسىندا ع.بەيسەمباەۆ.
سوندىقتان اكادەميا عالىمدارى جاڭا وقۋ جىلىندا دا وسى جۇمىستى جالعاستىرىپ, وسى باعىتتا عىلىمي زەرتتەۋ جۇرگىزۋدى جوسپارلاپ وتىر.
«كوۆيدتەن كەيىنگى كەزەڭدە وقىتۋ پروتسەسىن بەيىمدەۋ ءۇشىن وقۋشىلاردىڭ بىلىمىندەگى كەمشىن تۇستارىنداعى ولقىلىقتاردىڭ ورنىن تولتىرۋ ءوز جالعاسىن بەرەدى. اتاپ ايتقاندا, ساباقتىڭ 45 مينۋت ۇزاقتىعى قايتارىلادى, مۇعالىمدەردىڭ ساباق جۇكتەمەسى 18 ساعاتتان 16 ساعاتقا دەيىن ازايتىلادى, بيىلعى وقۋ جىلى دا «جازعى مەكتەپ» جۇمىسى ۇيىمداستىرىلادى», دەدى عاني بەيسەمباەۆ.
