بۇگىندە ەلوردادا كوروناۆيرۋسقا قارسى ۆاكتسينانىڭ ءبىرىنشى كومپونەنتىن 381 مىڭنان اسا ادام الدى, ال 300 مىڭنان اسا ازامات تولىق يممۋنداۋدان ءوتتى. الدىڭعى كورسەتكىشتەرگە قاراعاندا ۆاكتسينا سالدىرۋ پروتسەسىندە ايتارلىق ىلگەرىلەۋ بار. دەگەنمەن نۇر-سۇلتان قالاسى ۆاكتسينالاۋ قارقىنى بويىنشا باسقا وڭىرلەردەن كوش كەيىن قالىپ وتىر.
قازىرگى كەزدە استانادا تۇرعىندار ءۇشىن ۆاكتسينانىڭ ءۇش ءتۇرى قولجەتىمدى. بۇل – قازاقستاندىق QazVac, قىتايلىق Sinopharm فارمكومپلەكسىنىڭ Vero Cell جانە رەسەيلىك سپۋتنيك V ۆاكتسينالارى. ازاماتتار قولدا بار ءۇش ۆاكتسينانىڭ ءبىرىن تاڭداي الادى. ەگۋ پۋنكتتەرىندەگى بارلىق ۆاكتسينا جەتكىلىكتى مولشەردە بار.
بۇل رەتتە قالالىق دەنساۋلىق ساقتاۋ باسقارماسى ازاماتتارعا ەكىنشى كومپونەنتتى الۋدا پروبلەمالىق جاعدايلاردى بولدىرماس ءۇشىن ەكپەنىڭ ەكى كەزەڭىن دە ءبىر پۋنكتە وتۋگە كەڭەس بەردى. ء«بىز ازاماتتاردان ۆاكتسينانىڭ ءبىرىنشى جانە ەكىنشى كومپونەنتىن ءبىر پۋنكتە الۋدى سۇرايمىز. مىسالى, ءبىرىنشى دوزانى الۋ ءۇشىن ءسىز بەلگىلى ءبىر ەمحاناعا نەمەسە ساۋدا ورتالىعىنا بارساڭىز, ەكىنشى دوزانى دا ۆاكتسينالاۋ اراسىنداعى ارالىقتى ساقتاي وتىرىپ, سول جەردەن الۋدى ۇسىنامىز», دەلىنگەن اتالعان باسقارمانىڭ حابارلاماسىندا.
جالپى, ەلوردادا 100-گە جۋىق كوروناۆيرۋس ينفەكتسياسىنا قارسى ەگۋ پۋنكتى تاڭعى 8.00-دەن كەشكى 10.00-عا دەيىن جۇمىس ىستەپ تۇر.
سونىمەن قاتار نۇر-سۇلتاندا Ashyq جوباسى كوشباسشىلارىنىڭ ءتىزىمى جاڭارتىلدى. قازىرگى ۋاقىتتا 159 مەكەمە قوسىمشا جەڭىلدىكتەر بەرەتىن ەكى اپتالىق ستاتۋسقا يە بولدى. جوبا كوشباسشىلارىنىڭ ءتىزىمىن قالا اكىمدىگى Ashyq جوباسىنا قاتىساتىن نىسانداردا (ەكى اپتالىق كەزەڭدە) QR-كود ارقىلى تىركەلگەن كەلۋشىلەردىڭ مالىمەتى نەگىزىندە قالىپتاستىرادى. وسى ورايدا «Ashyq كوشباسشىسى» ستاتۋسىن العان جوبا قاتىسۋشىسى «قىزىل ايماقتا» ورنالاسسا, «سارى ايماقتىڭ» شارتتارى بويىنشا, ال «سارى ايماقتا» «جاسىل ايماقتىڭ» شارتتارى بويىنشا جۇمىس ىستەي الاتىنىن ايتا كەتكەن ءجون. «جاسىل» جانە «قويۋ قىزىل» ايماقتارداعى جوبا قاتىسۋشىلارىنا جۇمىس ءتارتىبى قوسىمشا 2 ساعاتقا ۇزارتىلادى, سونداي-اق نىساننىڭ تولتىرىلۋى 10%-عا ارتادى.
ۆاكتسينانىڭ ءبىرىنشى كومپونەنتىن قىزمەتكەرلەردىڭ كەمىندە 90%-ى العان جاعدايدا, سوڭعى 3 اي ىشىندە مەديتسينالىق قارسى كورسەتىلىمدەرى بار ادامداردى, اۋىرىپ جازىلعان ادامداردى ەسەپكە الماعاندا نىساننىڭ تولتىرىلۋى 20%-عا كوبەيەدى. اتالعان جوباعا قاتىسۋشىلار سانيتارلىق نورمالاردى تولىقتاي ساقتاۋى ءتيىس. ەگەر كارانتين تالاپتارى بۇزىلسا تىزىمنەن شىعارىلادى.
