وتكەن اپتا سوڭىندا مەديتسينالىق مەكەمەلەر ىندەتتىڭ تارالۋىن توقتاتىپ, جۇقتىرۋدىڭ الدىن الۋ باعىتىنداعى دايارلىعىن پىسىقتاۋ ءۇشىن وبلىس اكىمى گۇلشارا ابدىقالىقوۆا جاڭادان اشىلعان ءمودۋلدى جۇقپالى اۋرۋحاناعا باردى. كوروناۆيرۋسپەن كۇرەسىپ جۇرگەن دارىگەرلەرمەن پىكىرلەسىپ, جانساقتاۋ بولىمىندە جاتقان ازاماتتاردىڭ جاعدايىن ءبىلدى.
ۇكىمەتتىڭ قولداۋىمەن 200 توسەك-ورىنعا ارنالعان مودۋلدىك ستاتسيونار وتكەن اپتادان باستاپ ناۋقاستاردى قابىلداي باستادى. جاڭا ەمدەۋ مەكەمەسىندە ناۋقاستارعا قاجەتتى ءدارى-دارمەك تولىق جەتكىلىكتى, مامانداردىڭ جۇمىس رەجىمى جولعا قويىلعان.
وبلىس اكىمى ەم الۋشىلارمەن اڭگىمە بارىسىندا سوڭعى كۇندەرى ۆيرۋستىڭ جاڭا شتامدارىنىڭ پايدا بولۋى سەبەپتى ىندەتتەن ساقتانۋ امالدارىنا جەتە ءمان بەرۋدى, قورعانۋدىڭ توتە جولى ۆاكتسينا الۋعا شاقىردى.
– كوروناۆيرۋسپەن كۇرەسكە وبلىستىق مەديتسينالىق ۇيىمدار تولىعىمەن دايىن. ءدارى-دارمەك قورى, مەديتسينالىق قۇرال-جابدىقتار جەتكىلىكتى. بىراق ۆيرۋستىڭ جاڭا شتامدارى جىلدام تارالىپ, ءتۇرلى وزگەرىسكە ءتۇسىپ جاتقانى ءبارىمىزدى الاڭداتىپ وتىر. كەشە عانا اقش-تىڭ نيۋ-يورك قالاسىندا جاڭادان «يوتا» شتامى ءبىلىندى. وسىعان بايلانىستى ۆاكتسينالاۋ جۇمىستارىن قارقىندى تۇردە كۇشەيتۋىمىز كەرەك. توي-جيىن مەن ءداستۇرلى شارالاردان تىيىلىپ, دەرتتى جۇقتىرىپ الماۋدىڭ امالىن جاساۋىمىز كەرەك. بالالاردىڭ قاۋىپسىزدىگى, جاقىندارىمىزدىڭ ساۋلىعى ءۇشىن وبلىس تۇرعىندارىن ەكپە الۋعا شاقىرامىن. ءاربىرىمىز جاۋاپكەرشىلىكتى سەزىنسەك, قاي قيىندىقتىڭ دا قۇرساۋىنان امان شىعارىمىزعا سەنىمدىمىن, – دەدى وبلىس اكىمى.
ايماقتا ماۋسىم-شىلدە ايلارىندا ينفەكتسيالىق توسەك-ورىن سانى 585-تەن 2 340-قا دەيىن, ال رەانيماتسيالىق توسەك-ورىن 90-نان 172-گە دەيىن كوبەيتىلىپ, قازىر جۇكتەمە 55 پايىزدى قۇراپ وتىر. رەزەرۆتىك توسەك-ورىن سانىن قوسقاندا 3 200 توسەك-ورىن ازىرلەندى.
وبلىس اكىمى دەنساۋلىق ساقتاۋ باسقارماسىنىڭ باسشىسى ءسابيت پازىلوۆقا ۆيرۋستىڭ تارالۋ دەڭگەيىن تۇراقتى باقىلاۋعا الىپ, الگوريتمگە سايكەس قاجەتتى شارالاردى دەر كەزىندە قابىلداۋدى تاپسىردى. وسى جۇمىستارمەن قاتار, تۇرعىنداردى ۆاكتسينا الۋعا شاقىرۋ, ىندەتتىڭ تارالۋىن تەك ەكپە عانا توقتاتاتىنىن ناسيحاتتاۋ ءبىر ساتكە دە باسەڭدەمەۋى كەرەكتىگىن اتاپ ايتتى.
قىزىلوردا
