جول اپاتى 17 تامىز كۇنى ساعات 08.00-دە جەلاەۆ جولىندا بولعان. «ۆاز-2112» جانە «لادا گرانتا» اۆتوكولىكتەرى سوقتىعىستى.
وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى ايناگۇل ساقپوسىنوۆانىڭ ايتۋىنشا, جول اپاتى سالدارىنان 5 ادام زارداپ شەكتى. جەڭىل دەنە جاراقاتىن العان 11 جاستاعى قىز, 24 جانە 27 جاستاعى جىگىتتەر وبلىستىق اۋرۋحاناعا جەتكىزىلدى. دارىگەرلەر ءتيىستى كومەك كورسەتىپ, امبۋلاتورياعا جىبەردى. 13 جاستاعى قىز بالا وبلىستىق كوپبەيىندى بالالار اۋرۋحاناسىنا جەتكىزىلدى. 44 جاستاعى ايەل باس پەن ميدىڭ جابىق جاراقاتىن الىپ, توبىعى سىنعان. ول وبلىستىق اۋرۋحانانىڭ تراۆماتولوگيا بولىمشەسىنە جاتقىزىلدى. جاعدايى ورتاشا اۋىر.
تۇسكە قاراي جول اپاتىنىڭ تاعى ءبىر وقيعاسى انىقتالدى. ساعات 10.56-دا اباي جانە ن.نازارباەۆ داڭعىلدارىنىڭ قيىلىسىندا №2 باعىتپەن كەلە جاتقان «ماز» اۆتوبۋسى بۇرىلۋ كەزىندە «اۋدي» اۆتوكولىگىنە سوعىلدى.
20 جاستاعى «اۋدي» جۇرگىزۋشى قارسى باعىتتا كەلە جاتقان. سالدارىنان اۆتوبۋس جولاۋشىسى جەڭىل جاراقات الىپ, وبلىستىق اۋرۋحاناعا جەتكىزىلدى.
اتالعان فاكتى بويىنشا قر اكىمشىلىك قۇقىقبۇزۋشىلىق كودەكسى 610-بابىنا سايكەس حاتتاما تولتىرىلدى.
