«2021 جىلدىڭ جەلتوقسانىندا «الەۋمەتتىك ءاميان» جوباسىنىڭ پيلوتتىق نۇسقاسىن ەنگىزۋ جوسپارلانىپ وتىر. 2022 جىلدان باستاپ ەلەكتروندى اقشا تۇرىندەگى جاردەماقىلار مەن الەۋمەتتىك تولەمدەردى كەزەڭ-كەزەڭمەن «الەۋمەتتىك اميانعا» اۋدارۋ جوسپارلانعان», دەپ حابارلادى ۆەدومستۆونىڭ ءباسپاسوز قىزمەتى.
2020 جىلدىڭ 1 قىركۇيەگىندە قاسىم-جومارت توقاەۆ حالققا ارناعان جولداۋىندا زەينەتاقى مەن جاردەماقى تاعايىنداۋ پروتسەستەرىن بارىنشا تسيفرلاندىرۋدى, سوعان قوسا ءار ازاماتتىڭ اتىنا «الەۋمەتتىك ءاميان» ەنگىزۋدى تاپسىردى.
«الەۋمەتتىك ءاميان» – بانكتىك شوتتىڭ بالاماسى. الەۋمەتتىك ءاميانى بار ازاماتتارعا بانككە بارۋدىڭ, ەسەپشوت اشۋدىڭ قاجەتى جوق. اتاۋلى الەۋمەتتىك تولەمدەر تىكەلەي سول اميانعا اۋدارىلادى. ول ارقىلى بيۋدجەتتەن الەۋمەتتىك باعىتقا بولىنگەن اقشانىڭ قالاي جۇمسالىپ جاتقانىن باقىلاۋعا بولادى.
قازىر بارلىق الەۋمەتتىك تولەم ەكىنشى دەڭگەيلى بانك شوتىنا اۋدارىلادى. «الەۋمەتتىك ءامياننىڭ» ولاردان ارتىقشىلىعى – بانككە جۇگىنۋدىڭ قاجەتى جوق. تسيفرلىق ءاميان قولعا اقشا ۇستاپ ءجۇرۋدى قاجەت ەتپەيدى.
