«پاۆلودار قالاسىنىڭ پاترۋلدىك پوليتسيا باتالونىنىڭ پوليتسەيلەرى تاۋلىك بويى قوعامدىق جانە جول قاۋىپسىزدىگىن قامتاماسىز ەتەدى. سوڭعى تاۋلىك ىشىندە پوليتسەيلەر 103 قۇقىق بۇزۋشىلىق فاكتىسىن انىقتادى, ونىڭ ىشىندە 94-ءى جول قوزعالىسى ەرەجەلەرىن بۇزعانى ءۇشىن, التاۋى ماس كۇيىندە اۆتوكولىكتى باسقارعانى ءۇشىن», دەپ حابارلادى پاۆلودار قالاسى پاترۋلدىك پوليتسيا باتالونى كومانديرىنىڭ مىندەتىن اتقارۋشى التىنبەك مەدياروۆ.
سونداي-اق ول پوليتسيا قىزمەتكەرلەرىنىڭ پروفيلاكتيكالىق جۇمىستار مەن ەسكەرتۋلەردىڭ تۇراقتى جۇرگىزىلۋىنە قاراماستان, ازاماتتار ەرەجەلەرگە قايشى كەلىپ, جولداردا ءتارتىپسىز جۇرەتىنىن ايتتى.
پاترۋلدەۋ كەزىندە ساعات 14.45-تە قىزمەت ينسپەكتورلارى پاۆلودار قالاسىنداعى روزا ليۋكسەمبۋرگ كوشەسىندەگى 102 ءۇيدىڭ اۋلاسىندا ۇلكەن جىلدامدىقپەن كەلە جاتقان Land Cruiser Prado ماركالى اۆتوكولىكتى بايقاعان.
جۇرگىزۋشى ءاۆتوپاترۋلدى كورىپ, جاسىرىنۋعا تىرىسىپ باقتى. تەكسەرۋ بارىسىندا جۇرگىزۋشى ىشىمدىك ىشكەنى انىقتالدى. ءتارتىپ بۇزۋشىنىڭ اۆتوكولىگى ايىپپۇل تۇراعىنا قامالدى, ال جۇرگىزۋشىگە قاتىستى قر اقبك 608-بابى بويىنشا اكىمشىلىك ءىس قوزعالدى.
مامانداندىرىلعان اكىمشىلىك سوتتىڭ قاۋلىسىمەن جۇرگىزۋشى 7 جىل مەرزىمگە كولىك قۇرالدارىن جۇرگىزۋ قۇقىعىنان ايىرىلدى, ەر ادام 1-توپتاعى مۇگەدەك بولعاندىقتان اكىمشىلىك قاماۋعا الۋ قولدانىلمادى.
ەكىنشى جاعدايدا ساعات 00.30-دا پوليتسياعا ەر ادامنان قوڭىراۋ كەلىپ ءتۇستى. ول ۆورۋشين كوشەسىندە ورنالاسقان كافەدەن Hyundai Elantra ماركالى اۆتوكولىك شىعىپ كەتكەنىن, ال ونىڭ جۇرگىزۋشىسى ماس كۇيدە بولعانىن حابارلادى. كولىك توقتاتىلىپ, 34 جاستاعى جۇرگىزۋشى كۋالاندىرىلدى. كۋالاندىرۋ جۇرگىزۋشىنىڭ ورتاشا دارەجەدە ماس كۇيدە ەكەنىن راستادى. ونىڭ كولىگى ايىپپۇل تۇراعىنا قويىلىپ, جۇرگىزۋشىگە قاتىستى قر اقبك 608-بابى بويىنشا اكىمشىلىك ماتەريال جاسالدى.
سوت قاۋلىسىمەن جۇرگىزۋشى جەتى جىل مەرزىمگە كولىك قۇرالدارىن جۇرگىزۋ قۇقىعىنان ايىرىلىپ, 15 تاۋلىك مەرزىمگە اكىمشىلىك قاماۋعا الىندى.
