بۇعان دەيىن جوو-دا تەكسەرۋ جۇرگىزىلىپ, ونىڭ قورىتىندىسى بويىنشا كوميتەت قىزمەتكەرلەرى ءتيىستى تالاپقا ساي ەمەس ءتۇرلى جاعدايلاردى انىقتادى. «اقمەشىت» ينستيتۋتىنا ۇيعارىم بەرىلىپ, وقۋ ورنىنا بارلىق سايكەسسىزدىكتى جويۋعا ۋاقىت بەرىلدى. الايدا جوعارى وقۋ ورنى بەرىلگەن ۋاقىتتى ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن قاجەتتى جۇمىستى جۇرگىزۋ ماسەلەسىنە ەمەس, سوت تالقىلاۋىنا جانە بعم كوميتەتىنىڭ ءىس-ارەكەتتەرىنە شاعىمدانۋعا جۇمساعان.
– جوعارى وقۋ ورىندارىندا تەكسەرۋ جۇمىستارىن ءبىلىم بەرۋ ساپاسى مەن كادرلار دايارلاۋدى جاقسارتۋ ءۇشىن جۇرگىزەتىنىمىزدى ءتۇسىنۋ ماڭىزدى. بۇل رەتتە ءبىز جوو-لاردى ليتسەنزيادان بىردەن ايىرمايمىز جانە ولاردى بىردەن جاپپايمىز. جوعارى وقۋ ورىندارىنا بۇزۋشىلىقتاردى جويۋعا ۋاقىت بەرىلگەنىمەن, ەشقانداي ارەكەت بولعان جوق. وسىعان بايلانىستى ءبىز كەيىنىرەك قاتاڭ شارالار قابىلداۋعا ءماجبۇرمىز. جوعارى وقۋ ورىندارىنىڭ ستۋدەنتتەرى ءۇشىن جاعداي جاساپ, ءبىلىم بەرۋ باعدارلامالارىنىڭ ساپاسىن جاقسارتۋعا قول جەتكىزۋى ماڭىزدى. ايتپەسە, جوسىقسىز ۋنيۆەرسيتەتتەر ساپالى بىلىممەن قامتاماسىز ەتپەي, ديپلوم بەرۋدى جالعاستىرادى. «اقمەشىت» گۋمانيتارلىق-تەحنيكالىق ينستيتۋتىنا كەلەتىن بولساق, سوڭعى تەكسەرۋ وسى جىلدىڭ ماۋسىم ايىندا جۇرگىزىلدى. بۇزۋشىلىقتار جويىلعان جوق. اڭگىمە ماتەريالدىق-تەحنيكالىق بازانىڭ السىزدىگى جانە وقۋ پروتسەسىن ۇيىمداستىرۋداعى ەلەۋلى كەمشىلىكتەر تۋرالى بولىپ وتىر. ينستيتۋتتاعى كەيبىر پاندەردى ءتيىستى ءبىلىمى مەن ءدا-
رەجەسى جوق وقىتۋشىلار جۇرگىزگەن. ءتىپتى وقۋ پروتسەسى مەرزىمىنەن بۇرىن اياقتاپ, ناتيجەسىندە ستۋدەنتتەر ءبىلىم بەرۋ باعدارلامالارىن تولىق يگەرە الماعان. قازىرگى تاڭدا ينستيتۋت وقۋ ورنىن ليتسەنزيادان ايىرۋ تۋرالى قابىلداعان شەشىمىمىزگە نارازىلىق بىلدىرۋگە تىرىسىپ جاتىر», دەدى بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
بۇگىنگى تاڭدا «اقمەشىت» ينستيتۋتىنىڭ ءبىلىم بەرۋ قىزمەتىنە اككرەديتاتسياسى جوق. الايدا ديپلومداردىڭ جارامسىز بولعاندىعىنا قاراماستان, ينستيتۋت ولاردى ءبىلىم جانە عىلىم مينيسترلىگىندە تىركەلگەن سەريالار مەن نومىرلەرسىز بەرگەن.
سوندىقتان ستۋدەنتتەردىڭ نازارىنا جوعارى وقۋ ورىندارى ليتسەنزيادان ايىرىلعان بولسا جانە جوو اككرەديتتەۋدەن وتپەگەن جاعدايدا, ءبىلىم الۋشىلار گرانتتاردى ساقتاي وتىرىپ ءارى يگەرىلگەن كرەديتتەر مەن پاندەردى قايتا تاپسىرىپ, باسقا جوعارى وقۋ ورىندارىنا اۋىسۋعا قۇقىلى ەكەنىنە ايتقىمىز كەلەدى.
وسى جىلدىڭ تۇلەكتەرى باسقا جوعارى وقۋ ورىندارىنا اۋىسا الادى جانە ولاردىڭ وقۋ ناتيجەلەرى ەسكەرىلىپ, ديپلوم بەرىلەدى. بۇل جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارى قىزمەتىنىڭ ۇلگىلىك قاعيدالارىندا كوزدەلگەن.
تالاپكەرلەر مەن اتا-انالاردى جوعارى وقۋ ورنىن تاڭداۋ ماسەلەسىنە مۇقيات بولۋعا شاقىرامىز. وسى رەتتە وقۋ ورنى ۇسىنىپ وتىرعان ءبىلىمنىڭ ساپاسىن, بولاشاقتا جۇمىسقا ورنالاسۋدىڭ پەرسپەكتيۆالارى, جوعارى وقۋ ورنىنىڭ بەدەلى مەن رەيتينگتەگى ورنىن ەسكەرۋ قاجەت. جوو رەيتينگىن مينيسترلىكتىڭ تاپسىرىسى بويىنشا «اتامەكەن» ۇلتتىق كاسىپكەرلەر پالاتاسى وتكىزەدى.
