قازىر كۇشىنە قايتا ءمىنىپ تۇرعان بۇل بالەكەتتىڭ تيگىزىپ جاتقان زاردابى ەسەلەنۋدە. اۋىرعاندار سانى ارتقان سايىن قارالى حابارلار دا جيىلەپ بارادى. ەلىمىزدە كۇنىنە جۇزدەن اسا ادامنان كوز جازىپ قالىپ جاتىرمىز. وكىنىشكە قاراي, قوعامدا وسىنشاما قايعىلى جاعدايلار ورىن الىپ جاتسا دا, ساقتىق شارالارىنا, ۆاكتسينا سالدىرۋعا سەلقوس قارايتىنداردىڭ قاتارى ازايار ەمەس.
دەنساۋلىق ساقتاۋ مينيسترلىگى 6 تامىزداعى مالىمەت بويىنشا تىركەلگەن قايعىلى جاعدايلار سانىن جاريالادى. ەلىمىزدە كوروناۆيرۋستىڭ كەسىرىنەن 122 ادام قايتىس بولدى. پاتسيەنت ءولىمى ەلوردادا كوپ تىركەلگەن. نۇر-سۇلتان قالاسىندا 20 ادام قايتىس بولسا, الماتىدا 19, شىمكەنتتە 18 ناۋقاس كوز جۇمعان. جالپى, ىندەت كەلگەلى بۇگىنگە دەيىن قازاقستاندا 6 764 ادام قايتىس بولدى.
ال كەشەگى دەرەك بويىنشا ەلىمىزدە وتكەن تاۋلىكتە 7 802 ادامنىڭ كوروناۆيرۋس ىندەتىنە شالدىققانى پتر ارقىلى راستالدى. بۇگىندە 111 239 ادام كوروناۆيرۋس ينفەكتسياسىنان ەمدەلىپ جاتىر. ولاردىڭ ىشىندە 30 633 پاتسيەنت ستاتسيوناردا, 80 606 ناۋقاس امبۋلاتوريالىق دەڭگەيدە ەم قابىلداۋدا. اۋىرىپ جاتقان ادامداردىڭ اراسىندا 1 918 ادامنىڭ جاعدايى اۋىر, 405 پاتسيەنتتىڭ جاعدايى وتە اۋىر, 196 ناۋقاس وكپەنى جاساندى جەلدەتۋ اپپاراتىندا جاتىر.
قازىر ەلىمىزدىڭ قاي تۇسىندا بولسىن, جاعداي وڭىپ تۇرعانى شامالى. 8 تامىزداعى ەپيدەميالىق احۋالدى باعالاۋ ماتريتساسى بويىنشا قازاقستاننىڭ وڭىرلەرى تۇگەلگە جۋىق «قىزىل ايماقتا» تۇر. تەك تۇركىستان وبلىسى – «جاسىل ايماقتا». بۇل رەتتە قالعان وڭىرلەردىڭ دە «جاسىل ايماق» قاتارىنا قوسىلۋى ءۇشىن بارلىق شارا جاسالىپ-اق جاتىر. بىراق ءتۇسى سۇيىلۋدىڭ ورنىنا ودان سايىن قويۋلانىپ كەتكەن «قىزىل ايماقتار» بار. بۇگىندە وسىنداي قاۋىپتى تاۋەكەل ايماعىندا ءتورت ءوڭىر تۇر: الماتى, شىمكەنت قالالارى, اتىراۋ جانە قاراعاندى وبلىستارى. بۇل وڭىرلەردە توسەكتىك ورىنداردىڭ اپتالىق قامتىلۋ كورسەتكىشى 100 مىڭ تۇرعىنعا شاققاندا 200 جانە ودان دا جوعارى بولىپ وتىر.
راسىندا, قازىر اۋرۋى اسقىنىپ, توسەككە تاڭىلىپ جاتقان ناۋقاستار كوپ. سوندىقتان ينفەكتسيالىق ستاتسيونارلاردىڭ كوبى ناۋقاستارعا تولىق. وتكەن اپتاداعى دەرەك بويىنشا ەلىمىزدە 52 803 ينفەكتسيالىق توسەكتىك ورىن اشىلعان, ونىڭ 56%-ى بوس بولماي تۇر. شىلدەمەن سالىستىرعاندا كوروناۆيرۋسپەن اۋىرعانداردى ەمدەۋگە تارتىلعان مەديتسينالىق ۇيىمدار سانى 326-دان 339-عا دەيىن ارتىپ, جالپى توسەكتىك ورىن سانى 10 مىڭعا دەيىن ۇلعايدى. ال ينفەكتسيالىق ستاتسيونارلارداعى رەانيماتسيالىق توسەكتىك ورىندار سانى – 4 795, ونىڭ بۇگىندە 46%-ى بوس ەمەس. ستاتسيونارلارداعى جۇكتەمەنى باعالاۋ ماتريتساسىنا سايكەس, توسەكتىك ورىندارمەن قامتۋدىڭ ەڭ كوپ پايىزى – شىمكەنت, نۇر-سۇلتان قالالارىندا, قىزىلوردا جانە قوستاناي وبلىستارىندا. سونداي-اق نۇر-سۇلتان قالاسىندا, ماڭعىستاۋ جانە اتىراۋ وبلىستارىندا رەانيماتسيالىق توسەكتىك ورىنداردا جاتقاندار كوپ. ەپيدەميالىق جاعداي ودان سايىن ۋشىققان جاعدايدا كۆي-دەن ەمدەۋ ءۇشىن قوسىمشا 12 مىڭ ينفەكتسيالىق توسەكتىك ورىن, جوسپارلى مەديتسينالىق كومەكتى توقتاتپاي 5 500
رەانيماتسيالىق توسەكتىك ورىن ورنالاستىرۋعا دايىندىق بار.
ىندەت سالعان وسىناۋ قيىن كۇندەردەن قۇتقاراتىن بىردەن-ءبىر امال جاپپاي ۆاكتسينا سالدىرىپ, ۇجىمدىق يممۋنيتەت قالىپتاستىرۋ ەكەنى تۇسىنىكتى. 8 تامىزداعى مالىمەت بويىنشا قازاقستاندا ءبىرىنشى كومپو-
نەنتپەن 5 727 414 ادام, ەكىنشى كومپونەنتپەن 4 356 279 ادام ۆاكتسينا سالدىردى. ءدال قازىرگى جاعدايدا قوعامنىڭ ساۋلىعىن, بۇتىندىگىن ساقتاۋعا حالىقتىڭ كوپتەپ ۆاكتسينا سالدىرۋى عانا كەپىل بولا الادى. ىندەتتىڭ زالال-زاردابىنىڭ قانشالىقتى اۋىر ەكەنىن كۇن سايىن كوزىمەن كورىپ-ءبىلىپ, سەزىنىپ جۇرگەن دارىگەرلەر تىنىسى تارىلىپ توسەك تارتىپ جاتقانداردىڭ 100 پايىزعا جۋىعى ۆاكتسينا سالدىرماعاندار ەكەنىن زار قاقساپ ايتىپ جاتىر. تۇسىنە بىلگەنگە, جوعارىدا كەلتىرگەندەي, ىندەتتەن كۇنىنە جۇزدەن اسا ادامنىڭ قايتىس بولۋى ونسىز دا حالقى كوپ ەمەس ەلىمىزگە اۋىر سوققى ەكەنى انىق. سوندىقتان جانتالاسىپ جۇرگىزىلىپ جاتقان ىندەتپەن كۇرەس ءىس-شارالارىنا قارسى بولىپ, كەرى تارتىپ, كەجىرلىك كورسەتۋدىڭ قاجەتى جوق.
