فوتو: قالا اكىمدىگىنىڭ ءباسپاسوز قىزمەتى
شتاب وتىرىسىندا دەنساۋلىق ساقتاۋ باسقارماسىنىڭ باسشىسى قالاداعى ەپيدەميولوگيالىق جاعداي تۋرالى بايانداپ, جىل باسىنان بەرى مەگاپوليستە 21 مىڭنان استام ادام كوروناۆيرۋس ينفەكتسياسىن جۇقتىرعانى, 1034 ناۋقاستان پنەۆمونيا انىقتالعانىن اتاپ ءوتتى.
قالا اكىمى ەپيدەميولوگيالىق جاعدايمەن تانىسىپ, ينفەكتسيانىڭ تارالۋى شارىقتاۋ شەگىنە جەتكەنىنە نازار اۋداردى. تۇرعىندار ۆاكتسينا الماسا, جاعداي ۋشىعۋى مۇمكىن ەكەنىن ەسكەرتتى.
ايتا كەتەيىك, قالادا 45 ۆاكتسيناتسيالاۋ ورتالىعى بار, وندا 378 827 ادام ەكپەنىڭ ءبىرىنشى دوزاسىن, 294 352 ادام ەكىنشى دوزاسىن سالدىردى.
قالا باسشىسى ەپيدەميولوگيالىق جاعدايدى جاقسارتۋ ءۇشىن كت, رەنتگەن اپپاراتتارىنىڭ سانىن كوبەيتۋدى جانە قاجەت بولعان جاعدايدا تاۋلىك بويى جۇمىس ىستەۋدى, سونداي-اق ناۋقاستاردى اۋرۋحاناعا جاتقىزۋ ۋاقىتى 15 مينۋتتان اسپاۋىن قاداعالاۋدى تاپسىردى.
م.ايتەنوۆ ۆيرۋس جۇقتىرعان جاعدايدا بەكىتىلگەن حاتتاما اياسىندا ەمدەلۋدىڭ ماڭىزدىلىعىنا توقتالىپ, ءوزىن-ءوزى ەمدەۋدىڭ دەنساۋلىققا وتە قاۋىپتى ەكەنىن اتاپ ءوتتى. سونداي-اق, ءموبيلدى توپتاردىڭ جۇمىسىن كۇشەيتۋ, حالىققا پاتسيەنتتەردى ەمدەۋ تۋرالى دۇرىس اقپارات بەرۋ جانە ولىمگە اكەلىپ سوعاتىن جاعدايلاردى زەرتتەۋ ءۇشىن ارنايى كوميسسيا قۇرىپ, تالداۋدى تاپسىردى.
كەزدەسۋ سوڭىندا قالانىڭ باس دارىگەرلەرى مەن مەديتسينالىق ۇيىم باسشىلارىنا جۇمىستى بەلگىلەنگەن الگوريتم بويىنشا ۇيىمداستىرۋ تاپسىرىلدى.
