ايماقتار • 06 تامىز، 2021

ات قۇلاعىندا وينايتىن قىز

374 رەت كورسەتىلدى

وليمپياداعا قاتىسقاندار قۋانتا الماي ۇنجىرعامىز ءتۇسىپ جۇرگەندە سولتۇستىكقازاقستاندىق اسىل احمەتوۆا دەگەن قىزىمىز اتتىڭ ۇستىندە تۇرەگەپ شاۋىپ، ءبىر سەرپىلتىپ تاستادى. ونىڭ Instagramداعى پاراقشاسىنا بىرنەشە ساعاتتىڭ ىشىندە عانا جازىلۋشىلارىن 15 مىڭعا جەتكىزگەن.

اسىل جامبىل اۋدانىنداعى وزەرنىي اۋىلىنىڭ تۋماسى. كە­زىندە ەربول شايمەردەنوۆ اعا­مىز وسى تۇكپىردەگى اۋىلدىڭ مەكتەبىن كۇمىس مەدالمەن ءبىتى­رىپ، الىستاعى الماتىنى با­عىندىرعان ەدى. «ات اۋناعان جەردە تۇك قالادى» دەگەندەي قى­زىمىزدىڭ قايسارلىعى دا ەلدى ەلەڭ ەتكىزىپ وتىر.

نۇر-سۇلتان قالاسىندا ينفورماتيكا بويىنشا جوعارى ءبىلىم الىپ كەلگەن اسىل اۋىلىن­دا مۇعالىم بولىپ ىستەيدى. الەۋ­مەتتىك جەلىدە اۋىلداعى ءوزىنىڭ ءومىرى تۋرالى جازىپ، روليكتەر ءتۇسىرىپ، سالىپ تۇرادى. مەك­تەپتەگى جۇمىسىنان شىققان سوڭ ول اكەسىمەن بىرگە جىلقى با­عىسادى. ەڭ باستىسى اتتىڭ قۇلا­عىندا وينايدى. 24 جاستاعى بويجەتكەن تسيرك ارتىستەرىنەن بىردە كەم ەمەس، جورتقان اتتىڭ ۇستىندە تىك تۇرەگەپ جۇرە بەرەدى. سونىمەن بىرگە كەڭ جازيرانى اسەم كۇيگە بولەپ، اتتىڭ ۇستىندە تۇرىپ، قا­زاقتىڭ حالىق اندەرىن سىڭسىتا ايتىپ، ەركىن شىرقاعاندا بۇكىل دالا ءان سالعانداي اسەر قال­دىرادى. استىنا ءمىنىپ جۇر­گەن ەستى سايگ ۇلىك قىزدىڭ بار­لىق قىلىقتارىنا كونگەن، ماڭدايىنان سيپاعاندا، جالىن تاراعاندا تىپىر ەتپەي، وعان سۇيكەنىپ، ەركەلەپ تۇرادى.

قىزدىڭ جىلقىعا قۇمارلىعى 5 جاسىنان باستالىپتى. اكەسىمەن بىرگە جىلقى باعۋعا شىعىپ ول كۇنى بويى اتتان تۇسپەيدى ەكەن. قىزدىڭ شەشەسى ونىڭ قۇمار­لىعىن ۇناتپاسا دا قويدىرا الماپتى. «مەكتەپتەن كەلە سالا تاماق تا ىشپەي، اتقا جۇگىرەتىن ونى قالاي قويدىرايىن. ات قىز بالانىڭ قولى ەمەس ەكەنىن تالاي رەت ايتتىم. بىراق ءبارىبىر اكەسىنىڭ قاسىنا جۇگىرىپ، اتقۇمارلىعىن قويمادى. جۇرەگى قالاپ تۇرعان سوڭ قولىن قاقپايىن دەپ ويلادىم»، دەيدى اناسى ءمارزيا.

ال اكەسى ەسەنعالي قىزىنىڭ وزىنە سەرىك بولىپ، جانىندا جۇ­رەتىنىنە، جىلقىعا دەگەن اي­رىقشا قۇشتارلىعى بار ەكەنىنە كەرىسىنشە ءسۇيسىنىپ قارايتىن سەكىلدى. «جاسىنان اتقا قۇشتار بولدى. الدىمەن اتقا مىنگىزشى دەپ قىڭ­قىلدايتىن. ال ەرگە وتىرا الاتىن كەزدەن بەرى اتتان تۇسكەن جوق. بالكي مەنىڭ اتقۇ­مار­لىعىم وعان جۇققان شىعار»، دەپ جىميادى ول. ىشىنەن ماساتتانىپ تۇرعانى دا كورىنىپ تۇر.

قىزدىڭ ءوزى جىلقىنى جاسىنان جاقسى كورەتىندىگىن ايتادى. «اتتىڭ ۇستىندە ءوزىمنىڭ وزگەرىپ، ەرەكشە كۇش الىپ، قۇلشىنىپ كەتەتىنىمدى سەزىنەمىن. باسىما دا ءتۇرلى ارمان-قيالدار، ناقتى جوس­پارلار كەلىپ، فانتازيام شارىقتاپ، يدەيالار قاپتاپ بەرە­دى. بۇل مەنىڭ جىلقىعا دەگەن ماحابباتىمنان شىعار. قازىر ءمىنىپ، بايگەگە شاۋىپ جۇرگەن ەكى جۇيرىك اتىم بار. ولار دا مەنى جاقسى كورەدى، كۇندە وقىرانىپ قارسى الادى»، دەيدى قىز.

الەۋمەتتىك جەلىلەر ارقىلى تانىلعان ونى شەتەلدىك باق-تار دا ءتۇسىرىپ جاتىر. جۋىردا «ازاتتىق» راديوسىنىڭ ءتىلشىسى دە ارنايى كەلىپ، ءتۇسىرىپ كە­تىپتى. اسىل ءوزىنىڭ تانىلۋىن تۋ­ريستىك جوبانى قولعا الۋ­عا ۇشتاستىراتىنىن ايتادى. ار­نايى تۋرفيرما اشىپ، شەتەل­دىكتەرگە كەڭ دالامىزدىڭ قاسيەتىن كورسەتىپ، ادامنىڭ ەڭ العاش رەت جىلقىنى قولعا ۇيرەتكەن ولكەسىن تانىستىرعىسى كەلەتىنىن، كينوعا ءتۇسىپ، كەڭىرەك تانىمال بولعىسى كەلەتىنىن ايتتى ول. ءبىز ونىڭ ارماندارى ورىندالىپ، ساتتىلىك سەرىگى بولعانىن تىلەيمىز.

 

سولتۇستىك قازاقستان وبلىسى

 

سوڭعى جاڭالىقتار

سىردىڭ سۋى تومەندەپ بارادى

ايماقتار • بۇگىن، 17:27

دوللار ارزاندادى

قارجى • بۇگىن، 16:56

الماتى ماڭىندا جەر سىلكىندى

ايماقتار • بۇگىن، 16:38

قازاقستاندا ەت قىمباتتادى

قوعام • بۇگىن، 15:10

ەلىمىزدە كيىك سانى كوبەيىپ كەلەدى

قازاقستان • بۇگىن، 14:41

ۇقساس جاڭالىقتار