TOKYO2020 • 05 تامىز، 2021

قورجىن تولا – قولا

75 رەت كورسەتىلدى

كەشە قازاقستان سپورتشىلارى ءۇشىن شەشۋشى كۇن ەدى. كاراتەدەن الەمدىك رەيتينگتە كوش باسىندا تۇرعان دارحان ءاسادىلوۆ، ەركىن كۇرەستەن الەم چەمپيوناتىنىڭ كۇمىس جۇلدەگەرى نۇريسلام ساناەۆ جانە بوكستان الەم بىرىنشىلىگىنىڭ قولا جۇلدەگەرى ساكەن بيبوسىنوۆ باستاعان سپورتشىلارىمىز ءبىر ەمەس، ءۇش التىن الۋعا مۇمكىندىكتەرى بار ەدى. وكىنىشكە قاراي، بارلىعى قولا مەدالدى قاناعات تۇتتى. جەتى قولا مەدالمەن ەلىمىز بەيرەسميكوماندالىق ەسەپتە 75-ورىندا تۇر. مۇنداي «انتيرەكورد» تاۋەلسىز قازاقستان تاريحىندا بۇرىن-سوڭدى بولماعان. 

فوتو: ۆلاديسلاۆ سەمەنوۆ، قازاقستان ۇوك

توكيو وليمپياداسىنداعى تومەنگى كورسەتكىشتەرى ءۇشىن سپورت باسشىلارى مەن باپكەرلەردىڭ ماسەلەسى ءالى تالاي ماي شاممەن قارالاتىنى انىق.

جارىسقا كەلەر بولساق، كەشە فينالدىق ايقاس ءۇشىن قازاقستان بوكسشىلارى اراسىندا جالعىز ءوزى قالعان ساكەن بيبوسىنوۆقا (52 كگ) ەل ءۇمىت ارتقان ەدى. وكىنىشكە قاراي، ۇلىبريتانيالىق دجالال يافايعا قارسى قولعاپ تۇيىستىرگەن جەرلەسىمىز تورەشىلەر شەشىمىمەن جەڭىلىس تاپتى.

ءبىرىنشى راۋندتا ساكەننىڭ قارسىلاسى ءا دەگەننەن-اق لاپ قويا بەردى. مۇندايدى كۇتپەگەن وتانداسىمىز دا قاراپ تۇرسىن با؟! ول دا العا ۇمتىلدى. اشىق «شايقاسقا» ۇلاسقان كەزدەسۋدە ساكەن بىرنەشە سوققىنى وتكىزىپ الدى. ءتىپتى نوكداۋن دا تىركەلدى. ال ەكىنشى جانە ءۇشىنشى راۋندتا بەلسەندىلىك تانىتىپ، قارسىلاسىنا بىرنەشە سوققى جاساعانىمەن، قورىتىندى ەسەپ بويىنشا 3:2 ەسەبىمەن ۇلىبريتانيالىق بوكسشى جەڭىسكە جەتتى. وسىلايشا، تۇڭعىش رەت وليمپيادانىڭ فينالى قازاقستاندىق بوكسشىلارسىز وتەدى.

جۋرناليستەر الدىنا شىققان ساكەن كوپكە دەيىن ءوز-وزىنە كەلە الماي، كوز جاسىنا ەرىك بەردى: «توكيو وليمپياداسىندا جەڭىسكە جەتىپ، قازاق حالقىن التىن مەدالمەن قۋانتقىم-اق كەلىپ ەدى. ول ارمانىما جەتە المادىم. بار كۇش-جىگەرىمدى سالدىم. سوڭىنا دەيىن جۇدىرىقتاستىم. ءبىرىنشى راۋندتا قارسىلاسىم باسىم ءتۇستى. ونى مويىندايمىن. ال قالعان ەكى راۋندتا ايانىپ قالعانىم جوق. بۇل مەنىڭ ءبىرىنشى وليمپيادام. ءتىپتى توكيوعا بارا الماي قالۋىم دا مۇمكىن ەدى. جولدامانى ەڭ سوڭعى ساتتە جەڭىپ العانىمدى بىلەسىزدەر. سوندىقتان بارىنە قاناعات. جۇلدەمدى بارشا قازاقستاندىقتارعا ارنايمىن»، دەدى بيبوسىنوۆ.

التىننان تاعى ءبىر ۇمىتكەرىمىز كاراتەدەن 67 كيلوعا دەيىنگى سالماقتا سىنعا تۇسكەن دارحان ءاسادىلوۆ ەدى. امال نە، دارحان دا وليمپيادانىڭ قولا جۇلدەسىن قاناعات تۇتتى. جەرلەسىمىز ا توبىندا سىنعا ءتۇسىپ، بارلىق قارسىلاسىنان باسىم ءتۇستى. ال جارتىلاي فينالدا فرانتسيا وكىلى ستيۆەن دە كوستامەن كەزدەسىپ، 5:2 ەسەبىمەن جەڭىلىپ قالدى. دارحان كاراتە تاريحىندا قازاقستاننان شىققان تۇڭعىش وليمپيادا جۇلدەگەرى. دارحاننىڭ نەگىزگى سالماعى 60 كيلو. وليمپيادادا 60 كيلو سالماق بولماعاندىقتان، جەرلەسىمىز وزىنەن الدەقايدا ۇلكەن 67 كيلودا سىنعا تۇسكەنىن ايتا كەتۋ كەرەك. سونداي-اق قىزدار اراسىندا 55 كيلودا سايىسقا تۇسكەن ءمولدىر جاڭبىرباي وليمپيا ويىندارىنىڭ جارتىلاي فينالىنا وتە المادى. ءمولدىر ۆ توبىندا سىنعا ءتۇسىپ، ەكى كەزدەسۋدە جەڭىلسە، ءبىر كەزدەسۋدە تەڭ ءتۇستى. ال ءبىر جەكپە-جەكتى جەڭىسپەن اياقتادى.

ەركىن كۇرەستەن 57 كيلوعا دەيىنگى سالماقتا بەلدەسكەن نۇريسلام ساناەۆ التىن الۋ كەرەك ەدى. قارسىلاستارىنىڭ بارلىعىن جەڭىپ كەلگەن ول جارتىلاي فينالدا ءۇندىستان بالۋانى راۆي كۋمارعا ەسە جىبەردى. قولا مەدال ءۇشىن كۇرەستە ساناەۆ نامىستى قولدان بەرگەن جوق. كىشى فينالدا بولگاريالىق گەور­گي ۆانگەلوۆتەن 5:1 ەسەبىمەن با­سىم ءتۇسىپ، جۇلدەگەرلەر قاتارىنان كورىندى. ال 74 كيلوعا دەيىنگى سالماق دارەجەسىندە بەلدەسكەن دانيار قاي­سانوۆ بۇل كۇنى ءۇش قارسىلاسىنان باسىم ءتۇسىپ جارتىلاي فينالعا جولداما العان-دى. فينالدىق ايقاس ءۇشىن قاي­سانوۆ ەكى دۇركىن الەم چەمپيونى، رەسەيلىك زاۋربەك سۋداكوۆپەن بەلدەسىپ، 0:11 ەسەبىمەن جەڭىلىس تاپتى.

ساناەۆ

اسا اۋىر سالماقتا بەلدەسكەن يۋسۋپ باتىرمۋرزاەۆتىڭ جولى بولمادى. گەر­مانيالىق گەننادي چۋدينوۆيچتەن سەگىز ۇپاي الدا تۇرىپ، سوڭعى سەكۋند­تا «تازا ادىسكە» ءتۇسىپ قالدى. ال ايەل­دەر ارا­سىندا 53 كيلودا بوزكىلەمگە شىق­­قان تاتيانا احمەتوۆا العاشقى اينا­­لىمدا-اق الەم چەمپيوناتىنىڭ قولا جۇلدەگەرى، پولشا سپورتشىسى روك­سانا مارتا زاسينادان 2:3 ەسەبىمەن جەڭىلدى.

قازىرگى بەسسايىس باسەكەسىنىڭ ىرىكتەۋ قورىتىندىسى بويىنشا ەلەنا پوتاپەنكو 36 سپورتشىنىڭ ىشىنەن 8-ءشى ساتىعا تۇراق­تادى. بۇگىن بەسسايىسشىلار جۇزۋدەن، ات سپور­تىنان جانە سەمسەرلەسۋدەن باق سىنايدى.

ترەكتەگى ۆەلوسپورتتاعى «ومنيۋم» بويىنشا جارىس جولىنا شىققان ارتەم زاحاروۆ ءتورت ءتۇرلى باسەكەدە باق سىنادى. ناتيجەسىندە، زاحاروۆ 62 ۇپاي جيناپ، 14-ورىن الدى. سون­داي-اق سپورتتىق جاياۋ جۇرىستەن 20 شاقى­رىمعا سىنعا تۇسكەن گەورگي شەيكو 1:28:38 ۋا­قىت كورسەتكىشىمەن 39-ورىندا قالىپ قويدى. ال اشىق سۋدا جۇزۋدەن 10 شاقىرىم قا­شىقتىق بويىنشا فينالدىق باسەكەگە قاتىسقان ۆيتالي حۋدياكوۆ ءتيىستى مەجەنى 1:57:53.7 ۋاقىتتا باعىندىرىپ، 21-ورىننان كو­رىندى. بۇل كۇنى جەڭىل اتلەتيكادان بيىكتىككە سەكىرۋ بويىنشا نادەجدا دۋبوۆيتسكايا مەن كريستينا وۆچيننيكوۆا دا فينالدىق كەزەڭگە شىعا المادى.

توكيو وليمپياداسىندا قازاقستاندىق سپورتشىلارعا التىن مەن كۇمىس بۇيىرماي، قورجىنعا قولا ءتۇسىپ جاتىر. قۇددى قازاقستان «قولا داۋىرىنە» قادام باسىپ بارا جاتقان ءتارىزدى.

سوڭعى جاڭالىقتار

بەلگرادتا بەلدەسەدى

سپورت • بۇگىن، 09:06

جاپونيادا سىنعا تۇسەدى

سپورت • بۇگىن، 09:03

ەڭ باستىسى – ازاماتتاردىڭ سەنىمى

قازاقستان • بۇگىن، 08:43

Smart Zholy جەڭىمپازدارى انىقتالدى

قازاقستان • بۇگىن، 08:36

قۇندى قاعازعا قىزىعاتىندار كوپ

ەكونوميكا • بۇگىن، 08:32

اسىل اعانىڭ شاراپاتى

رۋحانيات • بۇگىن، 00:08

قۇيماقۇلاق

رۋحانيات • كەشە

گاز باعاسى نەگە قىمبات؟

ايماقتار • كەشە

ۇقساس جاڭالىقتار