الماتىدا مەدەۋ مەن شىمبۇلاققا قىدىرۋ قايتادان سانگە اينالا باستادى
بۇل كۇندەرى وڭتۇستىك استانانىڭ ەڭ كورىكتى مەكەنى – ىلە الاتاۋىن بوكتەرلەپ جاتقان مەدەۋ شاتقالىنداعى «مەدەۋ» مۇز ايدىنىندا كونكيمەن سىرعاناۋ, شىمبۇلاق تاۋ-شاڭعى كەشەنىندە قىدىرۋ قايتادان بۇقارالىق سيپات الىپ كەلەدى. دەمالىس كۇندەرى تاۋ جاققا قاراي اعىلىپ بارا جاتقان الماتىلىقتار مەن قالا قوناقتارىنىڭ سانى ارتا تۇسكەنى قۋانتادى.
الماتىدا مەدەۋ مەن شىمبۇلاققا قىدىرۋ قايتادان سانگە اينالا باستادى
بۇل كۇندەرى وڭتۇستىك استانانىڭ ەڭ كورىكتى مەكەنى – ىلە الاتاۋىن بوكتەرلەپ جاتقان مەدەۋ شاتقالىنداعى «مەدەۋ» مۇز ايدىنىندا كونكيمەن سىرعاناۋ, شىمبۇلاق تاۋ-شاڭعى كەشەنىندە قىدىرۋ قايتادان بۇقارالىق سيپات الىپ كەلەدى. دەمالىس كۇندەرى تاۋ جاققا قاراي اعىلىپ بارا جاتقان الماتىلىقتار مەن قالا قوناقتارىنىڭ سانى ارتا تۇسكەنى قۋانتادى.
ەگەمەندىكتىڭ ەلەڭ-الاڭىندا ەسەڭگىرەگەن ەل الماتىنىڭ وزىندە تۇرىپ, الاتاۋدىڭ تورىندەگى الەمدەگى ەڭ كورىكتى جەرگە قىدىرۋعا مۇرشالارى دا جوق ەدى. ەندى, مىنە, ەڭسەسى تىكتەلگەن حالىق اۋاسى ساف تازا, قاراعاي, سامىرسىن, شىرشالارى كوك تىرەگەن دەمالىس ورنىن قايتا دۋمانعا بولەپ وتىر.
ەڭ باستىسى, سوڭعى جىلدارى شىمبۇلاقتاعى تاۋ شاڭعىسى كەشەنىنە ارنايى كەلەتىن شەتەلدىكتەردىڭ دە قاراسى كوبەيە باستادى. الىس-جاقىن مەملەكەتتەردەن كەلگەن تۋريستەر قازىر مەدەۋ مەن شىمبۇلاقتا كورسەتىلەتىن قىزمەتكە ءمىن تاعا المايدى.
2011 جىلى VII قىسقى ازيا ويىندارى قارساڭىندا مەدەۋ مۇز ايدىنى مەن شىمبۇلاق تاۋ-شاڭعى كەشەنى كۇردەلى جوندەۋدەن وتكىزىلىپ, حالىقارالىق ستاندارتتار تالابىنا ساي كەلبەتكە كەلتىرىلىپ, مەدەۋ مەن شىمبۇلاق اراسىنا ەڭ زاماناۋي اسپالى جولدار تارتىلعان ەدى. وسىلايشا, 1972 جىلى قالالىقتاردىڭ يگىلىگىنە بەرىلگەن, كەڭەس وكىمەتى تۇسىندا-اق «رەكوردتار فابريكاسى» اتانعان مۇز ايدىنى اراعا قىرىق جىل سالىپ بارىپ, قۇلپىرىپ شىعا كەلگەن-ءدى.
قازىر مەدەۋدەن شىمبۇلاققا اسپالى جولمەن باراتىن ادامدار پانورامالىق كابينالاردىڭ ىشىندە وتىرىپ, جىلدىڭ كەز كەلگەن مەزگىلىندە توبەسىن مۇز باسقان قۇزار شىڭداردى, ىلە الاتاۋىنىڭ سۇلۋلىعىن تاماشالاي الادى. كوكتەمدە تومەنگە كوز سالساڭ, نەشە ءتۇرلى شوپتەر مەن گۇلدەردەن كوز تۇنادى. ال قىستا اپپاق قاردان تون كيگەن بۇيرا-بۇيرا شاتقالدار مەن شىرشالار ەرتەگىدەي الەمگە جەتەلەيدى. بۇل كەزدە قالادا جاڭبىر جاۋىپ, تۇمان باسىپ, ەل تۇتىنگە تۇنشىعىپ وتىرعاندا, شىمبۇلاق جاقتا كۇن شايداي اشىق بولىپ تۇرادى.
وسىلايشا, تاۋەلسىزدىك تۇسىندا ەكىنشى تىنىسى اشىلعان دەمالىس ورىندارى الماتىلىقتارعا شىن مانىندە قايتا قۇشاعىن ايقارا اشتى. ال دەمالىس جانە مەرەكە كۇندەرى بۇل جاققا اۆتوبۋس تۇنگى 24.00-گە دەيىن قاتىنايدى. قازىرگى قالا جاستارى اراسىندا مەدەۋدەگى «تۇنگى سىرعاناۋعا» بارۋ سانگە اينالىپ كەلەدى.
ايناش ەسالي,
«ەگەمەن قازاقستان».
الماتى.
سۋرەتتەردى تۇسىرگەندەر ەرلان وماروۆ, يۋري بەككەر.
