«قۇرىلىسى ۇزاققا سوزىلعان نىسانداردى اياقتاۋ بويىنشا جۇيەلى جۇمىس ءجۇرىپ جاتىر.
قالانىڭ ەڭ پروبلەمالى, قۇرىلىسى ۇزاققا سوزىلعان — «شىعىس» تۇرعىن ءۇي كەشەنى بىرنەشە توپتان تۇرادى. ۇلەسكەرلەردىڭ جالپى سانى — 2 مىڭنان استام وتباسى. «شىعىس» تۇرعىن ءۇي توبى بويىنشا اۋقىمدى جۇمىس اتقارىلدى: ۇيلەردىڭ قۇرىلىسى قايتا جاندانىپ, تەحنيكالىق اۋديت جۇرگىزىلدى, قارجى ءبولىندى, بلوكتاردىڭ مەردىگەرلەرى تولىقتاي انىقتالدى.
مىسالى, 1ا جانە 1ۆ بلوكتارىندا قاسبەتتىك جۇمىستار جۇرگىزىلدى, تەرەزەلەر مەن ليفتىلەر ورناتىلدى. ىشكى ينجەنەرلىك جەلىلەردى ورناتۋ بويىنشا جۇمىستار اياقتالدى. سونداي-اق جىلۋ توراپتارى مەن سورعى ستانتسيالارىن مونتاجداۋ بويىنشا جۇمىستار جۇرگىزىلدى.
2ا جانە 2ۆ بلوكتارىندا ءۇيدىڭ جاقتاۋى كوتەرىلدى. تۇرعىن ءۇي كەشەنىنىڭ شاتىرى جوندەلدى, قازىر تەرەزەلەر مەن ليفتىلەردى ورناتۋ جۇمىسى ءجۇرىپ جاتىر. قازىرگى ۋاقىتتا اتالعان بلوكتاردىڭ قۇرىلىسى اياقتالۋعا جاقىن, ينجەنەرلىك جەلىلەردى قوسۋ جۇمىستارى جۇرگىزىلۋدە, «شىعىس» 2ا بلوگىندا اباتتاندىرۋ جۇمىستارى باستالدى», دەپ جازدى ەلوردا اكىمى.
سول سياقتى 3ا جانە 3ب بلوكتارىندا دا وسىعان ۇقساس جۇمىستار جۇرگىزىلدى. سونداي-اق ينجەنەرلىك جەلىلەردى قوسۋ جۇمىستارى ءجۇرىپ جاتىر, اباتتاندىرۋ جۇمىستارى باستالدى.
قالا اكىمىنىڭ ايتۋىنشا, «شىعىس» 4 بويىنشا (1 كەزەك) قاڭقانى تۇرعىزۋ, قالاۋ جۇمىستارى اياقتالدى. قاسبەت, ىشكى ينجەنەرلىك جەلىلەر, تەرەزەلەر مەن ۆيتراجداردى مونتاجداۋ, شاتىردى ورناتۋ بويىنشا جۇمىستار جۇرگىزىلۋدە.
«قۇرىلىس جۇمىسىن اياقتاۋدى ءارى تۇرعىن ءۇي كەشەنىنىڭ بلوكتارىن پايدالانۋعا بەرۋدى بيىلعا جوسپارلاپ وتىرمىز.
ەكى جىل ىشىندە (2019 جىلدىڭ جازىنان باستاپ) پروبلەمالى نىساندار سانى 2 ەسەدەن استام ازايدى. بيىل 18 نىساندى قامتيتىن 57 ءۇيدىڭ قۇرىلىسىن اياقتاۋدى جوسپارلاپ وتىرمىز – كوپتەن كۇتكەن پاتەرىنىڭ كىلتىن 7 مىڭنان استام ۇلەسكەر الادى. مىسالى, وسى جىلدىڭ ءبىرىنشى جارتىجىلدىعىندا 21 پروبلەمالى ءۇيدىڭ قۇرىلىسى اياقتالدى. ءار نىسان بويىنشا قادامدىق ءىس-شارالار جوسپارى جاسالدى», دەپ جازدى ەلوردا اكىمى.
