– ەلميرا قىرعىز بالۋانىمەن بۇعان دەيىن جارىستاردا كەزدەسىپ, تازا جەڭىپ جۇرگەن. بىراق وسى جولى كورشى ەلدىڭ سپورتشىسى ءبىزدىڭ قىزعا ارنايى دايىندالىپ كەلگەندەي. ەلميرا وعان قارسى ەشتەڭە جاساي المادى. وكىنىشتى-اق, – دەگەن گۇزەل مانيۋروۆا ەلميرانىڭ جەڭىسىنە جاڭا سالماققا اۋىسقانى كەدەرگى بولۋى مۇمكىن دەگەندى العا تارتتى. – ريودا 68 كيلو سالماقتا بەلدەسكەن سىزدىقوۆا توكيودا 76 كيلودا كىلەمگە شىقتى. جەڭىلىستىڭ ءبىر سەبەبى وسى دا بولۋى مۇمكىن. ويتكەنى كەيدە قارسىلاسىڭا فيزيكالىق جاعىنان كۇشىڭ جەتپەي جاتادى. ايتپەسە, پاندەميا كەزىندە قيىندىقتارعا قاراماستان سپورتشىلارىمىزعا بارلىق جاعدايدى جاساۋعا تىرىستىق. الداعى ۋاقىتتا كەم-كەتىكتەردى سارالاپ, سوعان جۇمىس ىستەيتىن بولامىز.
ءوز كەزەگىندە گۇزەل مانيۋروۆا پاندەميا جاعدايىنا بايلانىستى ءبىر جىل كەيىنگە شەگەرىلگەن وليمپيادادا مىقتى دەگەن سپورتشىلاردىڭ نە ءۇشىن جارىستى ەرتە اياقتاپ جاتقانىن ايتتى.
– ءۇش وليمپيادانىڭ جۇلدەگەرى رەتىندە مەن سپورتشىلاردى جاقسى تۇسىنەمىن. الدىمەن, ەلميراعا راحمەت ايتقىم كەلەدى. الەمدە ۇزدىك 16 سپورتشىنىڭ قاتارىنا ەنىپ, وليمپياداعا ادەتتەگىدەي ءتورت جىل ەمەس, بەس جىل دايىندالۋ قيىننىڭ قيىنى. سپورتتىق دەڭگەيىڭدى تاعى ءبىر جىل ۇستاپ تۇرعاندا, وزىڭنەن كەيىنگىلەر وليمپ دوداسىنا تىڭعىلىقتى دايىندالۋعا, ءوز دەڭگەيىنە جەتۋگە مۇمكىندىك الىپ قويادى. ەرلەر بولسىن, قىزدار بولسىن كەلگەن بالۋاندار فيزيكالىق تۇرعىدا مىقتى ەكەنى بايقالىپ تۇر. بارلىعى جەڭىسكە جەتكىسى, بارلىعى دا جاقسى ناتيجە كورسەتكىسى كەلەدى. سول سەبەپتى دە بۇل جارىستا وليمپيادا چەمپيوندارى مەن جۇلدەگەرلەرى ءسۇرىندى, – دەدى گ.مانيۋروۆا.
كەلەسى ءسوز سەرىك ساپيەۆكە بەرىلدى. توكيودا سپورتشىلارىمىز ەشقانداي كوروناۆيرۋسپەن اۋىرماعانىن, بارلىعىنىڭ دەنساۋلىعى جاقسى ەكەنىن ايتقان كوميتەت باسشىسى شيرەك فينالدا جەڭىلىس تاپقان بوكسشى ءابىلحان امانقۇل تۋرالى دا پىكىرىن ءبىلدىردى.
– ءابىلحاننىڭ قارسىلاسى وسال ەمەس ەدى. بويشاڭ, ۇرعان سوققىلارى ءدوپ ءتيىپ جاتتى. كەزدەسۋ الدىندا ءابىلحاننىڭ وڭ يىعى شىعىپ كەتكەنىن بىلەسىزدەر. ونىمەن قوسا سول جۇدىرىعى شىتىناپ, كوگەرىپ كەتكەن ەدى. سوعان قاراماستان بوكسشىمىز تەڭ دارەجەدە جۇدىرىقتاستى. نەگىزى جەڭۋگە بولاتىن قارسىلاس ەدى, اتتەڭ ونداي مۇمكىندىكتى ءابىلحان جىبەرىپ الدى, – دەدى س.ساپيەۆ.
