سۇڭعات ءالىپباي,
«Egemen Qazaqstan»
حالىقتىڭ 55,4 پايىزى
ەكپە الدى
حالىقتى ۆاكتسينالاۋ بارىسى مەن قازىرگى جاعداي تۋرالى دەنساۋلىق ساقتاۋ ءمينيسترى الەكسەي تسوي, وڭىرلەردەگى جاعداي تۋرالى اتىراۋ وبلىسىنىڭ اكىمى ماحامبەت دوسمۇحامبەتوۆ, ماڭعىستاۋ وبلىسىنىڭ اكىمى سەرىكباي تۇرىموۆ, نۇر-سۇلتان قالاسىنىڭ اكىمى التاي كولگىنوۆ پەن شىمكەنت قالاسىنىڭ اكىمى مۇرات ايتەنوۆ باياندادى.
دەنساۋلىق ساقتاۋ ءمينيسترى الەكسەي تسويدىڭ ايتۋىنشا, ەپيدەميالىق جاعدايدى باعالاۋ ماتريتساسىنا سايكەس, قازاقستان 26 ماۋسىمنان باستاپ «قىزىل ايماقتا» تۇر. 3 تامىزداعى جاعداي بويىنشا رەسپۋبليكا بويىنشا ينفەكتسيالىق توسەكتىك ورىنداردىڭ بوس بولماۋى 56%-دى (29 138 توسەكتىك ورىن), رەانيماتسيالىق توسەكتىك ورىنداردىڭ بوس بولماۋى 44%-دى (2 102 توسەكتىك ورىن) قۇرادى. بۇل رەتتە مينيستر اتاپ وتكەندەي, ينفەكتسيالىق توسەكتىك ورىنداردىڭ ەڭ كوپ قامتىلۋى نۇر-سۇلتان (67%), شىمكەنت (77%) قالالارىندا, رەانيماتسيالىق توسەكتىك ورىنداردىڭ ەڭ كوپ قامتىلۋى اقمولا (67%), اتىراۋ (68%), ماڭعىستاۋ (80%) وبلىستارىندا (80%) جانە نۇر-سۇلتان قالاسىندا (80%) بايقالادى. كوروناۆيرۋس ينفەكتسياسىن جۇقتىرعان پاتسيەنتتەردى ەمدەۋ بويىنشا ادىستەمەلىك جانە پراكتيكالىق كومەك كورسەتۋ ءۇشىن دەنساۋلىق ساقتاۋ مينيسترلىگى مينيسترلىكتىڭ جەتەكشى قىزمەتكەرلەرى مەن مەديتسينالىق جوعارى وقۋ ورىندارىنىڭ پروفەسسورلىق-وقىتۋشىلىق قۇرامىنىڭ ەلىمىزدىڭ 10 وڭىرىنە شىعۋىن قامتاماسىز ەتتى. وبلىستاردا جاعدايعا ەگجەي-تەگجەيلى تالداۋ جانە باعالاۋ جۇرگىزىلدى, جاعدايدى تۇراقتاندىرۋ ءۇشىن ناقتى ۇسىنىمدار بەرىلدى. «تىم قىزىل» ايماقتاعى ستاتسيونارلارعا جۇكتەمەنى باعالاۋ ماتريتساسىنا سايكەس, قاۋىپتى تاۋەكەل ايماعىندا 4 ءوڭىر بار: الماتى, شىمكەنت قالالارى, اتىراۋ جانە قاراعاندى وبلىستارى, ولاردا توسەكتىك ورىنداردىڭ اپتالىق قامتىلۋ كورسەتكىشى 100 مىڭ تۇرعىنعا شاققاندا 200 جانە ودان جوعارى.
2 تامىزدان باستاپ وڭىرلەردە ىسكەرلىك بەلسەندىلىك تەڭگەرىمىن جانە ەپيدەميالىق احۋالدى تۇراقتاندىرۋدى ەسكەرە وتىرىپ جانە Ashyq جوباسىن ىسكە اسىرۋ شەڭبەرىندە شەكتەۋ شارالارى ەنگىزىلدى. حالىقتى كۆي-گە قارسى ۆاكتسينالاۋ جالعاسۋدا. ءبىرىنشى كومپونەنتپەن 5 480 094 ادام ەگىلدى, بۇل ۆاكتسينا الۋى ءتيىس حالىقتىڭ 55,4%-ىن قۇرايدى. ەكىنشى كومپونەنتپەن 3 941 941 ادام نەمەسە ءتيىس حالىقتىڭ 39,8% قامتىلعان. «مينيسترلىك 4 ميلليون ادامعا 8 ملن دوزانى قوسىمشا جەتكىزۋگە كەلىسىمشارت جاساستى. جەتكىزۋ كەستەگە سايكەس جۇزەگە اسىرىلادى. وسىعان بايلانىستى, رەسپۋبليكادا حالىقتىڭ ۆاكتسينا الۋعا قولجەتىمدىلىگى جەتكىلىكتى مولشەردە قامتاماسىز ەتىلەدى», دەدى ا.تسوي.
ونىڭ ايتۋىنشا, Ashyq جوباسىنا كىرۋ تالاپتارىن جەڭىلدەتۋ جوباعا قاتىسۋشىلاردىڭ 3 ەسە وسۋىنە ىقپال ەتتى. مىسالى, وسى جىلدىڭ 27 شىلدەسىنەن باستاپ 2 تامىزىنا دەيىن Ashyq جوباسىنا قاتىسۋشىلاردىڭ سانى 21 900 ادامنان 67 782 ادامعا دەيىن ءوستى. Ashyq جوباسى اياسىندا مونيتورينگ توپتارىمەن جوباعا قاتىسۋشى 50 مىڭ وبەكت قامتىلدى. بۇزۋشىلىقتار 642 نىساندا انىقتالدى. وسى جىلدىڭ 10 شىلدەسىنەن باستاعان كەزەڭدە ءتسدياوم-نەن الىنعان مالىمەتتەر دەرەكتەرى بويىنشا 16 663 بۇزۋشى انىقتالدى, ولاردىڭ 10 305-ءى – «قىزىل» جانە 6 358-ءى – «سارى» مارتەبەسى بار كەلۋشىلەر. وسىلايشا, 16 مىڭنان اسا نىساندا حالىقتىڭ كوروناۆيرۋس ينفەكتسياسىن جۇقتىرۋىنىڭ الدىن الۋ مۇمكىن بولدى.
سوڭعى اپتادا جەدەل مەديتسينالىق جاردەمدى شاقىرتۋلار سانى 11%-عا ازايدى. ءمينيستردىڭ ايتۋىنشا, تامىز-قىركۇيەك ايلارىنداعى ەپيدەميالىق احۋالدىڭ بولجامى نەگىزىندە ەلىمىز وپتيميستىك ستسەناري بويىنشا ءجۇرىپ جاتىر, وندا 2021 جىلدىڭ تامىز-قىركۇيەك ايلارىندا تىركەلگەن جاعدايلاردىڭ بولجامدى سانى شامامەن 250 مىڭ ادامدى قۇرايدى (ورتاشا ەسەپپەن تاۋلىگىنە 7 مىڭ جاعداي). «وپتيميستىك ستسەناريدى ودان ءارى دامىتۋ كارانتين شارالارىن ساقتاعان جانە ءتيىستى تۇرعىنداردى ۆاكتسينالاۋمەن قامتۋدى ارتتىرعان جاعدايدا عانا مۇمكىن بولادى», دەدى ا.تسوي.
ماسەلەنى ۇكىمەت باسشىسى اسقار مامين قورىتىندىلادى. ونىڭ ايتۋىنشا, قازاقستانداعى ەپيدەميالىق جاعداي ءالى دە كۇردەلى. اۋرۋحانا توسەكتەرى 56%, رەانيماتسيالىق توسەكتىك ورىندار 44% تولى. تۇركىستان وبلىسىنان باسقا وڭىرلەردىڭ بارلىعى «قىزىل ايماقتا» تۇر. بۇگىنگى تاڭدا شامامەن 9,4 ملن دوزا ۆاكتسينا قولدانىلدى, ونىڭ ىشىندە ۆاكتسينانىڭ ءبىرىنشى كومپونەنتىن 5,5 ميلليون ادام, ەكىنشى كومپونەنتىن 4 ميلليون ادام الدى.
ۇكىمەت باسشىسى وڭىرلەردىڭ اكىمدىكتەرىنە جانە دەنساۋلىق ساقتاۋ مينيسترلىگىنە بارلىق اۋرۋحانانىڭ, باستاپقى پۋنكتتەردىڭ, ءموبيلدى بريگادالاردىڭ, پتر-زەرتحانالاردىڭ ۇزدىكسىز جۇمىس ىستەۋىن, ءدارى-دارمەكتەر مەن قورعانىش قۇرالدارىنىڭ بولۋىن قامتاماسىز ەتۋدى تاپسىردى. ءىىم مەن دەنساۋلىق ساقتاۋ مينيسترلىگىنە سانيتارلىق-ەپيدەميالىق نورمالاردىڭ بۇزىلۋىن انىقتاۋ جانە باقىلاۋ تۇرعىسىنان مونيتورينگتىك توپتاردىڭ جۇمىسىن كۇشەيتۋ تاپسىرىلدى.
ۇكىمەت باسشىسى شەكتەۋ شارالارى مەن كاسىپكەرلىك بەلسەندىلىكتىڭ ءوسۋىن ساقتاۋ اراسىنداعى تەپە-تەڭدىكتى ساقتاۋ قاجەتىن اتاپ ءوتتى. «بۇگىندە Ashyq جوباسى بيزنەسكە كارانتيندىك شارالار جاعدايىندا جۇمىس ىستەۋگە مۇمكىندىك بەرەدى», دەدى ا.مامين.
جامبىل وبلىسى تاجىريبەسىنىڭ
تيىمدىلىگى
ۇكىمەت وتىرىسىندا جامبىل وبلىسىندا اۋىل حالقىنىڭ تابىسىن ارتتىرۋ جونىندەگى قاناتقاقتى جوبانى كەڭەيتۋ ماسەلەسى قارالدى. بۇل ماسەلە جونىندە جامبىل وبلىسىنىڭ اكىمى بەردىبەك ساپارباەۆ, ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ, اۋىل شارۋاشىلىعى ۆيتسە-ءمينيسترى – ءمينيسترىنىڭ مىندەتىن اتقارۋشى ەربول قاراشوكەەۆ بايانداما جاسادى.
جامبىل وبلىسىنىڭ اكىمى ب.ساپارباەۆ حابارلاعانداي, ءوڭىر حالقى 1 139 مىڭ ادامدى قۇرايدى, ونىڭ ىشىندە اۋىلدىق جەرلەردە 685,1 مىڭ ادام (60,1%) تۇرادى. اتاۋلى الەۋمەتتىك كومەك الۋشىلار 51,1 مىڭ ادامنىڭ 31,1 مىڭى – اۋىلدىقتار (60,8%). 2019 جىلى باستالعان «جامبىل وبلىسى حالقىنىڭ تابىسىن ارتتىرۋ جونىندەگى» قاناتقاقتى جوبانىڭ 5 باعىتى بويىنشا جالپى العاندا 9,2 ملرد تەڭگە كرەديتتىك قاراجات يگەرىلدى. جوباعا وبلىستىڭ 10 اۋدانىنىڭ 11 قاناتقاقتى اۋىلدىق وكرۋگىنىڭ 25 ەلدى مەكەنىنەن 2 478 تۇرعىن جانە 11 جاڭا اۋىل شارۋاشىلىعى كووپەراتيۆى قاتىسىپ, نەسيە الدى. جوبا 5 باعىت بويىنشا ىسكە اسىرىلدى. ءبىرىنشى باعىت بويىنشا ءۇي ىرگەسىندەگى جەردى ءتيىمدى پايدالانۋ 95%-عا ارتتى. ەكىنشى باعىت بويىنشا مال شارۋاشىلىعىن دامىتۋعا 6,4 ملرد تەڭگە قارجىعا 45 032 باس مال ساتىپ الىندى. ءۇشىنشى باعىت بويىنشا ەلدى مەكەننەن تىس 10 113 گەكتار پاي جەرى ءتيىمدى پايدالانىلدى. ءتورتىنشى باعىت بويىنشا اۋىل شارۋاشىلىعى كووپەراتيۆتەرىن قاجەتتى تەحنيكامەن جانە جابدىقتارمەن قامتاماسىز ەتۋ ءۇشىن 972,4 ملن تەڭگەگە 190 دانا تەحنيكا ساتىپ الىندى. بەسىنشى باعىت بويىنشا جەرگىلىكتى تۇرعىندارعا شاعىن بيزنەس اشۋ ءۇشىن 56,2 ملن تەڭگە ءبولىنىپ, 11 جوبا قارجىلاندىرىلىپ, شاعىن تسەحتار ءوز جۇمىستارىن جۇرگىزۋدە.
قاناتقاقتى جوبانىڭ ءبىرىنشى كەزەڭىندە قول جەتكىزىلگەن ناتيجەلەردى اتاپ وتۋگە بولادى: جەكە كاسىپكەرلەر سانى 2 282-گە ارتتى; جوبانى ىسكە اسىرۋ ناتيجەسىندە 5 جىل ىشىندە ەكونوميكالىق تيىمدىلىك 14,9 ملرد تەڭگەنى قۇرايدى ء(بىر جىلدا 2,98 ملرد تەڭگە); جۇمىسسىزدار سانى 194 ادامعا كەمىدى (528-دەن 334-كە دەيىن); 589 جاڭا جۇمىس ورنى اشىلدى; ااك الۋشىلار سانى 1 058 وتباسىعا نەمەسە 65% كەمىدى, (1 615-تەن 557 وتباسىعا). اتاۋلى الەۋمەتتىك كومەك تولەۋ ەسەبىنەن ۇنەمدەلگەن قاراجات – 1 039 ملن تەڭگە; قاتىسۋشىلاردىڭ ورتاشا ايلىق تابىسى 44 مىڭ تەڭگەدەن 73 مىڭ تەڭگەگە نەمەسە 165% ارتتى.
ۆيتسە-مينيستر – اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەەۆتىڭ ايتۋىنشا, اۋىل شارۋاشىلىعى مينيسترلىگى ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ, وڭىرلەردە جوبانىڭ اۋقىمىن كەڭەيتۋ مۇمكىندىگىن زەردەلەدى. بۇل رەتتە ۇسىنىلىپ وتىرعان جوبا ءۇش فازاعا بولىنەدى: باستاپقى فازا نارىقتى زەردەلەۋدى, قارجىنى جەكە قوسالقى شارۋاشىلىقتارعا جەتكىزەتىن ينفراقۇرىلىمدى دايىنداۋدى, ماماندار دايارلاۋدى جانە جوبالاردى قارجىلاندىرۋ جۇمىستارىن باستاۋدى بولجايدى. كەڭەيتۋ فازاسى جوباعا تارتىلعان جەكە قوسالقى شارۋاشىلىقتار سانىن ودان ءارى كوبەيتۋگە باعىتتالادى. دامىتۋ فازاسىندا جەكە قوسالقى شارۋاشىلىقتار جوباسىنا قاتىسۋشىلار سانى ەڭ جوعارعى كورسەتكىشكە جەتەدى. وسىلايشا 2022 جىلعا ەسەپتەلگەن قارجىلاندىرۋعا دەگەن قاجەتتىلىك 163 ملرد تەڭگەنى قۇرايدى (41 مىڭ جەكە قوسالقى شارۋاشىلىقتى قارجىلاندىرۋعا), ونىڭ ىشىندە جامبىل وبلىسىنداعى 12 مىڭ جەكە قوسالقى شارۋاشىلىقتى قارجىلاندىرۋعا كەزەكتى كەڭەيتۋ فازاسى بويىنشا 46 ملرد تەڭگەنى قارجىلاندىرۋعا باعىتتاۋ جوسپارلانسا, جوبانىڭ اۋقىمىن باسقا دا وڭىرلەرگە كەڭەيتۋ ءۇشىن 117 ملرد تەڭگە قاجەت (29 مىڭ جەكە قوسالقى شارۋاشىلىقتى قارجىلاندىرۋعا). «جەكە قوسالقى شارۋاشىلىقتار ءۇشىن قارجىلاندىرۋ شارتتارى جەڭىلدەتىلەدى: قارىز مولشەرلەمەلەرى – جىلدىعى 2,5%, ورتاشا قارىز سوماسى – 4 ملن تەڭگەگە دەيىن, قارىز بەرۋ مەرزىمى – 7 جىلعا دەيىن», دەدى ە.قاراشوكەەۆ.
باستاپقى فازادا جەكە قوسالقى شارۋاشىلىقتار جوباسىنا قاتىسۋعا جوسپارلانعانداردىڭ 15% قامتىلادى, كەڭەيتۋ فازاسىندا جەكە قوسالقى شارۋاشىلىقتار سانى 55%-عا ارتادى, دامىتۋ فازاسىندا جالپى جوباعا قاتىساتىن 195 مىڭ جەكە قوسالقى شارۋاشىلىقتار 100% قارجىلاندىرىلادى.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ سوڭعى 10 جىلدا حالىقتىڭ جان باسىنا شاققانداعى ورتاشا نومينالدى تابىسى 39 مىڭ تەڭگەدەن 115 مىڭ تەڭگەگە دەيىن – 3 ەسە وسكەنىن ايتتى. دەگەنمەن 2020 جىلدىڭ قورىتىندىسى بويىنشا اۋىلدارداعى ءۇي شارۋاشىلىقتارىنىڭ تابىسى 52,4 مىڭ تەڭگەنى قۇرادى. بۇل ورتاشا رەسپۋبليكالىق كورسەتكىشتەن 15%-عا (61,4 مىڭ تەڭگە), قالالارداعى تابىس دەڭگەيىنەن 23%-عا كەم (67,6 مىڭ تەڭگە).
ماسەلەنى ۇكىمەت باسشىسى اسقار مامين قورىتىندىلادى. 2019 جىلعى قىركۇيەكتە ۇكىمەت وتىرىسىندا «جامبىل وبلىسى حالقىنىڭ تابىسىن ارتتىرۋ جونىندەگى» قاناتقاقتى جوبا ماقۇلدانعان بولاتىن, ونى ىسكە اسىرۋعا رەسپۋبليكالىق بيۋدجەت قاراجاتىنان 7,2 ملرد تەڭگە ءبولىندى. اقشالاي قاراجات 2,5% مولشەرلەمەمەن بەرىلدى. باعدارلاما 5 باعىت بويىنشا جۇزەگە اسىرىلادى: ءۇي جانىنداعى جەرلەردى ءتيىمدى پايدالانۋ, ءۇي مالدارى مەن قۇستارىنىڭ ونىمدىلىگىن ارتتىرۋ, جەم-ءشوپ جانە جايىلىم پروبلەمالارىن شەشۋ ءۇشىن ۇلەستىك جەر تەلىمدەرىن ۇتىمدى پايدالانۋ, كووپەراتيۆتەردى قاجەتتى تەحنيكامەن جاراقتاندىرۋ, اۋىلداعى بيزنەس-جوبالاردى قارجىلاندىرۋ.
قاناتقاقتى جوبا جامبىل وبلىسىنىڭ 11 اۋىلدىق وكرۋگىندە ىسكە اسىرىلىپ جاتىر, 8 مىڭنان اسا جەكە قوسالقى شارۋاشىلىق, ونىڭ ىشىندە 51 مىڭنان اسا تۇرعىن قامتىلعان. باعدارلامانى ىسكە اسىرۋ اياسىندا كاسىپكەرلەر سانى 3 ەسەگە ارتتى, ااك الۋشىلار سانى 3 ەسەگە ازايدى, باعدارلاماعا قاتىسۋشىلاردىڭ تابىسى 2 ەسەگە دەيىن ءوستى.
پرەمەر-مينيستر اۋىل حالقىنىڭ تابىسىن ارتتىرۋ جونىندەگى وبلىستىڭ تاجىريبەسى ءوز تيىمدىلىگىن كورسەتىپ, مەملەكەت باسشىسىنىڭ قولداۋىنا يە بولعانىن اتاپ ءوتتى. «بۇل جوبانى ەلىمىزدىڭ بارلىق وڭىرىندە قولدانۋ كەرەك, ءتيىستى وقىتۋدى ۇيىمداستىرۋ قاجەت», دەپ اتاپ ءوتتى ا. مامين.
ۇكىمەت باسشىسى اۋىل شارۋاشىلىعى مينيسترلىگىنە ەڭبەك جانە حالىقتى الەۋمەتتىك قورعاۋ, ۇلتتىق ەكونوميكا, قارجى مينيسترلىكتەرىمەن, «اتامەكەن» ۇكپ-مەن بىرلەسىپ, ءبىر اي ىشىندە جوبانى باسقا وڭىرلەردە دە كەڭىنەن قولدانۋ جونىندەگى جول كارتاسىن ازىرلەۋدى تاپسىردى.
بيزنەستى قولداۋدىڭ
جاڭا ءىس-شارالار
توپتاماسى
ۇكىمەت وتىرىسىندا داعدارىس جاعدايىندا بيزنەستى قولداۋ شارالارىنىڭ ىسكە اسىرۋ بارىسى قارالدى. اتقارىلعان جۇمىستار تۋرالى ۇلتتىق ەكونوميكا ءمينيسترى اسەت ەرعاليەۆ, قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى ولەگ سمولياكوۆ, «اتامەكەن»ۇكپ باسقارما توراعاسى ابىلاي مىرزاحمەتوۆ, پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ, سونداي-اق تۇركىستان جانە الماتى وبلىستارىنىڭ اكىمدەرى ومىرزاق شوكەەۆ پەن اماندىق باتالوۆ باياندادى.
ۇلتتىق ەكونوميكا ءمينيسترى ءا.ەرعاليەۆ ءوز بايانداماسىندا اتاپ وتكەندەي, پاندەميا جانە كاسىپكەرلەردىڭ قىزمەتىنە ەنگىزىلگەن شەكتەۋلەر جاعدايىندا شاعىن جانە ورتا بيزنەستى قولداۋ ەرەكشە وزەكتىلىككە يە بولىپ وتىر. وسىعان بايلانىستى بيىل ۇلتتىق بانكتىڭ اينالىم كاپيتالىن تولىقتىرۋعا جەڭىلدىكپەن كرەديت بەرۋ باعدارلامالارى, سونداي-اق «بيزنەستىڭ جول كارتاسى – 2025», «قاراپايىم زاتتار ەكونوميكاسى», «ەڭبەك» جانە «جۇمىسپەن قامتۋ جول كارتاسى» باعدارلامالارى شەڭبەرىندە شاعىن جانە ورتا بيزنەستى جەڭىلدىكپەن كرەديتتەۋ بويىنشا جۇمىس جالعاسۋدا. كرەديتتەر بويىنشا جىلدىق مولشەرلەمە 6 پايىزدى قۇرادى. اينالىم كاپيتالىن تولىقتىرۋدى قارجىلاندىرۋ ەداۋىر كەڭەيتىلىپ, كرەديتتەر سوماسى ۇلعايتىلدى. ميكرو جانە شاعىن كاسىپكەرلىك سۋبەكتىلەرىنە قولجەتىمدى ميكروكرەديت بەرۋ ىسكە قوسىلدى. وسى جىلدىڭ ءبىرىنشى جارتىجىلدىعىندا 1 ترلن تەڭگەدەن اسا سوماعا 31 مىڭنان اسا جوبا جەڭىلدىكپەن قارجىلاندىرۋعا قول جەتكىزدى. «وسى جىلدىڭ قورىتىندىسى بويىنشا جەڭىلدەتىلگەن نەسيە بەرۋمەن جالپى نەسيە قورجىنى 2,5 ترلن تەڭگە بولاتىن 47 مىڭنان اسا جوبانى قامتۋ جوسپارلانۋدا», دەدى ءا.ەرعاليەۆ.
ماسەلەنى ۇكىمەت باسشىسى اسقار مامين تۇيىندەدى. وسى جىلدىڭ ءبىرىنشى جارتىجىلدىعىنىڭ قورىتىندىسى بويىنشا «قاراپايىم زاتتار ەكونوميكاسى» باعدارلاماسى اياسىندا 142 ملرد تەڭگە سوماسىنا 334 جوبا قارجىلاندىرىلدى. وسى جىلدىڭ سوڭىنا دەيىن 424 ملرد تەڭگە سوماسىنا 724 جوباعا قولداۋ كورسەتۋ جوسپارلانىپ وتىر. قازىرگى كەزەڭدە بجك-2025 باعدارلاماسى بويىنشا جالپى سوماسى 492 ملرد تەڭگەگە 23 مىڭعا جۋىق جوباعا قولداۋ كورسەتىلدى. وسى جىلدىڭ سوڭىنا دەيىن شامامەن 1,2 ترلن تەڭگە سوماسىنا 32 مىڭعا جۋىق جوباعا قولداۋ كورسەتىلەدى. 2021 جىلدىڭ قورىتىندىسى بويىنشا اتالعان باعدارلامالارمەن 90 مىڭنان اسا جۇمىس ورنى قامتىلادى. بيزنەستى قولداۋدىڭ بارىنشا سۇرانىسقا يە باعىتتارى – ساۋدا (47%), قىزمەت كورسەتۋ سالاسى (15%), وڭدەۋ ونەركاسىبى (13%), كولىك جانە قويمالاۋ (9%), سونداي-اق قۇرىلىس سالاسى. بۇگىنگى تاڭدا باعدارلامالار اياسىندا كاسىپكەرلەردى قولداۋعا باعىتتالعان 1 تەڭگە سۋبسيديا بيۋدجەتكە التى ەسەدەن اسا سالىقتىق تۇسىمدەر تۇرىندە قايتارىلادى. «پاندەميا جاعدايىندا ۇكىمەتتىڭ «اتامەكەن» ۇكپ-مەن بىرلەسىپ قابىلداپ جاتقان بيزنەستى قولداۋدىڭ داعدارىسقا قارسى شارالارى ءوز تيىمدىلىگىن كورسەتتى. اتالعان باعدارلامالار اياسىندا جوسپارلانعان شارالار وسى جىلدىڭ سوڭىنا دەيىن تولىق كولەمدە جۇزەگە اسىرىلۋى ءتيىس», دەپ اتاپ ءوتتى ا.مامين.
