سپورت • 03 تامىز، 2021

ەندى ەركىن كۇرەسكە ەلەڭدەيمىز...

68 رەت كورسەتىلدى

ەركىن كۇرەستەن اسەت سەرىكباەۆ باپتايتىن قازاقستان قۇراماسىنىڭ بالۋاندارى 4 تامىزدا وليمپيا ويىندارىنداعى العاشقى بەلدەسۋلەرىن باستايدى. 2016 جىلى ريو-دە-جانەيرودا وتكەن وليمپيادادا ەركىن كۇرەس بالۋاندارى التى سالماقتىڭ بەسەۋىندە جولداما الىپ تۇرىپ، بىردە-ءبىر بالۋانىمىز جۇلدە الماي قايتقان ەدى. بيىل دا ەركىن كۇرەس شەبەرلەرى بەس سالماقتا بەلدەسەدى. ناتيجەسى قالاي بولار ەكەن؟

وليمپيا ويىندارىنا 41 ەلدەن 96 بالۋان قاتىسادى. بۇلاردىڭ ىشىندە ەكى مەملەكەت قانا تولىق قۇراممەن قاتى­سادى. ولار – رەسەي مەن يران. قازاقستان قۇراماسى التى سالماقتىڭ بەسەۋىنەن جولداما الدى. بۇل كورسەتكىش بويىنشا اقش قۇراماسىمەن قاتار تۇرمىز. وزبەكستان، جاپونيا، ءۇندىستان، تۇركيا سياقتى كۇرەس تۇرلەرى جاقسى دامىعان ەلدەردىڭ وزىندە ءتورت جولدامادان عانا بار. سونداي-اق بەلارۋس پەن الجير ەلدەرىنىڭ بالۋاندارى دا ءتورت سالماقتا بەلدەسەدى. ال ازەربايجان، قىتاي، كۋبا، گرۋزيا، موڭعوليا سياقتى ەلدەر وليم­پياداعا ءۇش سالماقتا عانا بالۋاندارىن اكەلگەن.

دەگەنمەن ءبىز ءۇشىن جولدامانىڭ سانى ەمەس، ساپاسى ماڭىزدىراق.

 

* * *

ەركىن كۇرەس بالۋاندارىنىڭ 1996 جىلدان بەرگى ناتيجەلەرىنە كوز سالساق، تەك سوڭعى وليمپيا ويىندارىندا عانا قورجىنىمىزدىڭ بوس قايتقانىن باي­قاۋعا بولادى. ماسەلەن، اتلانتاداعى العاشقى وليمپيادادا ماۋلەن مامىروۆ قازاق ەلىن قولا مەدالىمەن قۋانتتى. ودان كەيىن سيدنەيدە يسلام بايرامۋكوۆ كۇمىس مەدال السا، 2004 جىلى گەننادي لا­ليەۆ تاعى دا تۇعىر بيىگىنەن كورىنىپ، قازاقستان قۇراماسىنا كۇمىس مەدال سىيلادى.

2008 جىلى قىتاي استاناسىندا ماريد مۋتاليموۆ قولا مەدالعا يە بولدى. ارادا ءتورت جىل وتكەندە اقجۇرەك تاڭاتاروۆ پەن داۋلەت شابانباي ءداستۇر ساباقتاستىعىن بۇزباي لوندون تورىندە قورجىنعا قولا مەدال سالدى.

 

* * *

ەركىن كۇرەس – الەمدە قارىشتاپ دامىپ كەلە جاتقان كۇرەس تۇرلەرىنىڭ ءبىرى. اسىرەسە رەسەي، اقش، يران، جاپونيا، ازەربايجان سياقتى ەلدەردە ەركىن كۇرەستىڭ ەڭسەسى باسقا كۇرەس تۇرلەرىنە قاراعاندا جوعارى. وليمپيا ويىندارىندا التى سالماقتىڭ مەدالىن «كوكپارعا» سالاتىن دا وسى ەلدىڭ بالۋاندارى. قازاقستاندىق بالۋانداردىڭ باستى قار­سىلاستارى دا وسىلار ەكەنى داۋسىز.

 وسىدان ەكى جىل بۇرىن نۇر-سۇلتاندا وتكەن الەم چەمپيوناتىندا قولا جۇلدە العان نۇريسلام ساناەۆ توكيودا مەدال الۋى مۇمكىن دەگەن ۇمىتكەرلەرىمىزدىڭ ءبىرى. نۇريسلامنىڭ باستى قارسىلاسى – ءسوز جوق، رەسەيلىك زاۋر ۋگۋەۆ. ول – الەمنىڭ ەكى دۇركىن چەمپيونى. سونداي-اق كىلەم قوجايىنى يۋكي تاكاحاسي دە «وليمپ شىڭىنا شىعامىن» دەپ بەلدى بەكەم بۋىپ وتىر. وسىدان ون ءبىر جىل بۇرىن جاپون سپورتشىسى جاسوسپىرىمدەر اراسىندا وتكەن وليمپيا ويىندارىندا توپ جارعانى ەسىمىزدە. سودان بەرى ەرەسەكتەر اراسىندا الەم چەمپيونى اتاندى. ازيا ويىندارىنىڭ قولا جۇلدەسىن جەڭىپ الدى. ازيا چەمپيونى دەگەن اتاعى تاعى بار. جاسى 27-دە. قىسقاسى، جاپوندىق بالۋاننىڭ تاجىريبەسى تولىسقان، ناعىز بابىنداعى كەزى.

وردا بۇزار جاسقا جەتكەن نۇريس­لام ساناەۆ تا وسال ەمەس. ريو وليم­پياداسىنىڭ قارساڭىندا قازاقستان ازاماتتىعىن العان بالۋان سودان بەرى حالىقارالىق ارەنادا ەلىمىزدىڭ اتىن شىعارىپ ءجۇر. برازيليا استاناسىندا جولى بولمادى دەمەسەڭىز، ازيا چەمپيو­نى، الەم چەمپيوناتىنىڭ كۇمىس جانە قولا جۇلدەگەرى اتاندى. كوپتەگەن كۇرەس مامانى توكيو وليمپياداسىنىڭ باس جۇلدەسىن ۋگۋەۆ پەن ساناەۆ ساراپقا سالادى دەگەندى ايتادى.

توكيودا ءۇمىت ارتىپ وتىرعان بالۋان­دارىمىزدىڭ ءبىرى – 74 كيلوداعى دانيار قايسانوۆ. بىردەن ايتايىق، ەگەر دانيارعا جاپونيا جەرىندە جۇلدە بۇيىرىپ جاتسا، شىعىسقازاقستاندىق بالۋان ءۇشىن بۇل ۇلكەن جەتىستىك بولار ەدى. ويتكەنى 74 كيلودا كىلەڭ مىقتىلار توپتاسقان. بارلىعىنا جەكە-جەكە توقتالماي، ءۇش بالۋاننىڭ عانا ەسىمىن اتايىق. ولار الەم چەمپيوناتىنىڭ ەكى دۇركىن جە­ڭىمپازدارى – فرانك چاميزو (يتاليا)، زاۋربەك سيداكوۆ (رەسەي)، كايل دەيك (اقش).

وليمپيا ويىندارىندا بوزكىلەمگە شىعاتىن بەس بالۋاننىڭ ىشىندە داۋلەت نيازبەكوۆ سياقتى تاجىريبەلى بالۋاندارىمىزبەن قاتار الىشەر ەرعالي، يۋسۋپ باتىرمۇرزاەۆ سياقتى جاس بالۋاندارىمىز دا بار.

ەركىن كۇرسە بالۋاندارى قاشان بەل­دەسەدى؟

4 تامىز. نۇريسلام ساناەۆ (57 كگ)

5 تامىز. دانيار قايسانوۆ (74 كيلو)، يۋسۋپ باتىرمۇرزاەۆ (125 كگ)

6 تامىز. داۋلەت نيازبەكوۆ (65 كيلو)، الىشەر ەرعالي (97 كگ).

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار