سەنات دەپۋتاتى «رازدولنوە – سۆوبودنوە – ەسىل» اۆتوجولىنداعى كوپىر قۇرىلىسىنىڭ بارىسىن قاراپ, بۇزىلىق اۋىلدىق وكرۋگىنىڭ جاڭادان سايلانعان اكىمىمەن كەزدەستى. داۋرەن ادىلبەكوۆ جەرگىلىكتى ماڭىزى بار ماسەلەلەردى ۋاقتىلى شەشۋ قاجەتتىگىنە اكىمنىڭ نازارىن اۋداردى.
سەناتور ەگەر قازىرگى كۇردەلى ماسەلەلەر جەرگىلىكتى دەڭگەيدە شەشىلمەيتىن بولسا, وندا ولاردى شەشۋگە اتسالىسۋعا ءازىر ەكەنىن اتاپ ءوتتى. وڭىردەگى سونداي پروبلەمالاردىڭ ءبىرى – جول قۇرىلىسىنىڭ ساپاسى. وسىعان وراي, سەناتور «بۇزىلىق – الماتى» اۆتوموبيل جولىن جوندەۋ جۇمىستارىنىڭ بارىسىن تەكسەردى.
ء«وڭىر تۇرعىندارى ماعان وسى اۆتوموبيل جولى ۋچاسكەسىن جوندەۋ قاجەتتىگى تۋرالى ايتقان بولاتىن. سوندىقتان قازىر اۆتوموبيل جولدارى باسقارماسى مەن مەردىگەر ۇيىمدار وسى جۇمىستاردىڭ ءبارىن ۋاقىتىندا اياقتاۋى ماڭىزدى دەپ سانايمىن. ەكىنشى جاعىنان, قوعامدىق باقىلاۋدىڭ دا ماڭىزى زور», دەدى سەناتور.
داۋرەن ادىلبەكوۆ جارقايىڭ اۋدانىندا كرۋپسكايا اتىنداعى مەكتەپتىڭ جاڭا وقۋ جىلىنا دايىندىق بارىسىمەن تانىستى جانە جەرگىلىكتى شارۋا قوجالىقتارىنىڭ بىرىندە بولدى. سەناتور مال ازىعىن ۋاقتىلى دايىنداۋدىڭ جانە اۋىل شارۋاشىلىعى تەحنيكاسىن الداعى ەگىن جيناۋ ناۋقانىنا ازىرلەۋدىڭ ماڭىزدى ەكەنىن اتاپ ءوتتى.
سەناتور ساپار بارىسىندا قۇرىلىس الاڭدارىندا بولدى جانە جاقسى اۋدانىنىڭ قايتا وڭدەۋ كاسىپورىندارىنىڭ جۇمىسىمەن تانىستى.
