– وتكەن اپتادا ناۋقاستار سانى 1,2 ەسەگە ءوستى. قاۋىپتى ىندەتتىڭ جۇعۋ وشاعى ادامدار كوپ جينالاتىن ورىندار بولىپ تۇر. ناۋقاستاردىڭ تەڭ جارتىسى تۇنگى كلۋبتار, تويلار, ەسكە الۋ ءىس-شارالارى مەن ساۋدا ۇيلەرىندە, بازارلاردا, قوعامدىق تاماقتانۋ ورىندارىندا جۇقتىرادى. سونداي-اق 23,8 پايىزى – ناۋقاستارمەن جاقىن قارىم-قاتىناستا بولعاندار. ال 17,7 پايىزىنىڭ قوعامدىق كولىكتەرمەن ءجۇرۋ كەزىندە جۇقتىرعانى انىقتالدى, – دەيدى م.تاناۋوۆ.
ال وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى قايسار ابداليەۆتىڭ ايتۋىنشا, كۇردەلى ەپيدەميالىق احۋال قالىپتاسىپ وتىر. بىلتىرعى التى ايدا كوروناۆيرۋس ينفەكتسياسىنان 110 ادام قايتىس بولعان ەدى. ال بيىلعى قاڭتاردان بەرى قايتىس بولعاندار ادامداردىڭ سانى 233-كە جەتتى. ەپيدەميالىق احۋالدىڭ كۇردەلەنۋىنە بايلانىستى دارىگەرلەرگە سالماق تۇسەتىنى داۋسىز. قازىر وڭىردە
6 575 مەديتسينا قىزمەتكەرى بار. ونىڭ ىشىندە دارىگەرلەر سانى – 1 479, ال ورتا جانە كىشى مەديتسينا قىزمەتكەرلەرىنىڭ قۇرامى – 5 096 ادام. ونىڭ ىشىندە 375 اق حالاتتى اۋرۋحانالارداعى ينفەكتسيالىق ستاتسيونارلاردىڭ «قىزىل ايماعىندا» جۇمىس ىستەيدى. تاعى 275 قىزمەتكەر رەزەرۆكە الىنىپتى.
قازىر 41 ۆاكتسينالاۋ بەكەتى جۇمىس ىستەيدى. ونىڭ ىشىندە جىلجىمالى 10 بەكەت بار. جىل باسىنان بەرى ۆاكتسينالاۋ بەكەتتەرىنە تاراتىلعان 141 200 دوزا ۆاكتسينانىڭ 93 پايىزى يگەرىلگەن. وتكەن اپتادا تاعى دا رەسەيلىك سپۋتنيك V ۆاكتسيناسىنىڭ ەكىنشى كومپونەنتىنە ارنالعان 10 مىڭ دوزاسى جەتكىزىلدى. ال وبلىستىق پەريناتالدىق جانە كارديولوگيا ورتالىقتارىندا, وبلىستىق, مودۋلدىك, №2 وبلىستىق اۋرۋحانالاردا, قۇرمانعازى, قىزىلقوعا, يندەر اۋداندىق اۋرۋحانالارىندا 8 وتتەگى ستانساسى جۇمىس ىستەپ تۇر. سونداي-اق 1 514 پۋلسوكسيمەتر, 669 وتتەگى كونتسەنتراتورى, 272 وكپەنى جاساندى جەلدەتۋ, 13 كومپيۋتەرلىك توموگرافيا, 41 رەنتگەن, 4 مرت اپپاراتتارى, 113 جەدەل مەديتسينالىق كومەك كولىگى مەن 7 جىلجىمالى مەديتسينالىق كەشەن بار.
ءبىر ايدان اسا مەرزىمنەن بەرى «قىزىل ايماقتاعى» وڭىردە كوروناۆيرۋس ينفەكتسياسىن جۇقتىرۋ توقتار ەمەس. ماسەلەن, 24-26 شىلدەدە 1 346 ادامنان قاۋىپتى ۆيرۋستىڭ بەلگىسى تابىلعان. اسىرەسە, ناۋقاستاردىڭ سانى اتىراۋ قالاسىندا كوبەيىپ بارادى. وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ دەرەگىنە سۇيەنسەك, ءۇش كۇننىڭ ىشىندە مۇنايلى شاھاردا كوروناۆيرۋسقا شالدىققان 976 پاتسيەنت انىقتالىپتى. سونداي-اق سوڭعى ءۇش كۇندە تەڭىز كەنىشىنەن 103, جىلىوي اۋدانىنان 115 ناۋقاستىڭ تىركەلۋى الاڭداتپاي قويمايدى.
كوروناۆيرۋس جۇقتىرىپ, ۇيىندە ەمدەلۋ ءۇشىن وقشاۋلانعاندار سانى دا ارتا ءتۇستى. قازىر 3 839 ادام ءۇي جاعدايىندا ەم-دوم قابىلداپ جاتىر. بۇعان قوسا ينفەكتسيالىق ستاتسيونارلارداعى ناۋقاستار سانى 1 325 ادامعا جەتتى. جاعدايى ناشارلاعان 78 ناۋقاس جانساقتاۋ بولىمىنە تۇسكەن. ونىڭ ىشىندە 10 پاتسيەنت وكپەنى جاساندى جەلدەتۋ اپپاراتىنا قوسىلعان.
وڭىردەگى ەپيدەميالىق احۋال كۇردەلەنگەن سوڭ كارانتيندىك شەكتەۋ مەن ساقتىق شارالارى قايتادان كۇشەيتىلدى. ماسەلەن, بارلىق دەڭگەيدەگى اكىمدىكتەردىڭ قىزمەتكەرلەرى مەن كەلۋشىلەر اshyq باعدارلاماسىن قولدانادى. ولار كوروناۆيرۋس ينفەكتسياسىنا قاتىستى مارتەبەسىن كورسەتۋ ارقىلى كىرە الادى.
– بۇل تالاپ وبلىستىق, قالالىق, اۋداندىق جانە اۋىلدىق وكرۋگ اكىمدىكتەرىندە جۇزەگە اسىرىلادى. مۇنداعى ماقسات – ادامداردىڭ ساۋلىعىن ساقتاپ, قاۋىپسىزدىگىن قامتاماسىز ەتۋ. وڭىردە ءساۋىر ايىنان بەرى Ashyq باعدارلاماسىنا كاسىپكەرلەر تاراپىنان 812 ءوتىنىش ءتۇستى. ونىڭ ىشىندە 781 نىسانعا QR-كود بەرىلدى. كەلۋشىلەردى تىركەمەگەنى ءۇشىن 13 نىسان باعدارلامادان ەكى اپتاعا شىعارىلدى. ال 577 كاسىپكەرلىك نىسانى تەستتىك رەجىمنەن ءوتتى, – دەپ حابارلادى وبلىستىق اكىمدىكتىڭ ءباسپاسوز قىزمەتى.
اتىراۋ وبلىسى
