الدىڭعى ەكى اپتامەن سالىستىرعاندا سوڭعى ەكى اپتادا رەسپۋبليكا بويىنشا بارلىق وڭىردە سىرقاتتانۋشىلىقتىڭ ءوسۋى بايقالعان. سىرقاتتانۋشىلىقتىڭ ءوسۋى 1,9 ەسەنى قۇراپ وتىر. ماۋسىم ايىمەن سالىستىرعاندا ورتاشا تاۋلىكتىك سىرقاتتانۋشىلىق دەڭگەيى 5,2 ەسە ءوستى. 1 شىلدەمەن سالىستىرعاندا ەلىمىزدە ينفەكتسيالىق جانە رەانيماتسيالىق توسەكتىك ورىنمەن قامتۋ 3 ەسە ۇدەمەلى تۇردە وسكەنى بايقالادى, وسىعان بايلانىستى ەلىمىزدە توسەك قورى 1,4 ەسە ۇلعايتىلعان. بيىلعى 28 شىلدەدەگى جاعداي بويىنشا رەسپۋبليكا بويىنشا ينفەكتسيالىق توسەكتىك ورىندارمەن قامتۋ 53%-دى, رەانيماتسيالىق توسەكتىك ورىندارمەن قامتۋ 43%-دى قۇرايدى. الماتى, شىمكەنت قالالارىندا, اقتوبە, تۇركىستان جانە قىزىلوردا وبلىستارىندا ينفەكتسيالىق جانە رەانيماتسيالىق توسەكتىك ورىنمەن قامتۋدىڭ جوعارى قارقىنى بايقالادى.
«قازىرگى ۋاقىتتا دەنساۋلىق ساقتاۋ جۇيەسى بىلتىرعىمەن سالىستىرعاندا ەكى ەسە جۇكتەمەمەن جۇمىس ىستەۋدە. وتكەن جىلى سىرقاتتانۋشىلىق تاۋلىگىنە 2 مىڭ ادامدى قۇراعان بولسا, بيىلعى شىلدە ايىندا سىرقاتتانۋ دەڭگەيى 3 ەسەدەن استامدى قۇراپ وتىر. ەمدەلىپ جاتقان پاتسيەنتتەردىڭ سانى دا 2 ەسەگە ارتتى», دەدى ا.تسوي.
بۇگىنگى كۇنى ەلىمىز بويىنشا 90 مىڭعا جۋىق ادام كوروناۆيرۋسپەن اۋىرىپ جاتىر. ونىڭ 25 مىڭعا جۋىعى – ستاتسيونارلاردا, 65 مىڭعا جۋىعى امبۋلاتوريالىق ەم الۋدا. سونىمەن قاتار شىلدە ايىنىڭ باسىمەن سالىستىرعاندا اۋىر جاعدايداعى ناۋقاستاردىڭ سانى 2,1 ەسە ءوستى, 1 مىڭعا جۋىق ناۋقاس وكپەنى جاساندى جەلدەتۋ اپپاراتتارىنا قوسىلعان. ءمينيستردىڭ ايتۋىنشا, بىرقاتار وڭىرلەردە ينفەكتسيالىق جانە رەانيماتسيالىق توسەكتىك ورىن تاپشىلىعى ورىن الۋى مۇمكىن. تاۋەكەل ايماعىندا نۇر-سۇلتان, شىمكەنت قالالارى جانە بىرقاتار وبلىستار بار.
«بىرقاتار وڭىرلەردىڭ دەنساۋلىق ساقتاۋ جۇيەسى جوعارى جۇكتەمەمەن جۇمىس ىستەپ جاتىر. بۇگىنگى كۇنى بىرقاتار وڭىرلەردەگى كوۆيدتىك ستاتسيونارلاردا ورىن تولىق, بۇل دەنساۋلىق ساقتاۋ جۇيەسىنىڭ شامادان تىس جۇكتەمەسىنە, حالىققا مەديتسينالىق كومەك ۋاقتىلى جەتپەۋىنە جانە سىرقاتتانۋدىڭ وسۋىنە, ينفەكتسيانىڭ ودان ءارى تارالۋىنا الىپ كەلۋى مۇمكىن», دەپ حابارلادى ا.تسوي.
قازاقستان بويىنشا جالپى سىرقاتتانۋشىلىق پەن ءولىمنىڭ 65%-ى نۇر-سۇلتان, الماتى, شىمكەنت, اتىراۋ, قاراعاندى قالالارىندا تىركەلگەن. وسىعان بايلانىستى 27 شىلدەدە ۆەدومستۆوارالىق كوميسسيانىڭ شەشىمىمەن اتالعان وڭىرلەردە 2 تامىزدان باستاپ, كارانتين شارالارى كۇشەيتىلەدى.
بۇگىنگى كۇنى كۆي-گە قارسى ۆاكتسينانىڭ ءبىرىنشى دوزاسى ءاربىر ەكىنشى ەرەسەك قازاقستاندىققا ەگىلەدى. ۆاكتسينانىڭ 8,6 ملن دوزاسى پايدالانىلدى, ونىڭ ىشىندە 1-ءشى كومپونەنتىمەن 5 230 750 ادام ەگىلدى, بۇل ۆاكتسينا الۋعا ءتيىس حالىقتىڭ 52,8%-ىن قۇرايدى.
ەكىنشى كومپونەنتپەن 3 436 617 ادام قامتىلدى. ەگۋ پۋنكتتەرىندە شامامەن 713 مىڭ ءبىرىنشى كومپونەنت جانە 1 ملن 300 مىڭ ەكىنشى كومپونەنت بار. مينيستر ناۋقاستاردىڭ 99,9%-ى ۆاكتسينالانباعانىن, بۇل يممۋنداۋدىڭ قاۋىپسىزدىگى مەن تيىمدىلىگىن راستايتىنىن اتاپ ءوتتى.
«سوندىقتان ءاربىر قازاقستاندىق ۆاكتسينالاۋ تۋرالى سانالى شەشىم قابىلداي ءبىلۋى كەرەك. ءار ازامات ءوزىن, جاقىندارىن سىرقاتتان قورعاۋعا مۇددەلى بولىپ, ۇجىمدىق يممۋنيتەتتى كۇشەيتۋگە اتسالىسۋى قاجەت. كوروناۆيرۋستىڭ تۇراقتى تۇردە بولا بەرەتىن مۋتاتسياسى كەزىندە بۇل – قورعانۋدىڭ جالعىز جولى», دەدى مينيستر.
ا.تسوي بۇگىنگى كۇنى ۆاكتسينالاۋ كوروناۆيرۋستىق ينفەكتسيادان بولاتىن اۋىر اعىم مەن ءولىمدى بولدىرماۋدىڭ جالعىز ءتيىمدى ءادىسى ەكەنىن تاعى دا ەسكە سالدى.
