سپورت • 28 شىلدە، 2021

جەڭىسكە سان ەمەس، ساپا جەتەلەيدى

49 رەت كورسەتىلدى

گاپ ساندا ەمەس، ساپادا ەكەنىنە توكيو تورىندە  ابدەن كوزىمىز جەتتى. ەكى ميلليونعا جەتەر-جەتپەس حالقى بار كوسوۆونىڭ سپورتشىلارى  ءتورت كۇننىڭ ىشىندە وليمپيادانىڭ 2 التىن مەدالىن الىپ، ەلىنىڭ ءانۇرانىن اسقاقتاتا شىرقاتتى.  ال بار بولعانى 9 سپورتشىمەن وليمپيادا قالاشىعىنا ات باسىن تىرەگەن تۇرىكمەندىك سپورتشىلاردىڭ ىشىنەن زىلتەمىرشى پولينا گۋرەۆا  كۇمىس مەدال يەلەندى. ال 90-نان اسا سپورتشىمەن توكيوعا بارعان قازاقستاننىڭ ەنشىسىندە 3 قولا عانا بار...

ازىرگە  ەلدىڭ ءانۇرانىن شىرقاتاتىن سپورتشى بولماي تۇر. ەندىگى بار ءۇمىت ەلەنا رىباكينادا بولماق. كەشە قازاق­ستاندىق تەننيسشى وليمپيادانىڭ جارتىلاي فينالىنا جولداما الدى. بۇل ەلىمىزدىڭ تەننيسى ءۇشىن دە، رىباكينا ءۇشىن دە تاريحي جەتىستىك. ەلەنا شيرەك فينالدا يسپانيالىق گاربينە مۋگۋرۋسانى جەڭدى ‒ 7:5، 6:1. ماتچ الدىندا گراند سلام جارىستارىنىڭ جە­ڭىمپازى مۋگۋرۋسا فاۆوريت ەدى. بىراق جەرلەسىمىز وتكىزگەن ءۇش ويىننىڭ بار­لىعىن ەكى سەتپەن اياقتادى. ەن­دىگى قارسىلاس ‒ بەليندا بەنچيچ. شۆەي­تساريالىق تەننيسشى رەيتينگتە جوعارى تۇرعانىمەن كورتتا كۇتپەگەن جاعداي كوپ بولادى. ونىڭ ۇستىنە، رولان گار­روستىڭ شيرەك فينالىنا، ۋيمبل­دون­نىڭ ءتورتىنشى اينالىمىنا دەيىن جەتكەن رىباكينا قاتارىنان ءۇش تۋرنيردە جاقسى ويىن ورنەگىن كورسەتىپ كەلەدى.

«مەنىڭ بۇگىنگى قارسىلاسىم وتە تاجىريبەلى. سوندىقتان ماتچ قيىن ءوت­تى. جەڭىسكە جەتەم دەگەن ويمەن شىق­­­تىم. الدىڭعى ماتچتاردا جوق جەر­دەن قاتەلەسىپ، كەرەك ەمەس جەردە ۇپاي جوعالتتىم. بۇگىنگى ويىندا سول قا­تەلىكتەردى جىبەرمەۋگە تىرىس­تىم. قار­سىلاسقا مۇمكىندىك بەرمەۋ ءۇشىن با­رىمدى سالدىم. سول سەبەپتى، بۇ­گىنگى جەڭىسىم ءۇشىن وتە قۋانىشتىمىن. جارتىلاي فينالداعى قارسىلاسىممەن بۇرىن ويناپ كورمەگەنمىن. تەك جاتتىعۋ كەزدەرىندە عانا جولىمىز ءتۇيىستى. الداعى ويىن دا وڭاي بولمايدى. دوپتى ويىنعا ءساتتى قوسۋ ارقىلى ۇپاي جيناۋعا تىرىسامىن. سەبەبى بۇل مەنىڭ قولىمنان كەلەدى»، دەدى رىباكينا.

التىن جۇلدە الادى-اۋ دەگەن بوكس­شىمىز بەكزات نۇرداۋلەتوۆ كۇتپەگەن جەردەن العاشقى جەكپە-جەگىندە جەڭىلىس تاپتى. 81 كيلوعا دەيىنگى سالماقتا باق سىناعان بەكزات رەسەيلىك يمام حاتاەۆ­پەن كەزدەسكەن بولاتىن. تارتىستى كەزدەسۋدە تورەشىلەر 4:1 ەسەبىمەن جەڭىستى رەسەيلىك بوكسشىعا بەردى. 57 كيلوعا دەيىنگى سالماقتا سىنعا تۇسكەن سەرىك تەمىرجانوۆ امەريكالىق ديۋك رەگاننان 0:5 ەسەبىمەن جەڭىلىپ قالدى. 75 كيلوعا دەيىنگى سالماقتا جۇدىرىقتاسقان نا­دەجدا ريابەتس الەم چەمپيوناتىنىڭ قولا جۇلدەگەرى، كانادالىق تامارا تيبومەن كەزدەسىپ 1:4 ەسەبىمەن ەسەسى كەتتى.

وليمپيادادا باستى ۇمىتكەردىڭ ءبىرى بولعان دميتري بالاندين 200 مەتر قاشىقتىقتى براسس ادىسىمەن جۇزۋدەن فينالعا وتە المادى. نەگىزى، ءبالانديننىڭ ناتيجەلەرى ريو وليمپياداسىنان كەيىن تومەندەي باستاعان-دى. 2017 جىلعى الەم چەم­پيوناتىندا جۇلدەسىز قالدى. 2019 جىلعى الەم چەمپيوناتىندا 2:08،25 مينۋت كورسەتكىشپەن 7-ورىن العان ەدى. سوعان قاراماستان، وتانداسىمىز كەم دەگەندە ۇزدىك ۇشتىكتەن كورىنىپ قالار دەپ ويلاعان ەدىك. الايدا ريو وليمپياداسىندا 2:07،46 مينۋت كورسەت­كىشپەن التىن العان جەرلەسىمىز توكيودا 200 مەتردى 2:09،22 مينۋتتا ءجۇزىپ ءوتىپ، بار-جوعى 11-ورىنعا تۇراقتادى.

ال الەكسەي لۋتسەنكونى كوپ مامان لوندون وليمپياداسىنىڭ چەمپيونى الەكساندر ۆينوكۋروۆتىڭ جەتىستىگىن قايتالايدى دەپ سەنگەن ەدى. ال سەنىم ارتقان ۆەلوشاباندوزىمىزدى، ءتىپتى ۇزدىك وتىزدىقتىڭ قاتارىنان دا كورە المادىق. توكيودا ۆەلوسپورتتان ەرلەر اراسىنداعى باسەكە تولىق اياقتالىپ، جەڭىمپازدار مەن جۇلدەگەرلەر ءتىزىمى انىقتالدى. قازاقستاندىق الەكسەي لۋتسەنكو جەكەلەي سىن قورىتىندىسى بويىنشا 32-ورىننان كورىندى. ول 44،2 شاقىرىمدى 1 ساعات 02 مينۋت 21.67 سەكۋندتا ءجۇرىپ ءوتتى. لۋتسەنكو جارىس جەڭىمپازى اتانعان سلوۆەنيالىق پريموز روگليكتەن 7 مينۋت 17.48 سەكۋندقا قالىپ قويدى.  بۇل باسەكەدە كۇمىس جۇلدەنى توم دۋمۋلين (نيدەرلاند)، قولانى روحان دەننيس (اۋستراليا) ەنشىلەدى. 

دزيۋدوشى يسلام بوزباەۆ ءۇشىن وليمپيادا ءساتتى باستالىپ ەدى. 90 كيلو سالماقتا باق سىناعان بوزباەۆ العاشقى اينالىمدا برازيليالىق رافاەل ماكەدومەن كەزدەسكەن بولاتىن. جەرلەسىمىز قارسىلاسىن نەبارى 31 سەكۋندتا «يپپون» ادىسىمەن جەڭگەنىمەن، ەكىنشى اينالىمدا جەڭىلىپ قالدى. ازەربايجاندىق ءمامادالى مەحديەۆكە قارسى وتكەن كەزدەسۋدىڭ نەگىزگى ۋاقى­تىندا جەڭىمپازدار انىقتالعان جوق. ال قوسىمشا ۋاقىتتا ازەربايجاندىق بالۋان ءادىس جاساپ، «ۆازاري» ادىسىمەن بوزباەۆتان باسىم ءتۇستى. وسىلايشا، دزيۋدودان قازاقستان قۇراماسى توكيو وليمپياداسىن ەلدوس سمەتوۆتىڭ جالعىز عانا قولا جۇلدەسىمەن اياقتادى.

قازاقستاندىق ساداقشى سانجار مۇساەۆ تا العاشقى اينالىمدا قارسى­لاسىنا ەسە جىبەردى. قىتاي سپورتشىسى داپەنگ ۆانگپەن سىنعا تۇسكەن ول، 6:4 ەسەبىمەن قارسىلاسىنا جول بەردى.

سپورتتىق گيمناستيكادان ءۇش جات­تىعۋ بويىنشا فينالعا جولداما العان ميلاد كاريمي كەشە كوپسايىستان سىنعا تۇس­كەنىمەن، جۇلدەگەرلەر قاتارىنان كو­رىنە المادى. ەستەرىڭىزگە سالا كەتسەك، ميلاد ەركىن جاتتىعۋدا 8-ورىن يەلە­نىپ، فينالعا جولداما العان-دى. ال گيمناستيكالىق كەرمەدەگى جاتتىعۋ بو­يىنشا ىرىكتەۋدە 14،766 ۇپاي جيناپ، ەكىنشى ناتيجە كورسەتكەن ەدى. ءدال وسى جاتتىعۋ بويىنشا 3 تامىزدا وتەتىن سايىستا ميلادتان مەدال كۇتەمىز.

سونداي-اق تەننيستەن ارالاس جۇپ­تىق سايىستىڭ العاشقى كەزەڭىندە ياروسلاۆا شۆەدوۆا مەن اندرەي گولۋبەۆ جاپونيالىق ەننا شيباحارا جانە بەن ماكلاكلان جۇبىنا قارسى ونەر كورسەتتى. ەكى سەتكە سوزىلعان ماتچتا قازاق­ستاندىق تەننيسشىلەر 3:6، 6:7 ەسەبى­مەن قارسىلاسقا جول بەردى.

 

الماس ماناپ،

«Egemen Qazaqstan» – توكيودان (جاپونيا)

 

سوڭعى جاڭالىقتار

مارافون نەسىمەن ماڭىزدى؟

الەم • 26 قىركۇيەك، 2021

تاعدىرى تەمىردەي شىڭداعان قايراتكەر

قازاقستان • 26 قىركۇيەك، 2021

شەكتەۋدە شيرىققان شاعىن بيزنەس

بيزنەس • 26 قىركۇيەك، 2021

پياندج وزەنىندەگى ەرلىك

تاريح • 26 قىركۇيەك، 2021

ەڭبەكپەن ەسەيگەن ەر

قازاقستان • 26 قىركۇيەك، 2021

بەيتانىس ساعىنىش

الەم • 26 قىركۇيەك، 2021

Astana Open ءتۋرنيرى اياقتالدى

سپورت • 26 قىركۇيەك، 2021

شەكاراشىلار ەليتالىق اسكەر بولسا...

قازاقستان • 26 قىركۇيەك، 2021

ۇلىبريتانيادا تانىستىرىلادى

وقيعا • 26 قىركۇيەك، 2021

وبلىس ورتالىعىنىڭ دەنى اۋىز سۋسىز وتىر

ايماقتار • 26 قىركۇيەك، 2021

مۇراعاتتاردىڭ ءحالى مۇشكىل

قوعام • 26 قىركۇيەك، 2021

نۇر-سۇلتان اۋەجايىندا ءتۇتىن شىقتى

ەلوردا • 26 قىركۇيەك، 2021

جالعىزدىق ارالى

كينو • 26 قىركۇيەك، 2021

تەننيس: Astana Open ءتۋرنيرى اياقتالدى

سپورت • 26 قىركۇيەك، 2021

ەلوردادا قار جاۋادى

قازاقستان • 26 قىركۇيەك، 2021

بالالار الاڭىنداعى تج: بالا ەسىن جيدى

ايماقتار • 26 قىركۇيەك، 2021

قاراعاندى-بالقاش تاس جولى جوندەلۋدە

ايماقتار • 26 قىركۇيەك، 2021

الماتىدا كىتاپ فەستيۆالى ءوتىپ جاتىر

ايماقتار • 26 قىركۇيەك، 2021

ماسكەۋدە جەتى جۇلدە الدىق

سپورت • 26 قىركۇيەك، 2021

ەلوردادا Astana Marathon-2021 ءوتىپ جاتىر

ەلوردا • 26 قىركۇيەك، 2021

بۇگىن ماشينا جاساۋ كۇنى

قازاقستان • 26 قىركۇيەك، 2021

قىزىلوردا وبلىسى «جاسىل» ايماققا ءوتتى

كوروناۆيرۋس • 26 قىركۇيەك، 2021

قانشا قازاقستاندىق ۆاكتسينا سالدىردى؟

كوروناۆيرۋس • 26 قىركۇيەك، 2021

قازاقستاندا ەڭبەك كۇنى اتاپ وتىلەدى

قازاقستان • 26 قىركۇيەك، 2021

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار