اتالمىش كورمەنىڭ نەگىزگى جادىگەرى رەتىندە اعارتۋشىنىڭ سەرىك جامانتاي ۇلى ۋاقباەۆ ەسىمدى تۋىسقانى تاراپىنان مۋزەي قورىنا 1989 جىلى تابىستالعان جەكە قالتا ساعاتىن («پاۆەل بۋرە» زاۋىتى) ەرەكشە اتاۋعا بولادى. جارى ايعانىس, ۇلدارى ابدوللا مەن ءابدىراحمان, قىزى ءشاريپا جانە نەمەرەسى ناعيما ابدولقىزىنىڭ, ۇستازدىق قىزمەتتىڭ ءار جىلدارى تۋعان وڭىرىندە سالدىرعان وقۋ ورىندارىنىڭ (مەكتەپتەر, ينتەرناتتار, ۋچيليششەلەر) تۇپنۇسقا فوتوسۋرەتتەرى (1959 جىلى مەملەكەتتىك ورتالىق مۋزەيىنىڭ قوستاناي وبلىسى, امانگەلدى اۋدانىنا جاساعان ەكسپەديتسياسى كەزىندە جيناقتالعان) جانە كوشىرمە سۋرەتتەر دە وسى ەكسپوزيتسيا تورىنەن ورىن العان.
اعارتۋشىنىڭ ورىنبور قالاسىندا ءوزى نەگىزىن قالاعان مەكتەپكە قابىلدانعان قازاق بالالارىنىڭ الۋان ءتۇرلى ماسەلەلەرىن قوزعاپ, 1864 جىلى ن.ي. يلمينسكيگە (1822-1891), 1880 جىلى سىرتقى ىستەر مينيسترلىگىنىڭ ورىنبور گەنەرال-گۋبەرناتورىنا جازعان حاتتارى, گازەتكە باستىرۋعا دايىنداعان 4 بەتتىك قولجازباسى, تورعاي وڭىرىندە 1884 جىلى بولىستىق مەكتەپتەر سالۋ جونىندەگى مالىمەتتەر جانە جات جۇرت بالالارى ءۇشىن باستاۋىش مەكتەپتەر اشۋ تۋرالى ەرەجەلەردىڭ كوشىرمەلەرى (1986 ج. قازكسر عىلىم اكادەمياسى كىتاپحاناسىنىڭ سيرەك كەزدەسەتىن قولجازبالار مەن باسىلىمدار بولىمىنەن الىنعان) كورمەنىڭ دەرەكتىك ارقاۋىن ارتتىرا تۇسكەن.
ى.ءالتىنساريننىڭ قوستانايداعى ەكى سىنىپتىق ۋچيليششەنىڭ وقۋشىلارىمەن بىرگە تۇسكەن, وباعان بولىستىق جانە ءوزى اشقان مەكتەپتەردىڭ شاكىرتتەرىنىڭ, اعارتۋشىنىڭ حاتتارىن زەرتتەگەن بەكەجان سۇلەيمەنوۆتىڭ (1912-1984), ءىزباسارلارى ابدىعالي (1866-1942) مەن احمەت بالعىمباەۆتاردىڭ, ءنازيپا قۇلجانوۆانىڭ (1887-1934) فوتوسۋرەتتەرىن دە وسى ەكسپوزيتسيادان تاماشالاۋعا بولادى.
XIX عاسىردىڭ اياعىندا قازاق دالاسىنىڭ باتىس ايماعىندا جانە جەتىسۋ وڭىرىندە مەكتەپتەر سالدىرىپ, قازاق بالالارىنىڭ مۇسىلمانشا جانە ورىس-قازاق تىلدەرىندە ءبىلىم الۋىنا جول اشقان العاشقى شۇلەڭگەرلەر (مەتسەناتتار) جاڭگىر حان (1801-1845) مەن ەسەنقۇل مامانوۆ (1888-1932) جانە ۇلت ۇستازى احمەت بايتۇرسىنوۆ (1872-1937) كەسكىندەرىنە, تۋىسقانى حالىق جازۋشىسى, كورنەكتى اقىن ءماريام حاكىمجانوۆانىڭ (1906-1995) جەكە كەشەنىنە ارنايى ۆيترينالار ارنالىپ وتىر.
سونداي-اق ءوز زامانىنىڭ اسقان قايراتكەرى بولعان پەداگوگتىڭ ءومىرى مەن شىعارماشىلىعىنا قاتىستى مۋزەي كىتاپحاناسىنان الىنعان باسىلىمدار, اۋلەتتىك شەجىرە, ۇستاز اشقان وقۋ ورىندارىنىڭ كارتاسى, شاكىرت كيىمىنىڭ اتريبۋتتارى, اراب ءالىپبيى جازىلعان جىلقى جاۋىرىنى, سياساۋىت پەن قاۋىرسىن, قوستاناي ءوڭىرىنىڭ اقسۋات اۋىلىنداعى س.كوبەەۆ اتىنداعى مەكتەپتىڭ قوڭىراۋى (مۋزەيگە 1976 ج. تۇسكەن) جانە ت.ب. يلليۋستراتسيالىق ماتەريالدار كورمەنىڭ كومپوزيتسيالىق ءمان-ماڭىزىن اشىپ تۇر.
سانالى عۇمىرىن قازاق بالالارىن ءبىلىم نارىمەن سۋسىنداتۋ جولىنا ارناعان اعارتۋشىنىڭ ءومىرى مەن مۇراسى – كەيىنگى ۇرپاق ءۇشىن ادىلدىك پەن ادامگەرشىلىكتىڭ جارقىن ۇلگىسى. الماتىلىقتار مەن قالا قوناقتارىنا قۇشاق اشقان ايرىقشا كورمە قىركۇيەك ايىنىڭ سوڭىنا دەيىن جالعاسادى.
الماتى
