قورىق ديرەكتورى دۋلات قويلىباەۆتىڭ ايتۋىنشا, ەلىمىزدە تۇڭعىش رەت تۇسىرىلگەلى وتىرعان جاڭا تۋىندىعا ءومىرىن تابيعات بايلىعىن قورعاۋ جولىنا ارناعان قاراپايىم جانداردىڭ قاجىرلى ەڭبەگى مەن ەرلىگى ارقاۋ بولادى.
«بىلۋىمشە, قازىر كينونى تۇسىرۋگە دايىندىق ءجۇرىپ جاتىر. ءفيلمنىڭ رەجيسسەرى ءارى ستسەناريىن جازعان – ماكسيم اكپاروۆ. جالپى, قورىقشىنىڭ ءار كۇنى قاۋىپكە تولى دەسەك بولادى. سوندىقتان بۇل فيلم شىتىرمان وقيعاعا تولى بولىپ, كورەرمەندەرىن, اسىرەسە جاستاردى باۋراپ الادى دەپ ۇمىتتەنەمىز. ناۋىرزىم قورىعىندا وسىدان ءبىر-ەكى جىل بۇرىن قىزمەت بابىندا ءجۇرىپ ەكى قورىقشىمىز قازا تاپتى. ءتۇسىرىلىمى تاياۋ كۇندەرى باستالايىن دەپ وتىرعان كينوفيلمدى سول كىسىلەردىڭ رۋحىنا قويىلعان ەسكەرتكىش دەپ قابىلداساق ارتىق بولمايدى», دەدى ناۋىرزىم مەملەكەتتىك تابيعي قورىعىنىڭ ديرەكتورى.
مەملەكەتتىك تاپسىرىسپەن تۇسىرىلگەلى وتىرعان جاڭا تۋىندىعا رەسەي حالىق ءارتيسى سەرگەي گارماش, وزبەكستاندىق سەيدوللا مولداحانوۆ جانە داۋرەن سەرعازين, جانەل ماقاجانوۆا, نىشانبەك جۇبانوۆ, ەرجان ءتۇسىپوۆ, تولەپبەرگەن بايساقالوۆ سىندى ەلىمىزگە تانىمال كينو جۇلدىزدارى شاقىرىلىپتى. ولاردىن ءى.وماروۆ اتىنداعى قوستاناي قازاق تەاترىنىڭ ارتىستەرى دە قالىس قالماعان.
«ارىپتەستەرىم ازامات چۋكەەۆ, تولەندى القوجا, قۋانىش مارات ۇلى, نۇرلىبەك كەنجاحمەتوۆتەر كاستينگتەن كەدەرگىسىز ءوتتى. ولاردىڭ قاتارىندا مەن دە بارمىن. بۇل ەلىمىزدە تۇسىرىلەيىن دەپ وتىرعان قورىقشىلار تۋرالى تۇڭعىش فيلم, سوندىقتان ءبىزدىڭ ۇجىم ءۇشىن ۇلكەن تاجىريبە مەكتەبى بولماق», دەدى تەاتر ديرەكتورى ءالىمحان مىرزاحان.
كينونى ءتۇسىرۋ جۇمىستارى 8 تامىزدا باستالادى.
