حالىقارالىق فيزيكا وليمپياداسى (IPhO-2021) 17-24 شىلدە ارالىعىندا ليتۆادا ونلاين فورماتتا ءوتتى. زياتكەرلىك بايقاۋدا الەمنىڭ 76 ەلىنەن 368 وقۋشى باق سىنادى. قازاقستاننىڭ اتىنان نۇر-سۇلتان, الماتى, اتىراۋ جانە پاۆلودار قالاسىنان بەس وقۋشى, ياعني رەسپۋبليكالىق پاندىك وليمپيادانىڭ جەڭىمپازدارى قاتىستى. ۇلتتىق قۇرامانى جارىسقا تاجىريبەلى پەداگوگتەر مەن جاتتىقتىرۋشىلار دايىندادى.
وليمپيادا ەكى كەزەڭنەن تۇردى, ولار 19 جانە 21 شىلدەدە ءوتتى. قاتىسۋشىلار فيزيكا ءپانى بويىنشا ءتۇرلى تەوريالىق جانە پراكتيكالىق تاپسىرمالاردى شەشتى. وتكەن جىلدىڭ رەكوردىن جاڭارتىپ, قازاقستاندىق وقۋشىلاردىڭ بارلىعى كۇمىس مەدال يەگەرى اتاندى. ولار – قالدىباەۆ راۋان, دراگانچۋك انتون, راحىمجانوۆ دىنمۇحاممەد, الپامىس ريزابەك, پىتەباي ەرسۇلتان.
حالىقارالىق لينگۆيستيكا وليمپياداسى (IOL-2021) لاتۆيادا ونلاين رەجيمدە ءوتتى. وعان نۇر-سۇلتان, شىمكەنت, تاراز جانە قاراعاندى قالالارىنان ءتورت وقۋشى قاتىستى. قازاقستان قۇراما كومانداسى رەسپۋبليكالىق وليمپيادانىڭ جەڭىمپازدارىنان جاساقتالدى. ولار الەمنىڭ 30-دان استام ەلىنىڭ قاتىسۋشىلارىمەن باق سىناستى.
سايىس ەكى كەزەڭنەن تۇردى. ءبىرىنشى تۋردا قاتىسۋشىلار بەس تاپسىرمانى شەشىپ, ەكىنشى تۋردا كوماندالىق جوبا دايىندادى. وليمپيادا قورىتىندىسى بويىنشا قازاقستان قۇراماسىنىڭ قورجىنى ءبىر قولا مەدالمەن تولىقتى. ونى ەلوردالىق وقۋشى پەرەسىپكينا داريا يەلەندى.
«قۇرمەتتى وليمپيادا جۇلدەگەرلەرى! سىزدەردى جاڭا جەڭىستەرىڭىزبەن قۇتتىقتايمىن! قازاقستاندىق وقۋشىلار مىقتى دايىندىعىن, بىلىمدەرىنىڭ جوعارى دەڭگەيىن تاعى دا دالەلدەدى. سىزدەر ءوز قۇرداستارىڭىزدىڭ اراسىندا فيزيكا جانە لينگۆيستيكا الەمىندە كوشباسشى بولا الدىڭىزدار. وسىنداي جەتىستىكتەر قاجىرلى ەڭبەكتىڭ, شىدامدىلىق پەن قايسارلىقتىڭ, بىرنەشە جىلدىق جوعارى دايىندىقتىڭ ناتيجەسى ەكەنى انىق. بولاشاقتا سىزدەردىڭ ەسىمدەرىڭىزدى وتاندىق عىلىم الەمىندە كورەتىنىمىزگە ءۇمىت ارتامىز. سىزدەرگە جاڭا جەتىستىكتەر تىلەيمىن! سونداي-اق وليمپياداعا قاتىسقان وقۋشىلاردىڭ ۇستازدارىن, اتا-انالارىن جانە جاتتىقتىرۋشىلارىن قۇتتىقتايمىن. جەڭىمپازداردىڭ جوعارى ناتيجەلەرگە قول جەتكىزۋى سىزدەردىڭ ەڭبەكتەرىڭىزدىڭ ارقاسى ەكەنى بەلگىلى. ءوز كەزەگىندە, ءبىلىم جانە عىلىم مينيسترلىگى وقۋشىلارىمىزدىڭ عىلىم الەمىن ودان ءارى باعىندىرۋى مەن ءوز رەكوردتارىن جاڭارتۋى ءۇشىن جاعداي جاساۋدى جالعاستىراتىنىن اتاپ وتكىم كەلەدى», دەپ جازدى قر ءبىلىم جانە عىلىم ءمينيسترى اسحات ايماعامبەتوۆ Facebook جەلىسىندەگى پاراقشاسىندا.
