ەكونوميكا • 25 شىلدە، 2021

قازاقستاندا كريپتوۆاليۋتاعا ارنالعان بانك شوتىن اشۋعا بولادى

84 رەت كورسەتىلدى

ەندى قازاقستاننىڭ بانكتەرىندە كريپتوۆاليۋتاعا ارنالعان شوتتارىن اشۋعا بولادى، دەپ حابارلايدى Egemen.kz «حابار 24»-كە سىلتەمە جاساپ.

بلوكچەين جانە داتا-ورتالىقتار يندۋسترياسى قاۋىمداستىعى تسيفرلىق اكتيۆتەرمەن جاسالاتىن وپەراتسيالار قازاقستاندىقتار ءۇشىن قولجەتىمدى بولاتىنىن حابارلادى. «استانا» حالىقارالىق قارجى ورتالىعىنىڭ بازاسىندا تىركەلگەن كريپتوبيرجالار جاقىن ارادا بانكتەرمەن جۇمىس ىستەي باستايدى.

قازاقستاندىقتار احقو-نىڭ ەكىنشى دەڭگەيلى بانكتەرمەن پيلوتتىق جوباسىن ىسكە قوسقاننان كەيىن كريپتوۆاليۋتامەن رەسمي ءارى اشىق جۇمىس ىستەي الادى. بۇل قانداي قارجى ينستيتۋتتارى بولاتىنى ءالى بەلگىسىز. ولاردىڭ ءتىزىمى انىقتالاتىن بولادى. وسى جوبانىڭ كومەگىمەن ۇكىمەت تسيفرلىق اكتيۆتەردىڭ قانداي تاۋەكەلدەر مەن پايدا اكەلەتىنىن باعالاي الادى. ازىرگە ولاردىڭ ءبىزدىڭ ەلدە اينالىمىنا تىيىم سالىنعان.

ايتا كەتسەك، احقو-نىڭ بانكتەرمەن جوباسى ءبىر جىلعا ەسەپتەلگەن. ول اياقتالعاننان كەيىن نارىق قاتىسۋشىلارى كريپتوۆاليۋتاعا قاتىستى تىيىم از كاتەگوريالىق بولادى دەپ كۇتەدى، ءتىپتى جوعالۋى دا مۇمكىن. ۇكىمەتتىڭ كريپتوۆاليۋتاعا قادام باسۋىنا بىرنەشە سەبەپ بار، دەپ ەسەپتەيدى قازاقستانداعى بلوكچەين جانە داتا-ورتالىقتار يندۋسترياسى قاۋىمداستىعىنىڭ مەملەكەتتىك ورگاندارمەن بايلانىس جونىندەگى اعا ۇيلەستىرۋشىسى سەرگەي پۋترا.

«كريپتو اينالىمى - بۇل ايتارلىقتاي ۇلكەن قارجى كولەمى. بۇل بۇكىل الەم بويىنشا ميللياردتاعان دوللاردىڭ كۇندەلىكتى اينالىمى. ەگەر قازاقستان پايىزدىڭ قانداي دا ءبىر ۇلەسىن السا، بۇل ەلىمىزگە ينۆەستيتسيا تۇرىندە كەلەتىن، سالىق تۇرىندە، جۇمىس ورىندارىندا جالاقى تۇرىندە قالاتىن ەلەۋلى اقشا. بۇل قازاقستان ءالى كۇنگە دەيىن اينالىپ ءوتىپ كەلە جاتقان وتە ۇلكەن يندۋسترياسى»، دەدى پۋترا.

كريپتوبيرجامەن اينالىسۋ ءۇشىن ءسىز «استانا» حالىقارالىق قارجى ورتالىعىندا تىركەلگەن بانكتەردىڭ بىرىندە زاڭدى شوتتىڭ يەسى بولۋ كەرەك. وسى شوتتان كاسىپكەر اقشا اۋدارا الادى، بيرجادا ءتۇرلى وپەراتسيالار جاساي الادى. سونداي-اق، ينۆەستور الىنعان كىرىستى قاراپايىم اقشا تۇرىندە ءوز شوتىنا اۋدارۋعا مۇمكىندىك الادى. بۇل جاعدايدا بانك ترانزاكتسيالار بويىنشا دەلدال رەتىندە ارەكەت ەتەدى.

سوڭعى جاڭالىقتار

ۇقساس جاڭالىقتار