كورمەگە كەلۋشىلەر باس قالامىزدىڭ قالىپتاسۋى مەن دامۋىن كورسەتەتىن فوتوسۋرەتتەر مەن مۇراعات قۇجاتتارىن كورە الادى.
ۇيىمداستىرۋشىلاردىڭ ايتۋىنشا, كورمە بارلىق قالا تۇرعىنى مەن قوناعىنا ەلىمىزدىڭ جاڭا استاناسىن قۇرۋ داۋىرىنە قىزىقتى ساياحات جاسايدى. قىزىعى سول, ەرەكشە عيماراتتاردىڭ ىرگەسى قالانا باستاعان ساتتەن باستاپ, بۇگىنگى كۇنگە دەيىنگى كەرەمەت ساتتەرى بەينەلەنگەن. سۋرەتتەردە «بايتەرەك» مونۋمەنتى, مەملەكەت باسشىسىنىڭ اقورداداعى رەزيدەنتسياسى, بەيبىتشىلىك جانە كەلىسىم سارايى, «نازارباەۆ ورتالىعى», «حان شاتىر» ساۋدا-ويىن-ساۋىق كەشەنى جانە باسقا دا كوپتەگەن ساۋلەتتى كەشەن بەرىلگەن. جاڭا استانانىڭ نەگىزىن قالاۋشى ءھام باس ساۋلەتشىسى – ەلباسى نۇرسۇلتان نازارباەۆتىڭ قىزمەتىنە ەرەكشە نازار اۋدارىلادى.
ەكسپوناتتاردا ەلوردانىڭ ونەركاسىپتىك دامۋى دا كورىنىس تاپتى. ماسەلەن, فوتوسۋرەتتەردىڭ بىرىندە نۇرسۇلتان نازارباەۆ يندۋستريالدى پاركتىڭ 2007 جىلعى جوبالارىمەن تانىسادى.
جالپى, ەكسپوزيتسيادا 100-دەن استام فوتوسۋرەت پەن ماتىندىك ماتەريال بار. ولار ەلوردا ارحيۆىنەن جانە پرەزيدەنت ارحيۆىنەن ءسۇزىپ الىندى.
ماڭىزدى تاريحي قۇجاتتاردىڭ قاتارىندا مەملەكەت باسشىسىنىڭ 1997 جىلى 20 قازانداعى اقمولا قالاسىن قازاقستان رەسپۋبليكاسىنىڭ استاناسى دەپ جاريالاۋ تۋرالى جارلىعى مەن باسقا دا جارلىقتارى بار.
پاندەمياعا بايلانىستى سوڭعى وقيعالار دا ەكسپوزيتسيادا كورىنىس تاپتى. ەل پرەزيدەنت قاسىم-جومارت توقاەۆتىڭ «نۇر-سۇلتان» مودۋلدىك ينفەكتسيالىق اۋرۋحاناسىنا بارعان سۋرەتى دە كوزگە وتتاي باسىلادى. سونداي-اق مەملەكەت باسشىسىنىڭ قاتىسۋىمەن كوروناۆيرۋسپەن كۇرەسكە ۇلەس قوسقان مەديتسينا قىزمەتكەرلەرىنە ارنالعان «التىن جۇرەك» مەموريالىنىڭ اشىلۋىن بەينەلەيتىن فوتوسۋرەت تە بەرىلگەن.
بۇل فوتولاردىڭ تاريحي قۇندى ەستەلىكتەر ەسەبىندە ماڭىزدى. ەلىمىزدىڭ باس قالاسىنىڭ داڭقتى تاريحى جالعاسۋدا.
