– Batyrs Battle ەلىمىزدىڭ ءتورت قالاسىندا – وسكەمەندە, اقتوبەدە, تۇركىستاندا جانە نۇر-سۇلتاندا وتەدى. كۇنى كەشە شىعىستىڭ باس شاھارىندا جارىس الاۋى جاعىلدى. ءساتىن سالسا, قاجىمۇقان, بالۋان شولاق اينالىسقان جاتتىعۋدى حالىق اراسىندا ناسيحاتتاعىمىز كەلەدى. بابالارىمىزدىڭ بىلەك كۇشتەرىن بۇگىنگى ۇرپاق سەزىنسە ەكەن, – دەپ ءوز ويىمەن ءبولىستى مادەنيەت جانە سپورت مينيسترلىگىنىڭ امباسسادورى سەرگەي تسىرۋلنيكوۆ.
ەلىمىزدە بۇرىن-سوڭدى ۇيىمداستىرىلماعان ەرەكشە جوباعا قاتىسامىز دەپ كەلگەن جىگىتتەر دە تەپسە تەمىر ۇزەردەي ەكەن. ولاردىڭ ىشىندە حالىقارالىق دارەجەدەگى سپورت شەبەرلەرى دە بولدى. دەي تۇرعانمەن, قاجىمۇقان اينالىسقان سپورت ولار ءۇشىن وڭايعا سوقپادى. ءارتۇرلى سالماقتاعى قاپتاردى, زىلدەي تاستى كوتەردى. جۋان تەمىردى مايىستىرىپ كوردى. بىلەكتەگى بۇلشىق ەتتەرى ويناپ تۇرعانىمەن, قاپ كوتەرە الماي سان سوعىپ قالعانداردى دا كوردىك. سۇڭعاق بوي, كەڭ يىق بولعانىمەن, بەلدەسۋدە السىزدىك تانىتقاندار دا ءجۇردى. ال مىقتىلىعىمەن كوزگە تۇسكەن اتلەتتەر كوپشىلىكتىڭ قوشەمەتىنە بولەنىپ جاتتى.
ءار ءبولىمنىڭ اراسىندا قاجىمۇقاننىڭ بالۋاندىعىن ناسيحاتتاپ جۇرگەن سەرگەي تسىرۋلنيكوۆ تەمىردەن گۇل جاساپ, تاقتايعا شەگە قاعىپ, ءوز ونەرىن ورتاعا سالدى. بالۋان بابامىز تۋرالى دەرەكتى فيلم دە كورسەتتى. سەرگەيدەي ۇلدىڭ باتىر بابامىزدى ناسيحاتتاپ جۇرگەنىنە كوپشىلىك كورەرمەن شىن ريزاشىلىعىن ءبىلدىردى.
سونىمەن Batyrs Battle سايىسىندا كۇش سىناسقان ماكسيم وسيپوۆ, الەكساندر نيكيتين, رومان كاۋنوۆ, ەۆگەني ەپيفانوۆ, اندرەي ليۋتوۆسكي سىندى بالۋانداردىڭ ىشىنەن باسىم تۇسكەن گرەك-ريم كۇرەسىنەن سپورت شەبەرى سالاۋات احمەتقالي بولدى. سالاۋات اۋىر قاپتى دا كوتەردى, تەمىردى دە ءيدى. بورەنەنى ءتىپتى بۇيىم قۇرلى كورگەن جوق. ۇيىمداستىرۋشى سەرگەي تسىرۋلنيكوۆتىڭ ايتۋىنشا, Batyrs Battle سايىسىنىڭ نۇكتەسى تامىز ايىندا نۇر-سۇلتان قالاسىندا قويىلادى.
شىعىس قازاقستان وبلىسى
