«پاراسات بيىگى» اتتى ەڭبەكتىڭ تانىستىرىلىمىنا زيالى قاۋىم وكىلدەرى مەن جاستار جينالدى. جاڭا كىتاپتى جيناپ, زەردەلەپ قۇراستىرعان – بەلگىلى قالامگەر ەسبولات ايدابوسىن. باسپادان شىعۋىنا وبلىس اكىمى اماندىق باتالوۆ دەمەۋشىلىك ەتىپتى.
جيناقتىڭ مازمۇنى ءۇش بولىكتەن تۇرادى. العاشقىسىنا بەيسەن قۇرانبەكتىڭ ماقالا رەپورتاجدارى بولسا, ەكىنشىسىنە سۇحباتتارى, سوڭعىسىنا رۋحاني وي تولعامدارى توپتاستىرىلعان.
جيىنعا قاتىسقان زيالىلار مەن بەيسەن قۇرانبەكتىڭ زامانداستارى, شاكىرتتەرى قايراتكەردىڭ ءومىر جولى مەن ەڭبەكتەرى تۋرالى ەستەلىكتەر ايتتى. ساپالى قازاق قالىپتاستىرۋ يدەياسى ءوز جالعاسىن تاپسا دەگەن نيەتتەرىن اڭعارتتى. ۇلكەندەر جاستاردى بەيسەننىڭ بيىگىنە تالپىنۋعا ناسيحاتتادى.
500 تيراجبەن شىققان جاڭا كىتاپ تەگىن ۇلەستىرىلمەيدى, ساتىلادى. الايدا, ونىڭ ناقتى باعاسى جوق, وقىرمان تۋىندىنىڭ قۇنىن شاما-شارقىنشا ءوزى باعالايدى. ويتكەنى قايىرىمدى جاننىڭ كەزەكتى ەڭبەگىمەن جينالعان قاراجات تا تۇگەلدەي قايرىمدىلىققا جۇمسالماق.
