تۇرلەنگەن تەحنوپارك

وتكەن جىلدىڭ قاراشاسىندا Astana Hub باسشىلىعى تەحنو­پاركتىڭ تسيفرلىق نۇسقاسىن ازىر­لەۋ ءۇشىن ارنايى بايقاۋ جاريالادى. وعان ەلىمىزدىڭ جانە تمد مەملەكەتتەرىنىڭ ءىت-كوم­پانيالارى قاتىسىپ، ءوز جوبالا­رىن ۇسىندى. بىلىكتىلەر باق سى­­ناعان بايقاۋدا الماتىلىق AnyDev ۇجىمى جەڭىسكە جەتتى. ولارعا پلاتفورمانى ازىرلەۋ ءۇشىن 55 ملن تەڭگە بەرىلدى. ءسويتىپ، تەح­نوپاركتىڭ تسيفرلىق نۇسقاسى – Astanahub.com دۇنيەگە كەلدى. جالپى ونلاين بايقاۋعا 20-دان استام كومپانيا قاتىسقان.

Astana Hub-تىڭ باس ديرەكتورى ماعجان ماديەۆتىڭ ايتۋىن­شا، تسيفرلىق نۇسقادا ءىرى ءارى كىشىگىرىم پروتسەستەردىڭ ءبارى اۆتو­ماتتاندىرىلعان. ياعني ءتۇرلى باع­دارلامالارعا ءوتىنىم بەرۋدەن باستاپ، ۆيزالىق ءارى سالىقتىق جە­ڭىلدىكتەرگە يە تەحنوپارك رەزي­دەنتتەرىنىڭ ونلاين فورماتتا ەسەپ جۇرگىزۋىنە تولىقتاي مۇمكىندىك جاسالعان.

– بايقاۋعا قاتىسۋشىلار ەكى اپتانىڭ ىشىندە تەحنوپاركتىڭ تسيفرلىق نۇسقاسىن ازىرلەۋگە تىرىستى. كەيىن تاۋەلسىز كوميس­سيا جەڭىمپازداردى انىقتادى. پلاتفورما تەحنوپارك قۇرامىن­داعى 507 ءىت-كومپانياعا ايتار­لىقتاي دەمەۋ بولارىنا سەنەمىن، – دەيدى ماعجان ماديەۆ.

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ سوزىنە سەنسەك، Astana Hub-تىڭ الدىنا قويىلعان مىندەت اۋقىمدى – 2025 جىلعا قاراي IT-يندۋستريادان 500 ملن دوللار كولەمىندە ەكسپورتتىق ءتۇسىم الۋ.

– بىلتىر تەحنوپارككە ەكى باع­دار ۇسىندىم. بىرىنشىدەن، ەسەپتىڭ ءبارى ونلاين فورماتتا جينالۋى كەرەك. ايتپەسە، بۇعان دەيىن Astana Hub قاتىسۋشىلارىنىڭ بارلىعى ەسەپتى قاعاز تۇرىندە تاپسىراتىن. ەكىنشىدەن، تەحنوپارك وڭىرلىك حابتارعا باعدارلانۋى كەرەك. ياعني Astana Hub وڭىرلەردەگى اكسەلەراتسيا مەن ينكۋباتسيانى قولداۋى قاجەت. بۇدان بولەك، ەكسپورتقا باعدارلانۋ كەرەكتىگىن ەسكەرتتىم. ويتكەنى 2025 جىلعا قاراي ءىت-يندۋستريادان قوماقتى ەكسپورتتىق ءتۇسىم الۋ مىندەتى تۇر. Astana Hub تولىقتاي ەكسپورتتىق الەۋەتكە جۇمىس ىستەيتىن بولادى. بيىل حالىقارالىق اكسەل­لەراتسيالىق پلاتفورمالارمەن، سونداي-اق ۆەنچۋرلىك كاپيتاليس­تەرمەن ىنتىماقتاستىق ورناتۋعا تىرىسامىز. بۇل جەرگىلىكتى ستار­تاپتاردىڭ حالىقارالىق نارىققا شىعۋىنا مۇمكىندىك بەرەدى، – دەيدى باعدات مۋسين.

دەرەكتەرگە سۇيەنسەك، 2020 جىلى Astana Hub قاتىسۋشى­لارىنىڭ ەكسپورتتىق تابىسى 14 ملرد تەڭگەنى قۇراعان. تەحنوپارك وپەراتسيالىق تابىسقا ءالى شىققان جوق جانە بۇل مەجەنى جاقىن ۋاقىتتا ەڭسەرۋ جوسپارلانباعان.

– Astana Hub – كوممەرتسيالىق ۇيىم ەمەس، كورپوراتيۆتى قور. ءبىزدىڭ ميسسيا – ستارتاپ مادە­نيە­تىن دامىتۋ جانە ءىت-جوبا­لار­دى قولداۋ. سوندىقتان وپەرا­تسيالىق تابىسقا شىعۋ نەگىزگى مىندەت ەمەس. ءيا، بولاشاقتا بۇعان دا كەلەتىن بولامىز، ول انىق. ول ءۇشىن ۇزاق جىلدار كەرەك. ءبىز يزرايل مەن سينگاپۋرداعى، ما­لايزيا مەن بەلارۋستاعى ەكو­جۇيەلەردىڭ قالاي دامىعانىن زەردەلەپ، الەمدىك تاجىريبەنى زەرت­­تەدىك. ولاردىڭ ءبارى قىسقا مەر­­زىمدى بولاشاقتا وپەراتسيالىق تابىسقا شىعۋ مىندەتىن العا قوي­ماعان. سونداي-اق ءبىز زەرتتەگەن تاجىريبەنىڭ بارىندە مەملەكەتتىك قولداۋدىڭ قارقىندى بولعانىن بايقادىق. ياعني كومپانيالارعا ماتەريالدىق ينفراقۇرىلىم، سالىقتىق جەڭىلدىك، دامۋ باعدار­لاماسىن سۋبسيديالاۋ سەكىلدى قولداۋ شارالارى ۇسىنىلعان، – دەيدى ماعجان ماديەۆ.

ەسكە سالا كەتەيىك، Astana Hub تەحنوپاركى ەكسپو ورتالى­عىنىڭ اۋماعىندا ورنالاسقان. تەحنوپارك 25 گەكتار جەردى الىپ جاتىر. Astana Hub ىسكە قو­­سىلعان ءۇش جىلدىڭ ىشىندە مۇن­دا 1 مىڭنان استام كاسىپكەر شو­­عىرلاندى. بۇل رەتتە 507 كومپانيا سالىقتىق جانە ۆيزالىق جە­­ڭىلدىكتەرگە يە. ولار 2019-2021 جىلدار ارالىعىندا قولداۋ شارا­­لارىنىڭ ناتيجەسىندە 7،7 ملرد تەڭگەنى ۇنەمدەگەن. بۇگىندە تەحنوپارك 12 ملن-نان استام پاي­دالانۋشىنى قامتىپ وتىر. باعدات مۋسين اتاپ وتكەندەي، Astana Hub قازاقستانداعى ستار­تاپ-يندۋستريانىڭ وزەگىنە ءارى ءتۇرلى دەڭگەيدەگى تەحنولوگيالىق كومپانيالاردىڭ مۇمكىندىكتەر الاڭىنا اينالدى.