ۇلتتىڭ رۋحاني كەمەلدەنۋىنە, ۇلتتىق جانە الەمدىك ادەبيەتتىڭ كيەلى ساحنا ارقىلى وقىرمانىنا جەتۋىنە قىزمەت ەتەتىن تەاتر ونەرىنىڭ بار جاۋاپكەرشىلىگىن موينىنا العان ۇجىم العاشقى كۇننەن باستاپ بۇل ميسسيانى تۇسىنە ءبىلدى جانە سونىڭ جولىندا تىنىمسىز ەڭبەك ەتىپ كەلەدى.
ەلباسىنىڭ « ۇلى دالانىڭ جەتى قىرى» باعدارلاماسىن ىسكە اسىرۋ ماقساتىندا ەل تاۋەلسىزدىگىنىڭ 30 جىلدىعى مەن تەاتردىڭ قازاق ترۋپپاسىنىڭ قۇرىلعانىنا 30 جىل تولۋ مەرەكەسىنە وراي وبلىستا « ۇلى دالا تەاتر كەرۋەنى» اتتى گاستارولدىك ساپار ۇيىمداستىرىلعان بولاتىن. بۇل – تەاتردىڭ جاڭا جوباسى. وسى جوبا اياسىندا تەاتر ۇجىمى وبلىستاعى اۋدان ورتالىقتارى مەن اۋىلدارعا گاسترولدىك ساپارمەن بارىپ قايتتى. جوبا ەكى باعىتتا جۇرگىزىلدى: ءبىرىنشى توپ ابايدىڭ تۋعانىنا 175 جىل تولۋىنا بايلانىستى ۇلى ويشىلدىڭ جانە جەرگىلىكتى اقىن-جازۋشىلاردىڭ شىعارماشىلىعىن ناسيحاتتاۋ ماقساتىندا ادەبي-تانىمدىق كەشتەر ۇيىمداستىردى. ال ەكىنشى باعىتتاعى توپ كورەرمەنگە س.احمادتىڭ «كەلىندەر كوتەرىلىسى» كومەدياسىن, ۇ.ەسداۋلەتتىڭ «قارا پيما» دراماسىن جانە بالالارعا ارنالعان م.الىبەكتىڭ «الدار كوسەنىڭ سيقىرلى ءدۇربىسى» ەرتەگىسىن ۇسىندى.
– بۇل جوبا ماقساتى – كورەرمەندى رۋحاني قۇندىلىققا تاربيەلەي وتىرىپ, تەاتر الەمىنە قىزىعۋشىلىعىن ارتتىرۋ, تەاتر ونەرىن كاسىبي تۇرعىدا دامىتۋ, قازاق قالامگەرلەرىنىڭ شىعارماشىلىعىن ناسيحاتتاۋ, ۇلتىمىزدىڭ مادەنيەتىن, سالت- ءداستۇرىن جانداندىرۋعا اتسالىسۋ, تۇرعىنداردىڭ وتكەن شارادان العان پىكىرىن سارالاي وتىرا, تەاتر ونەرىن وركەندەتۋدىڭ سراتەگيالىق جوسپارىن جاساۋ, – دەيدى تاحاۋي احتانوۆ اتىنداعى اقتوبە وبلىستىق دراما تەاترىنىڭ ديرەكتورى ولجاس يبراەۆ.
تەاتر ۇجىمى شالقار, ايتەكە بي, العا اۋداندارى سەكىلدى بىرنەشە ەلدى مەكەندەگى كورەرمەنىمەن قاۋىشتى. سوڭعى ءبىر-ەكى جىلدىقتا الەمدى جايلاعان قاۋىپتى ىندەتتىڭ سالدارىنان كارانتيندىك شەكتەۋلەر جاريالانىپ, ءبىر-بىرىمەن ەركىن ارالاسۋعا دا مۇمكىندىگى بولماعان اۋدان, اۋىل تۇرعىندارى ءۇشىن تەاتردىڭ كەلۋى قۋانىشتى جاڭالىق بولدى. تەاتردىڭ بۇل جوباسى وسى رۋحاني وقشاۋلانۋدىڭ ورنىن تولتىرعانداي بولدى.
ماۋسىم ايىنىڭ اياعىندا تەاتر ۇجىمى بەرشۇگىر, شالقار, قارابۇتاق, اقاي, قاراقوبدا اۋىلدارىنا بارىپ, بىرنەشە قويىلىمدى كورەرمەن نازارىنا ۇسىندى. ال ەكىنشى توپ شالقار, ايتەكە بي اۋداندارىندا «اباي الەمى» اتتى ادەبي-پوەزيالىق كەش وتكىزدى. بۇل ادەبي شارانىڭ ماقساتى – جاستاردىڭ قازاق ادەبيەتىنە, مادەنيەتىنە دەگەن قىزىعۋشىلىقتارىن وياتىپ, اباي شىعارماشىلىعىن ناسيحاتتاۋ. ونەرپازدار اباي ولەڭدەرىمەن قوسا قازاقتىڭ حالىق اندەرىن ورىنداپ, جيىلعان كورەرمەنگە دە اقىننىڭ قاراسوزدەرىن كەزەكتەسە وقۋعا مۇمكىندىك بەردى. اسىرەسە, بالالار بەلسەندى بولدى.
– كارانتيندىك شەكتەۋ شارالارىنىڭ جەڭىلدەۋىنە بايلانىستى گاسترولدىك ساپارىمىزدى اۋدانداردان باستادىق. تەاترىمىز وزگە وڭىرلەرگە ۇزدىك قويىلىمدارىمەن ۇلگى بولۋى كەرەك. بۇل ءىس-شارامىز ەڭ اۋەلى ساحنا مايتالماندارىنا شىعارماشىلىق تاجىريبە سىيلادى, ءارى ىزدەنىسكە جول اشتى, – دەيدى تەاتر ديرەكتورىنىڭ ورىنباسارى جاندوس ءجاۋمىت ۇلى.
گاسترول اياقتالار تۇستا تەاتر ۇجىمى العا اۋدانىنداعى اقاي, قاراقوبدا سەكىلدى بىرنەشە اۋىلعا بارىپ قايتتى. بالالارعا ارنالعان مەيىرجان الىبەكتىڭ «الدار كوسەنىڭ سيقىرلى ءدۇربىسى» ەرتەگىسىندە قازىرگى شەتەلدىك مۋلتفيلمدەردىڭ ورمەكشى ادام, ماكۋين, ماشا سەكىلدى كەيىپكەرلەرى دە ساحناعا شىعارىلعان بولاتىن. ونى كورگەن بالالار وزدەرى وبرازعا كىرىپ, ءماز بولىستى. ال كەشكى ۋاقىتتا تاياۋدا عانا تەاتردا پرەمەراسى وتكەن ۇلىقبەك ەسداۋلەتتىڭ «قارا پيما» پسيحولوگيالىق دراماسى ۇسىنىلدى.
– ەل اراسىندا ءتۇرلى پروبلەما بولادى. كورەرمەن بۇل قويىلىمدى ىقىلاسپەن تاماشالادى. كورەرمەننىڭ پىكىرىن تىڭداپ, قوعامداعى «ماسكۇنەمدىك» ماسەلەسىنىڭ ەشقاشان ەسكىرمەيتىندىگىن بايقادىق, – دەدى تەاتر ديرەكتورىنىڭ ورىنباسارى جاندوس ءجاۋمىت ۇلى.
ال وسىدان بىرنەشە اي بۇرىن رەجيسسەر ايدىن سالبانوۆ ساحنالاعان بارزۋ ابدۋرازاكوۆتىڭ «اينالايىن» دراماسىندا ەكى كەيىپكەر عانا بار: انا مەن بالا.
– قويىلىمدا انا ءرولىن سومداعان اكتريسا مايرا يلياسوۆانىڭ بۇل وبرازى ەرەكشە بولدى: اكتريسا جۇرەگى نازىك تە, قايسار انا ءرولىن ءوز بيىگىندە ورىنداپ شىقتى. انا مەن بالانىڭ ديالوگى ءاربىرىمىزدىڭ جۇرەگىمىزدىڭ تۇكپىرىندە جاتقان سەزىمدەردى وياتقانداي بولدى, – دەيدى كورەرمەندەر.
مەيرامگۇل راحاتقىزى
