«ەكپە العاننان كەيىن 3 اي بويى ساقتانۋ كەرەك. تەك سودان سوڭ عانا تولىق تەكسەرىستەن ءوتىپ, جۇكتىلىكتى جوسپارلاۋعا رۇقسات بەرىلەدى. بىزدە قازىر «سپۋتنيك V» جانە «QazVac» ۆاكتسينالارى بار. اتالعان ۆاكتسينالاردى سالدىرعان ايەلدەردە ءۇش ايدان كەيىن دەنساۋلىقتارىندا ەشقانداي كىنارات بولماسا, جۇكتىلىكتى جوسپارلاۋعا بولادى. ال Hayat-Vax ۆاكتسيناسىن العاندار ءۇشىن ەكى جىلعا دەيىن بالا كوتەرۋگە بولمايدى. بۇل - ۆاكتسينا وندىرۋشىلەردىڭ ۇسىنىمدارى. ال ەگەر دە ايەل جۇكتى بولىپ قالعان بولسا, وندا ۇنەمى باقىلاۋدا بولۋى كەرەك», دەدى مامان.
سونداي-اق دارىگەر ينفەكتسيانىڭ جاتىرداعى بالاعا ەش قاۋىپتىلىگى جوق ەكەنىن ەسكەرتتى. ويتكەنى ۆيرۋس پلاتسەنتادان وتپەيدى ەكەن. بىراق ونىڭ انا دەنساۋلىعىنا زاقىم كەلتىرۋ مۇمكىندىگى باسىم.
الايدا دەنساۋلىق ساقتاۋ مينيسترلىگىنىڭ رەسمي سايتىندا Hayat-Vax ۆاكتسيناسىنىڭ 2-ءشى كومپونەنتىن العاندار 2 ايدان كەيىن جۇكتىلىكتى جوسپارلاۋىنا بولاتىنى جازىلعان.
