اقمولا وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, اتالعان قۇقىقبۇزۋشىلىق 9 شىلدە كۇنى جارقايىڭ اۋدانىنىڭ دەرجاۆينسك قالاسىندا انىقتالعان.
پوليتسيا قىزمەتكەرلەرى «Volkswagen Passat» ماركالى اۆتوكولىكتىڭ تىزگىنىندە وتىرعان كۇدىكتى جۇرگىزۋشىنى توقتاتىپ, قاجەتتى شارا قولداندى.
«قۇجاتتاردى تەكسەرگەننەن كەيىن پوليتسيا قىزمەتكەرلەرى ەر ادامدى مەديتسينالىق كۋالاندىرۋعا جىبەرۋ تۋرالى شەشىم قابىلدادى. كۋالاندىرۋ ناتيجەلەرى بويىنشا جۇرگىزۋشىنىڭ ەسىرتكى قولدانعانى انىقتالدى. قۇقىق بۇزۋشى ەسىرتكى قولدانعانىن مويىنداپ, قالعان پسيحوتروپتىق زاتتاردى پوليتسەيلەرگە بەردى», دەپ اتاپ ءوتتى ۆەدومستۆودان.
جارقايىڭ اۋداندىق سوتىنىڭ 12 شىلدەدەگى قاۋلىسىمەن جۇرگىزۋشى قر اقبتك-ءنىڭ 608-بابى «ەسىرتكىدەن ماساڭ كۇيدەگى جۇرگىزۋشىنىڭ كولىك قۇرالىن باسقارۋى...» بويىنشا 15 تاۋلىككە قاماۋعا الىنىپ, جەتى جىلعا كولىك قۇرالدارىن جۇرگىزۋ قۇقىعىنان ايىرىلدى.
سونداي-اق ەسىرتكىنى زاڭسىز ساقتاعانى ءۇشىن ول قر قك 296-بابىنىڭ 2-بولىگى بويىنشا قىلمىستىق جاۋاپكەرشىلىككە تارتىلدى.
جىل باسىنان بەرى اقمولا وبلىسىنىڭ اۆتوجولدارىندا ماس جۇرگىزۋشىلەردىڭ قاتىسۋىمەن 20 جكو ورىن الدى. ولاردىڭ سالدارىنان 35 ازامات زارداپ شەگىپ, 6 ادام قايتىس بولدى. وسى ۋاقىت ىشىندە پوليتسيا قىزمەتكەرلەرى 654 جۇرگىزۋشىنى اكىمشىلىك جاۋاپكەرشىلىككە جانە 60 جۇرگىزۋشىنى كولىكتى ماس كۇيىندە باسقارعانى ءۇشىن قىلمىستىق جاۋاپكەرشىلىككە تارتتى.
