بۇل وقيعا تۋرالى الدىمەن تالعار اۋدانىنا قاراستى كوسموس اۋىلىنىڭ تۇرعىنى الەۋمەتتىك جەلىدە جازعان. بۇگىن وبلىستىق پوليتسيا دەپارتامەنتى اقپاراتتى راستادى.
وقيعا 11 شىلدەدە بولعان. كۇدىكتى – 53 جاستاعى ەر ادام (بۇرىن اناسىن ولتىرگەنى ءۇشىن سوتتالىپ, ۇزاق جىل تۇرمەدە جازاسىن وتەپ شىققان) كورشى ايەلدىڭ ۇيىنە كەلىپ اقشا سۇراعان. «جوق» دەگەن جاۋاپ العاننان كەيىن ونى پىشاقتاپ ولتىرەدى. كومەككە ۇمتىلعان 9 جاسار نەمەرەسىن دە ول اياۋسىز پىشاقتاي سالعان. بالا دالاعا جۇگىرىپ شىعىپ, كومەك شاقىرىپ ۇلگەرگەن.
«اتالعان دەرەك بويىنشا الماتى وبلىسىنىڭ پوليتسيا دەپارتامەنتى اسا قاۋىپتى قىلمىس جاسادى دەگەن كۇدىكپەن تالعار اۋدانىنىڭ 53 جاستاعى تۇرعىنىنىڭ ۇستالعانىن حابارلايدى. ەر ادام بۇرىن ءار ءتۇرلى قىلمىستار جاساعانى ءۇشىن بىرنەشە رەت سوتتى بولعان. قازىرگى ۋاقىتتا كۇدىكتى ۋاقىتشا ۇستاۋ وقشاۋلاعىشىنا قاماۋعا الىندى. كىسى ءولتىرۋ جانە ادام ولتىرۋگە وقتالۋ دەرەگى بويىنشا قر قك-ءنىڭ 24-بابى ارقىلى جانە 99-بابىنىڭ 3-بولىگى بويىنشا قىلمىستىق ءىس قوزعالدى, ياعني ادام ءولتىرۋ جانە كامىلەت جاسقا تولماعان ادامدى ولتىرۋگە وقتالۋ. قاجەتتى ساراپتامالار تاعايىندالدى», دەلىنگەن وبلىستىق پوليتسيا دەپارتامەنتى تاراتقان حابارلامادا.
زارداپ شەككەن 9 جاسار بالا ەڭبەكشىقازاق اۋداندىق اۋرۋحاناسىنا جاتقىزىلدى.
