كورمە ەلباسى كىتاپحاناسىنىڭ «مادەنيەت ارقىلى ۇنقاتىسۋ» حالىقارالىق كورمە جوباسى اياسىندا قازاقستان رەسپۋبليكاسىنداعى كورەيا رەسپۋبليكاسى ەلشىلىگىنىڭ كورەي مادەنيەت ورتالىعىمەن بىرلەسىپ, نۇرسۇلتان نازارباەۆ قورىنىڭ كومەگىمەن ۇيىمداستىرىلدى.
كورمە قازىرگى زامانعى كوركەم تىلگە, تىڭ تەحنيكا سالاسىنا قىزىعاتىن كورەرمەندەردى قىزىقتىرۋعا باعىتتالعان. لي ينامنىڭ تسيفرلى تۋىندىلارى بەينە, دىبىس, قوزعالىس ارقىلى كورەرمەننىڭ شىعارمامەن بايلانىس ورناتۋىنا, ءوزىن كەڭىستىكتىڭ ىشىندە سەزىنۋگە مۇمكىندىك بەرەدى.
كورمەنى ەلباسى كىتاپحاناسىنىڭ مۋزەي قۇندىلىقتارىن ەسەپكە الۋ جانە ساقتاۋ قىزمەتىنىڭ باسشىسى كۇلايشا اقتاەۆا اشتى: «بۇل كورمەنىڭ ەرەكشەلىگى نەدە؟ مۇندا جيىرما جىلدان بەرى بەلسەندى دامىپ كەلە جاتقان باعىت ۇسىنىلادى. ونى كەيبىرەۋلەر مەديا-ونەر دەسە, ەندى ءبىرى ديدجيتال ونەر دەپ اتايدى. ءبىز جوبا اۆتورى لي ينام مىرزامەن حابارلاسىپ, ونىڭ جۇمىسىن تەرەڭ زەرتتەي كەلە, جالپى ءبىر ارناعا توعىسۋ يدەياسىن كوتەردىك. كورمەدە ادامنىڭ كۇندەلىكتى كۇيبەڭ تىرشىلىكتەن ءسال اياڭداپ, ەرتەڭگى كۇن تۋرالى ويعا شومىپ, كەز كەلگەن كەدەرگىلەرگە قاراماستان الداعى مۇمكىندىكتەردىڭ شەكسىزدىگىن كورسەتەتىن بەس كارتينا ۇسىنىلدى».
ءوز كەزەگىندە كورەيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى كۋ حونگ-سوك تاۋەلسىزدىكتىڭ 30 جىلدىعىندا قازاقستاننىڭ استاناسىندا اشىلعان كورمەنىڭ ەرەكشە مانگە يە ەكەندىگىن ايتتى.
«كورمە الەمگە ايگىلى كورەيالىق مەديا-سۋرەتشى پەك نام دجۋننىڭ مۇراسىن جالعاستىرۋشى لي ينامنىڭ ەڭ العاشقى ءارى جاڭا تۋىندىلارى ارقىلى سىزدەرگە كورەيانىڭ مادەنيەتى مەن سۇلۋلىعىن جەتكىزۋ ءۇشىن ۇيىمداستىرىلدى», دەدى ەلشى.
جاھاندىق سىن-قاتەرلەر الەمدىك ەكونوميكاعا ىقپال ەتىپ قويماي, ونەردە دە رەۆوليۋتسيالىق وزگەرىستەر تۋدىردى. مۇنى لي ينامنىڭ Signal of Light تسيفرلى ونەر تۋىندىلارىنىڭ كورمەسى دالەلدەيدى. ۆيدەو-ارتكەڭىستىكتەگى ءتۇس, ءپىشىن, جارىق ۇعىمدارىن قابىلداۋ بەينەلەۋ ونەرىنىڭ اۋقىمىن كەڭەيتەدى.
ول ۇيرەنشىكتى ەمەس پاليترانى نەگىزگە الادى. بەينەماتەريالداردى تاماشالايتىن كورەرمەندەر سيقىرلى فوناردان كينوتەاترعا, وپتيكالىق يلليۋزيا مەن پانورامالىق كەسكىندەمەدەن ۆيرتۋالدى ومىرگە دەيىنگى مەديا-ونەردىڭ دامۋىن باقىلاي الادى. بەينە سيۋجەتتەرى كورەرمەننىڭ مۇقيات قاراپ, تەرەڭىرەك جانە ۇزاق سەزىنۋىنە مۇمكىندىك بەرەدى.
