– پاندەميا بارشاعا وڭاي تيمەگەنىن بىلەمىز. سوعان قاراماستان, مۇعالىمدەردىڭ ەرەن ەڭبەگىنىڭ ناتيجەسىندە وقۋشىلار ۇزدىك ناتيجەلەرگە قول جەتكىزىپ, ءبىلىم جانە عىلىمي كونكۋرستاردا جۇلدەلى ورىندار الىپ ءجۇر. ال بيىل ماحامبەت اتىنداعى اكادەميالىق قازاق دراما تەاترىنىڭ ۇجىمى حالىقارالىق بايقاۋلاردا ەكى مارتە باس جۇلدەنى يەلەندى, – دەيدى ايماق باسشىسى ماحامبەت دوسمۇحامبەتوۆ.
قىزمەتتىك پاتەرگە يە بولعاندار اراسىندا اتىراۋ قالاسىنداعى №17 مەكتەپ-ليتسەيىندە تەحنولوگيا پانىنەن ءدارىس بەرەتىن جادىرا ناۋرىزباەۆا, وبلىستىق بالالار اۋرۋحاناسىنىڭ نەيروحيرۋرگى شوديەر اريپوۆ, ماحامبەت اتىنداعى اكادەميالىق قازاق دراما تەاترىنىڭ كوركەمدىك جەتەكشىسى مۇقانعالي تومانوۆ پەن اكتەر بەكەت زينۋللين بار.
– مەن الىس اۋىلدا دۇنيەگە كەلگەن ەدىم. بالا كۇنىمنەن ونەرگە قۇشتار بولىپ, اكتەرلىكتى تاڭدادىم. ەندى مىنە, ەڭبەگىم ەلەنىپ, باسپاناعا يە بولعانىما قۋانىشتىمىن, – دەيدى بەكەت زينۋللين.
وبلىس اكىمىنىڭ ايتۋىنا قاراعاندا, بيىل وڭىرگە جوعارى وقۋ ورنىن بىتىرگەن جاس مامانداردىڭ كەلۋى كۇتىلىپ وتىر. ولارعا قىزمەتتىك 15 پاتەر ءبولىنىپتى.
ءوڭىردىڭ مۇناي-گاز ونەركاسىبىنە مامان دايارلايتىن وقۋ ورنىنىڭ ءبىرى – س.مۇقاشەۆ اتىنداعى جوعارى پوليتەحنيكالىق كوللەدجى. ەلوردا كۇنى قارساڭىندا اتالعان كوللەدجدىڭ دە جاڭا جاتاقحاناسى اشىلدى. وبلىس اكىمى ماحامبەت دوسمۇحامبەتوۆتىڭ ايتۋىنشا, بۇل جاتاقحانا ەلباسىنىڭ «بەس الەۋمەتتىك باستاما» باعدارلاماسىن ىسكە اسىرۋ اياسىندا بوي كوتەرگەن.
– ەلىمىزدە الەمدىك ستاندارتتارعا سايكەس ءبىلىم بەرۋدى قالىپتاستىرۋ ءۇشىن ستۋدەنتتەرگە قولايلى جاعداي جاساۋ قولعا الىنىپ وتىر. سوعان بايلانىستى وڭىردە ستۋدەنتتەر ءۇشىن جاڭا جاتاقحانالار بوي كوتەردى. بۇعان دەيىن ءۇش كوللەدجدىڭ جاتاقحاناسى پايدالانۋعا بەرىلدى. بۇدان بىلاي 150 ورىندىق جاڭا جاتاقحاناعا ورنالاسقان پوليتەحنيكالىق كوللەدجدىڭ ستۋدەنتتەرى دە الاڭسىز ءبىلىم الادى, – دەيدى وبلىس اكىمى.
كوللەدج ديرەكتورى باعىت شەركەشباەۆانىڭ مالىمەتىنشە, بەس قاباتتى جاتاقحانانىڭ جالپى اۋدانى – 720 شارشى مەتر. جاتاقحانانىڭ «ا» بلوگىنداعى 125 ورىنعا ستۋدەنتتەر ورنالاسادى. ال «ۆ» بلوگىنداعى 25 ورىن وقىتۋشىلارعا ارنالىپتى.
– جاتاقحانا بولمەلەرى سەكتسيالارعا بولىگەن. ءار قاباتتا وقۋ كابينەتتەرى, اس ءۇي, اسحانا, كىر جۋعا, كيىم ۇتىكتەۋگە ارنالعان بولمەلەر, ۇستەل ويىندارىنىڭ بۇرىشى ورنالاسقان. ال ءبىرىنشى قاباتتا فيتنەس, يوگا زالدارى, كىتاپحانا, دەمالىس بولمەسى, ينتەرنەتكە قوسىلعان كوۆوركينگ-ورتالىعى بار. مۇندا قاۋىپسىزدىك ءۇشىن بەينەباقىلاۋ جەلىسى ورناتىلدى, – دەيدى باعىت شەركەشباەۆا.
جاڭا جاتاقحاناعا العاشقىلاردىڭ قاتارىندا ورنالاسقان ستۋدەنتتىڭ ءبىرى – سايپوللا بەكتاس. قازىر ءىىى كۋرستا وقيتىن ستۋدەنت يساتاي اۋدانىنان كەلىپتى.
– ەكى جىل بويى پاتەر جالداپ تۇردىق. پاتەر جالداۋ ءۇشىن اي سايىن 70 مىڭ تەڭگە تولەدىك. ەندى كوللەدجدىڭ جاتاقحاناسىندا تۇرامىز. جاتاقحانانىڭ جايلىلىعى ۇنادى. بوس ۋاقىتىمىزدا سپورتپەن شۇعىلدانۋىمىزعا مۇمكىندىك جاسالىپ وتىر, – دەپ قۋانىشىمەن ءبولىستى س.بەكتاس.
ستۋدەنتتەردىڭ جايلى مەكەنىنە اينالاتىن جاتاقحانانىڭ قۇرىلىسىن «اس-قۇرىلىس» جشس جۇرگىزىپتى. سەرىكتەستىك ديرەكتورىنىڭ ورىنباسارى نۇرلان ديلحانوۆتىڭ ايتۋىنشا, عيماراتتىڭ جالپى قۇنى 670 ملن تەڭگەنى قۇراعان.
اتىراۋ وبلىسى
