اۋەلى سالت اتتىلار ەكسپەديتسياسى قاسيەتتى شىڭعىستاۋعا بىلتىر جول تارتپاقشى بولعان. وعان الەمدى جايلاعان ىندەت كەدەرگى بولىپ, ات تۇياعى باسىپ وتەتىن بۇيراتاۋ, باياناۋىل, قارقارالى سەكىلدى تابيعي پاركتەر جابىلىپ قالعان. ءسويتىپ, جوسپار كەيىنگە قالادى. كەيىن دەپ ءجۇرىپ, ورايى ەل تاۋەلسىزدىگىنىڭ 30 جىلدىعىنا كەلگەن ەكەن.
مىڭ شاقىرىمدى ءجۇرىپ ءوتۋ تۋرالى ويدى ەكسپەديتسيا جەتەكشىسى بەرىك اقىلبەكوۆ تاستاعان. رۋحتاندىراتىن ۇسىنىستى تاقىمدى جىگىتتەر قولداي كەتكەن. بىراق مىڭ شاقىرىمدىق جولعا ۇزاق دايىندالدى. نۇر-سۇلتان – باياناۋىل, نۇر-سۇلتان – قورعالجىن باعىتتارىندا ساپارلاپ ءجۇردى.
– ات ۇستىندە جيىرما كۇن ءجۇرۋ وڭاي ەمەس. بىراق وي-ساناڭ, دەنەڭ ات ۇستىنە كوندىگەدى. العاشقى كۇندەرى قينالدىق. اسىرەسە, الكەي مارعۇلان اۋىلى مەن ءماشھۇر ءجۇسىپ اراسىنداعى جول اۋىر بولدى. كۇن ىستىق. اتتاردى سۋاراتىن سۋ تاپپادىق. ءوزىمىز تورسىققا قۇيعان سۋمەن تاڭداي ءجىبىتىپ وتىردىق, – دەيدى ەكسپەديتسيا مۇشەسى ەرجان جاۋباي.
الايدا ات بايلاعان اۋىلدارىندا قوناقجاي قاۋىم تۇسكى, كەشكى استارىن ازىرلەپ, كۇتىپ الىپ وتىرعان. سەمەيگە قاراستى دوعالاڭ اۋىلىنا جەتكەندە جىگىتتەردىڭ شارشاعانى باسىلىپ, كەرىسىنشە اتقا توسەلە باستاعان. توسەلمەگەندە دەيمىز, بابالارىمىز اتپەن جورىققا شىعىپ, ات ۇستىندە ۇيىقتاپ ءجۇردى ەمەس پە؟! اتتان دەسە, بۇگىنگى ۇرپاق تا وسال ەمەس. اساۋدى اۋىزدىقتاپ, ابىرويدى اسقاقتاتىپ جۇرگەندەر جەتەدى. ءسويتىپ, سالت اتتى ەكسپەديتسيا شىڭعىس تاۋىن ارالاپ, ابايعا جەتكەندە اۋدان حالقى قۇشاق جايا قارسى العان.
ەكسپەديتسيا مۇشەلەرىنىڭ ەندىگى جوسپارى – التاي مەن كاسپي اراسىن اتپەن ءجۇرىپ ءوتۋ. بۇل ءۇشىن ات ەرتتەيتىن جىگىتتەرگە ۇلكەن ازىرلىك كەرەك. تۇلپارلاردىڭ دا ءتوزىمدىسى تاڭدالادى.
شىعىس قازاقستان وبلىسى,
اباي اۋدانى
