بۇل دا تسيفرلاندىرۋدىڭ ناتيجەسى عوي, وقشاۋلاۋ رەجىمىن بۇزعانداردى ASHYQ جوباسىنىڭ كومەگىمەن انىقتاۋعا بولادى. قازىرگى ۋاقىتتا شىعىس قازاقستانداعى ASHYQ جوباسى 900-گە جۋىق نىساندا ورناتىلعان. اتاپ ايتساق, 344 قوعامدىق تاماقتانۋ ورنىندا, 167 دەمالىس بازاسىندا, اۆتوبەكەت, اۋەجايلاردا, حالىققا قىزمەت كورسەتۋ ورتالىقتارىندا جۇمىس ىستەپ تۇر.
ال جوبانىڭ QR كودى ارقىلى وسكەمەن بويىنشا ەسەپ-قيساپ جۇرگىزسەك, 35 ۇيىمنان ادام اياعى ارىلمايتىن كورىنەدى. ولاردىڭ قاتارىندا قوعامدىق تاماقتانۋ ورىندارى, ءبىر ۋنيۆەرسيتەت, بالالاردىڭ ويىن-ساۋىق ورتالىقتارى جانە جولاۋشىلار تاسىمالىن جۇزەگە اسىراتىن ۇيىمدار بار ەكەن. سەمەي قالاسى بويىنشا ايتار بولساق, 21 ۇيىمنىڭ ەسىگى ءجيى اشىلادى. ءتۋريزمى دامىعان ريددەردە جوبانىڭ QR-كودىن ەڭ كوپ پايدالانعان ءبىر عانا دەمالىس بازاسى بار. ياعني دەمالۋعا اسىققاندار كوپ. اياگوز اۋدانىندا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ فيليالىنا كەلۋشىلەر كوپ ەكەن. كوپ دەيمىز, مۇمكىن ASHYQ جوباسىن پايدالانۋعا دەگەن تالاپ كۇشتى شىعار.
قازىرگى ۋاقىتتا وسكەمەن مەن سەمەي «سارى ايماقتا» بولعانىمەن, اشىقتىقتى ەڭ كوپ قولدانعان كاسىپورىندار «جاسىل ايماقتىڭ» شارتتارى بويىنشا جۇمىس ىستەي الادى. وبلىستا ASHYQ جوباسى ەنگىزىلگەن ساتتەن باستاپ وقشاۋلاۋ رەجىمىن 214 ازامات بۇزعانى انىقتالدى. ءتۇرلى نىساندارعا «قىزىل» مارتەبەسى بار 34 ادام, «سارى» مارتەبەسى بار 180 ادام بارۋعا تىرىسقان. قۇقىق بۇزۋشىلاردىڭ ەڭ كوبى سەمەيدە تىركەلگەن. ناقتىراق ايتساق, 144 ادامعا قوعامدىق ورىنعا كىرۋگە تىيىم سالىنعان. وسكەمەندە 44 ازامات جۇيەدەن وتە الماعان.
مۇنداي ەرەجەلەرگە تۇرعىندار تۇسىنىستىكپەن قارايدى. سايىپ كەلگەندە, تۇرعىنداردىڭ قاۋىپسىزدىگى, دەنساۋلىعى ءۇشىن اتقارىلىپ جاتقان شارالار.
شىعىس قازاقستان وبلىسى
