تۇركىمەنستان كوشباسشىسى ءوز ەلىنىڭ ءبىراز ۋاقىتتان بەرى تۇركى مەملەكەتتەرىمەن تىعىز باۋىرلاستىق قاتىناستار جۇرگىزىپ كەلە جاتقانىن جانە ءوزىن تۇركى الەمىنىڭ اجىراماس مۇشەسى سانايتىنىن جەتكىزدى. ول بۇل بايلانىس تۇركىمەنستان مەن تۇركى كەڭەسى اراسىنداعى تىعىز ىنتىماقتاستىققا قول جەتكىزۋگە بەرىك نەگىز بولاتىنىنا سەنىم ءبىلدىردى.
ءوز كەزەگىندە تۇركى كەڭەسىنىڭ باس حاتشىسى پرەزيدەنت بەردىمۇحامەدوۆكە العىسىن ءبىلدىرىپ, تۇركىمەنستان ءاردايىم تۇركى الەمىنىڭ اجىراماس بولىگى بولعانىن جانە تامىرى تەرەڭدە جاتقان ورتاق تاريحتىڭ, مادەنيەت پەن مۇرانىڭ قازىناسى ەكەنىن ايتتى.
ب.امىرەەۆ تۇركى كەڭەسى باۋىرلاس تۇرىكمەنستاننىڭ ەكونوميكالىق, الەۋمەتتىك جانە ساياسي ومىردەگى ماڭىزدى ىستەردى قالاي ورىندايتىنىن جانە حالىقارالىق ارەنادا لايىقتى ورىنعا يە ەكەنىن دە اتاپ ءوتتى. تۇركىمەنستان مەن وعان مۇشە مەملەكەتتەر اراسىنداعى دامىعان ەكىجاقتى قاتىناستاردى جوعارى باعالايتىنىن دا جاسىرمادى.
باس حاتشىنىڭ ايتۋىنشا, تۇركى كەڭەسى - تۇركى الەمىندەگى ىنتىماقتاستىقتى ودان ءارى نىعايتۋ ءۇشىن بەرىك نەگىز بولادى.
باعدات امىرەەۆ تۇركىمەنستاننىڭ ءوزارا بايلانىستى ارتتىرۋ جانە تۇراقتى دامۋدى, ەكونوميكالىق ءوسۋ مەن تۇراقتىلىقتى ساقتاۋ ماقساتىندا مۇشە ەلدەرمەن ىنتىماقتاستىقتا دا, الىس-جاقىن مەملەكەتتەرمەن جانە حالىقارالىق ۇيىمدارمەن جۇرگىزەتىن ديالوگ پروتسەستەرىنە دە بەلسەندى قاتىسىپ كەلە جاتقانىن تىلگە تيەك ەتتى.
سونداي-اق, ول پرەزيدەنت بەردىمۇحامەدوۆكە تۇركى كەڭەسىنىڭ قازىرگى قىزمەتى مەن اتقارىلىپ جاتقان جۇمىستارى تۋرالى باياندادى.
2021 جىلدىڭ قاراشاسىندا, ستامبۇلدا وتەدى دەپ جوسپارلانعان تۇركى كەڭەسىنىڭ VIII سامميتىنە دايىندىعى تۋرالى دا ايتىپ بەردى.
ب.امىرەەۆ بۇل سامميتتە قابىلداناتىن ماڭىزدى شەشىمدەردىڭ تۇركى كەڭەسى اياسىنداعى ىنتىماقتاستىقتىڭ جوعارى دەڭگەيگە كوتەرىلۋىنە اسەر ەتەتىنىن جانە تۇركى الەمىندەگى قاتىناستاردىڭ مىقتى ترانسفورماتسياسىن بەلگىلەيتىنىن باسا ايتا وتىرىپ, تۇركىمەنستان پرەزيدەنتىنىڭ بۇل ماڭىزدى سامميتكە قاتىسۋى - تۇركى الەمىنىڭ بىرلىگىن كورسەتەتىنىن اتاپ ءوتتى.
تۇركىمەنستان پرەزيدەنتى تۇركى كەڭەسىنىڭ ەكى تاراپتى قىزىقتىراتىن سالالارداعى جوبالارىنا ءارى قاراي دا تۇركىمەنستاننىڭ قاتىسۋعا دايىن ەكەنىن ءبىلدىردى.
پرەزيدەنت بەردىمۇحامەدوۆ پەن باس حاتشى امىرەەۆ تۇركىمەنستانعا ۇيىمدا ەرەكشە مارتەبە بەرۋ ماقساتىندا تۇرىكمەنستان مەن تۇركى كەڭەسىنىڭ بولاشاقتاعى ىنتىماقتاستىعىن تالقىلادى.
سونداي-اق, تۇركىمەن كوشباسشىسى مەن باس حاتشىسى قازىرگى جاھاندىق جانە حالىقارالىق كۇن تارتىبىندەگى كەيبىر ماسەلەلەر بويىنشا دا پىكىر الماستى.
