وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, 29 ماۋسىم كۇنى ساعات 21:13-تە باياناۋىل اۋدانىنىڭ پوليتسياسىنا اۋىلدىق وكرۋگ اكىمىنەن جازاتايىم وقيعا تۋرالى حابارلاما تۇسكەن.
«ساعات 21:00-دە 2006 جىلى تۋعان كامەلەتكە تولماعان بالا جاڭاتىلەك اۋىلىنان 5 شاقىرىم جەردەگى اششىسۋ وزەنى ماڭىندا سىنىپتاستارىمەن بىرگە اتقا ءمىنىپ سەرۋەندەپ جۇرگەنى انىقتالدى. جىلقىعا وتىرعان ءجاسوسپىرىم جىلقىسىن سۋارىپ الماق بولىپ, سۋعا كىرگەن. الايدا قۇلاپ ءتۇسىپ, سۋعا باتىپ كەتكەن. جىلقى جاعاعا قاشىپ شىققان. سىنىپتاسى ەرەسەكتەردى كومەككە شاقىرعان. وكىنىشكە قاراي, وقيعا ورنىنا جەتكەن اكەسى بالاسىنا كومەك كورسەتە المادى», دەپ حابارلادى پاۆلودار وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ.
ايتا كەتۋ كەرەك, جازعى ماۋسىم باستالعالى پاۆلودار وبلىسىنىڭ سۋ ايدىندارىندا ءۇش كامەلەتكە تولماعان بالا سۋعا باتىپ كەتتى.
