ايتىسقا رەسپۋبليكالىق «جۇلدىز» جۋرنالىنىڭ باس رەداكتورى, قازاقستاننىڭ ەڭبەك سىڭىرگەن قايراتكەرى عالىم جايلىباي, ش.مۇرتازا اتىنداعى رۋحانيات جانە تاريحتانۋ ورتالىعى ديرەكتورىنىڭ ورىنباسارى, مادەنيەت سالاسىنىڭ ۇزدىگى احمەتجان وزبەكوۆ, ايتىسكەر اقىن, ق.مىرزاليەۆ اتىنداعى باتىس قازاقستان وبلىستىق ونەر ورتالىعىنىڭ ديرەكتورى باۋىرجان حاليوللا, ايتىسكەر اقىن, مادەنيەت سالاسىنىڭ ۇزدىگى سەرىك ىدىرىسوۆ, اقىن, رەجيسسەر, مادەنيەت قايراتكەرى وڭتالاپ نۇرماحانوۆ قازىلىق ەتتى.
ەركىندىك تاقىرىبىن ارقاۋ ەتكەن ءسوز سايىسىنا تۇركىستاندىق بەكارىس شويبەكوۆ, ارقالىقتان كەلگەن ايبەك قاليەۆ, نۇر-سۇلتان قالاسىنىڭ اتىنان اسەم ەرەجەقىزى, پاۆلودار وبلىسىنان اسپانبەك شۇعاتاەۆ, باتىس قازاقستاننان باۋىرجان شيرمەدين ۇلى, شىعىسقازاقستاندىق سەرىك قۋانعان مەن سەمەي قالاسىنان ايشولپان تىلەۋتاي قاتىستى. ءسوز بارىمتاسىنداعى اقىندار قاتارىندا ايدوس راحمەتوۆ, مۇحتار نيازوۆ, نۇرمات مانسۇروۆ, نۇرزات قارۋ جانە جامبىل باقىتالى ۇلى سىندى سىر جۇيرىكتەرى ەل الدىنا شىقتى.
جىر دوداسىندا اقىندار ەركىندىكتەن باستاپ قازىرگى ەل تۇرمىسىن جىرعا قوستى. قوعامداعى وتكىر ماسەلەلەردى ايتىپ, تىڭداۋشى جۇرتتىڭ ايىزىن قاندىردى.
رەسپۋبليكالىق اقىندار ايتىسىنىڭ قورىتىندىسىندا وبلىس اكىمى گۇلشارا ابدىقالىقوۆا ەركىندىكتىڭ ەلەڭ-الاڭىنان باستاپ, بۇگىنگى كۇننىڭ بەينەسىن سۋرەتتەگەن دودانىڭ ماڭىزدىلىعىنا توقتالدى, رۋحاني قۇندىلىقتار مەن ۇلتىمىزدىڭ سالت-ءداستۇرىن دارىپتەۋدە ايتىستىڭ ورنى ەرەكشە ەكەنىن اتاپ ءوتتى. ۇلت ءسوزىن سويلەگەن اقىندارعا العىسىن ءبىلدىرىپ, ەلگە ىنتىماق پەن بەرەكە تىلەدى.
جالپى وسى ايتىستا قازالىلىق نۇرزات قارۋ جارقىراي كورىنگەنىن ايتا كەتكەنىمىز ءجون. العاشقى اينالىمدا «ايتىستىڭ اقتاڭگەرى» اتانعان ايبەك قاليەۆكە قارسىلاس بولعان تالانتتى قىزدىڭ تاۋىپ ايتقان سوزىنە قول سوققاندار كوپ بولدى. ودان كەيىن دە ارىنىن تەجەمەستەن وزا شاۋىپ, باس بايگە الدى. ءبىرىنشى ورىن مۇحتار نيازوۆقا بۇيىردى. ەكىنشى ورىندى بەلگىلى ايتىسكەر بەكارىس شويبەك, ءۇشىنشى ورىندى اسپانبەك شۇعاتاەۆ, اسەم ەرەجەقىزى, ايبەك قاليەۆ سىندى اقىندار يەلەندى. ال نۇرمات مانسۇر قازىلار شەشىمىمەن ءجۇرسىن ەرمان اتىنداعى ارنايى جۇلدەگە لايىق دەپ تانىلدى. سەرىك قۋانعان, ايشولپان تىلەۋتاي, ايدوس راحمەتوۆ جانە باۋىرجان شيرمەدين ۇلىنا ىنتالاندىرۋ سىيلىقتارى تابىستالدى.
وبلىس اكىمى گۇلشارا ابدىقالىقوۆا 70 جاسقا تولعان ۇلت ونەرىنىڭ جاناشىرى ءجۇرسىن ەرمانعا داستۇرگە ساي شاپان جاۋىپ, ايماق تۇرعىندارى اتىنان قۇرمەت كورسەتتى.
قىزىلوردا
