قازاقستان • 24 ماۋسىم، 2021

مەملەكەتتىك حاتشى جەمقورلىقپەن كۇرەس جونىندەگى كوميسسياسىنىڭ وتىرىسىن وتكىزدى

43 رەت كورسەتىلدى

مەملەكەتتىك حاتشى قىرىمبەك كوشەرباەۆتىڭ توراعالىعىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسياسىنىڭ كەزەكتى وتىرىسى ءوتتى، دەپ حابارلايدى Egemen.kz اقورداعا سىلتەمە جاساپ.

جيىندا تاۋارلاردى، جۇمىستاردى جانە قىزمەتتەردى مەملەكەتتىك ساتىپ الۋ كەزىندەگى سىبايلاس جەمقورلىققا قارسى ءىس-قيمىل جونىندە قابىلدانعان شارالاردىڭ قازىرگى احۋالى تالقىلاندى.

كوميسسيا توراعاسى مەملەكەتتىك ساتىپ الۋلاردىڭ ءتيىمدى جۇمىس ىستەۋى الەۋمەتتىك-ەكونوميكالىق ماسەلەلەردى شەشۋگە، وتاندىق سالالاردى دامىتۋعا جانە ۇلتتىق تاۋار وندىرۋشىلەردىڭ ونىمدەرىن قولداۋعا ىقپال ەتەتىنىن اتاپ ءوتتى. سونىمەن قاتار اتالعان سالادا سىبايلاس جەمقورلىق تاۋەكەلدەرى جوعارى ەكەنى، مۇنداي جاعداي راسىمدىك جانە قارجىلىق ءتارتىپ بۇزۋشىلىقتار، بيۋدجەت قاراجاتىن ۇرلاۋ جانە وزگە دە تەرىس ماقساتتاعى ءىس-ارەكەتتەر كەزىندە ورىن الاتىنى ايتىلدى.

وتىرىس بارىسىندا قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆ مەملەكەتتىك ساتىپ الۋلاردىڭ اشىقتىعىن قامتاماسىز ەتۋ، سىبايلاس جەمقورلىققا قارسى كۇرەستى كۇشەيتۋ ماقساتىندا بۇل جۇمىستاردى ەلەكتروندىق تاسىلمەن وتكىزۋدى قولداعانى جايىندا باياندالدى. قابىلدانىپ جاتقان شارالار بيۋدجەت قاراجاتىن پايدالانۋدىڭ تيىمدىلىگىن ارتتىرۋعا، الەۋەتتى ءونىم بەرۋشىلەردىڭ ساتىپ الۋلارعا قاتىسۋ ءراسىمىن وڭايلاندىرۋعا، قۇجاتتاردىڭ ەلەكتروندىق دەپوزيتاريىن ەنگىزۋگە مۇمكىندىك بەرەدى.

سونداي-اق بيىل مەملەكەت باسشىسى ق.ك.توقاەۆتىڭ تىكەلەي تاپسىرماسىمەن «كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ ساتىپ الۋ تۋرالى» زاڭى قابىلداندى. پرەزيدەنتتىڭ وتاندىق بيزنەستىڭ ساتىپ الۋلارعا تولىققاندى قولجەتىمدىلىگىن قامتاماسىز ەتۋگە، ءبىر كوزدەن ساتىپ الۋدى قىسقارتۋعا، ولاردىڭ تيىمدىلىگى مەن اشىقتىعىن ارتتىرۋعا قاتىستى زاڭنامانى جەتىلدىرۋ جونىندەگى تاپسىرمالارى ورىندالىپ جاتىر.

سىبايلاس جەمقورلىققا قارسى ءىس-قيمىل جانە قارجىلىق مونيتورينگ اگەنتتىكتەرىنىڭ، باس پروكۋراتۋرانىڭ، «اتامەكەن» ۇكپ، قارجى، دەنساۋلىق ساقتاۋ مينيسترلىكتەرىنىڭ باسشىلارى، سونداي-اق، بىرقاتار وڭىرلەردىڭ اكىمدەرى ساتىپ الۋ كەزىندەگى سىبايلاس جەمقورلىق پەن باسقا دا ءتارتىپ بۇزۋشىلىقتاردى اشۋ جانە جويۋ، كىنالى ازاماتتاردى زاڭنامادا بەلگىلەنگەن جاۋاپكەرشىلىككە تارتۋ جونىندە قابىلدانعان شارالار تۋرالى باياندادى. بۇل رەتتە مۇنداي قۇقىق بۇزۋشىلىقتاردىڭ باسىم بولىگى قۇرىلىس، تۇرعىن ءۇي-كوممۋنالدىق شارۋاشىلىعى، ءبىلىم بەرۋ، دەنساۋلىق ساقتاۋ جانە مادەنيەت سالالارىندا بولاتىنى، ال ۇرلانعان بيۋدجەت قاراجاتى كولەڭكەلى اينالىمعا تۇسەتىنى تۋرالى ايتىلدى.

جيىندا پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ءا.يسەكەشەۆ مەملەكەتتىك ساتىپ الۋ كەزىندە سىبايلاس جەمقورلىق تاۋەكەلدەرىن تومەندەتۋ جونىندەگى ۇسىنىستارىن ورتاعا سالدى.

سونىمەن قاتار كوميسسيادا كاسىپكەرلىك سۋبەكتىلەرىنىڭ قۇقىقتارى مەن زاڭدى مۇددەلەرىن ساقتاۋ ءۇشىن اتقارىلىپ جاتقان جۇمىستار، ساتىپ الۋ باعالارىن اسىرا كوتەرۋ، تولەنگەن سالىقتار تۋرالى مالىمەتتەردى قۇبىلتۋ، مەملەكەتتىك ساتىپ الۋ پورتالىنىڭ ءتيىستى دەڭگەيدە قىزمەت اتقارماۋى، كىنالى ادامداردىڭ ءوز دارەجەسىندە جاۋاپقا تارتىلماۋى سەكىلدى ماسەلەلەردى قاراستىردى.

كوميسسيا وتىرىسىنىڭ قورىتىندىسى بويىنشا مەملەكەتتىك حاتشى بىرقاتار ناقتى تاپسىرما بەرىپ، ولاردىڭ ورىندالۋى باقىلاۋدا بولاتىنىن ايتتى. قارجى مينيسترلىگىنە كوميسسيانىڭ مەملەكەتتىك ساتىپ الۋ سالاسىنداعى مەملەكەتتىك رەتتەۋدى قامتاماسىز ەتەتىن ۇسىنىمىن ازىرلەۋ تاپسىرىلدى.

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

نۇرحاننىڭ دومبىراسى

ونەر • بۇگىن، 09:05

ءتورت دۇركىن چەمپيون

TOKYO2020 • بۇگىن، 09:04

ءبىر ءوزى – ءبىر مەملەكەت

TOKYO2020 • بۇگىن، 09:00

ءاميان اقشاسىز قالدى

قارجى • بۇگىن، 08:47

ساقتىق تالاپقا ساي ەمەس

كوروناۆيرۋس • بۇگىن، 08:37

Ashyq جوباسىن پايدالانۋشىلار سانى ارتتى

كوروناۆيرۋس • بۇگىن، 08:35

ۇقساس جاڭالىقتار